შეფასებისა და გამოცდების ეროვნული ცენტრი გაცნობებთ, რომ აბიტურიენტთა ცნობარში გარკვეული ცვლილებები შევიდა. კერძოდ, აკადემიური პროგრამების ჩამონათვალს დაემატა სამი პროგრამა, ერთ პროგრამას კი შეეცვალა სახელწოდება (აკაკი წერეთლის სახელობის სახელმწიფო უნივერსიტეტის პროგრამა "სასურსათო ტექნოლოგია" ჩაანაცვლა პროგრამამ "საკვები პროდუქტების ტექნოლოგია და უვნებლობა").
განათლების, მეცნიერების, კულტურისა და სპორტის სამინისტროს გადაწყვეტილებით 2019 წელს ხულოში საგამოცდო ცენტრი გაიხსნება. სურვილის შემთხვევაში აბიტურიენტებს საგამოცდო ცენტრების ჩამონათვალში ხულოს ცენტრის არჩევაც შეეძლებათ.
მაღალმთიან აჭარაში საგამოცდო ცენტრი წლების განმავლობაშიფუნქციონირებდა, თუმცა 2018 წელს სკოლის შენობაში მიმდინარე სარეაბილიტაციო სამუშაოების გამო ცენტრი ვეღარ გაიხსნა.
2019 წელს გამოცდები შემდეგ ქალაქებში ჩატარდება: ახალციხე, ბათუმი, გორი, ზუგდიდი, თბილისი, თელავი, ოზურგეთი, რუსთავი, ფოთი, ქუთაისი და ხულო.
ერთიანი ეროვნული გამოცდებისათვის რეგისტრაცია 12 მარტიდან დაიწყო. აბიტურიენტთა რეგისტრაციის პროცესი წელსაც რამდენიმე ეტაპად იყოფა - პირადი მონაცემების შეტანა, საგამოცდო ქალაქისა და ჩასაბარებელი საგნების არჩევა აბიტურიენტებს პირველ, ძირითად ეტაპზე (3 აპრილის 18:00 საათამდე) შეეძლებათ.
3 აპრილის 18:00 საათის შემდეგ აბიტურიენტი ვეღარ შეცვლის საგამოცდო ქალაქს, თუმცა 7 მაისის 18:00 საათამდე მას გამოცდის დამატება ან საგნის შეცვლ შეეძლება, ხოლო საგანმანათლებლო პროგრამების ჩამონათვალში ცვლილებების შეტანის საშუალება აპელაციის შედეგების გამოქვეყნებიდან მომდევნო დღის ჩათვლით ექნება.
წაიკითხეთ სრულად
