ეროვნული გამოცდები ჩვეულ რეჟიმში გაიმართება და გამოცდების ჩატარების თარიღი გამოცხადდება, როგორც ყოველთვის, ივნისის თვეში, - ამის შესახებ პრემიერ-მინისტრმა გიორგი გახარიამ მთავრობის სხდომაზე განათლების ანტიკრიზისული გეგმის წარდგენისას განაცხადა.
პრეზენტაციაზე გიორგი გახარიამ ყურადღება გაამახვილა განათლების რეფორმაზე და აღნიშნა, რომ მიუხედავად გლობალური პანდემიისა, განათლების რეფორმა გაგრძელდება და ახალ აქცენტებს შეიძენს.
„მოგეხსენებათ, რომ საქართველოს მთავრობისთვის განათლება არის პრიორიტეტი N1. განათლების სისტემის რეფორმირება გრძელდება და ჩვენი ამოცანაა, მიუხედავად გლობალური პანდემიისა, ამ რეფორმას არაფერი არ უნდა დაემუქროს. რა თქმა უნდა, ეს რეფორმა შეიძენს ახალ დამატებით აქცენტებს, რომლებიც უფრო მეტად იქნება ორიენტირებული დისტანციურ სწავლებებზე. ყველას კარგად უნდა გვესმოდეს, რომ ჯერჯერობით ზუსტად არავინ იცის, როგორი იქნება პოსტპანდემიური მსოფლიო, მაგრამ ერთმნიშვნელოვნად ცხადია, რომ გლობალური კონკურენცია იქნება უფრო მძაფრი. ამიტომ ჩვენ ყველაფერი უნდა გავაკეთოთ იმისთვის, რომ ჩვენი ბავშვები, ჩვენი სკოლის მოსწავლეები და სტუდენტები იყვნენ მზად, რომ შესაბამისი ადგილი დაიკავონ ამ გლობალურ კონკურენციაში. ყველას უნდა გვესმოდეს, რომ როგორც ადამიანური, ისე ფინანსური რესურსი, დღეს სრულად უნდა იყოს მობილიზებული, რომ განათლების სისტემური რეფორმა წარმატებით დასრულდეს,“ - აღნიშნა გიორგი გახარია.
როგორ იყენებენ ქართველი მასწავლებლები მოსწავლეზე ორიენტირებული სწავლების მიდგომებს
როგორ იყენებენ ქართველი მასწავლებლები მოსწავლეზე ორიენტირებული სწავლების მიდგომებს ზუსტი და საბუნებისმეტყველო მეცნიერების, ტექნოლოგიების, საინჟინრო და მათემატიკის მიმართულებების (STEM) საგნების გაკვეთილებზე.
საქართველოს მასშტაბით, საბუნებისმეტყველო საგნების მასწავლებლები ლექციური ტიპის და დაზეპირებაზე დაფუძნებული გაკვეთილებიდან გადადიან მოსწავლეზე ორიენტირებული სწავლების მიდგომების გამოყენებაზე. დადასტურებულია, რომ ამ მიდგომების გამოყენება მნიშვნელოვნად უწყობს ხელს მოსწავლეთა მიერ სამეცნიერო კონცეფციების შესწავლას და ამასთანავე, მოსწავლეებში კრიტიკული აზროვნებისა და პრობლემების გადაჭრის უნარების განვითარებას, რაც მომავალში მიმზიდველი იქნება დამსაქმებლებისთვისაც.
