Baby Bag

10 პროდუქტი, რომელიც ჩვილის კანს აღიზიანებს

10 პროდუქტი, რომელიც ჩვილის კანს აღიზიანებს

ახალბედა დედებს ჩვილის ჯანმრთელობისა და კეთილდღეობის უზრუნველსაყოფად ძალიან ბევრი რამის სწავლა უხდებათ. ახალშობილის კანის მოვლა დედების ერთ-ერთი მთავარი საზრუნავია. ჩვილებს ძალიან მგრძნობიარე და დელიკატური კანი აქვთ, რის გამოც მასზე ზრუნვა საკმაოდ სერიოზული საქმეა. სხვადასხვა საგანთან კონტაქტის დროს ახალშობილის კანი მარტივად ღიზიანდება. თავდაპირველად დედებს უჭირთ იმის გარკვევა, თუ რამ გამოიწვია ბავშვის კანის გაწითლება ან გაუხეშება, თუმცა გარკვეული დროის შემდეგ მთავარი გამღიზიანებლების გამოვლენა შედარებით მარტივდება. თუ თქვენ ახალბედა დედა ხართ და ჩვილის კანის მოვლაზე ბევრი არაფერი იცით, ჩვენს სტატიას ყურადღებით გაეცანით, რათა ბავშვი იმ ნივთებისა და პროდუქტებისგან დაიცვათ, რომლებიც მის კანს აზიანებენ.


• აბრაზიულად დამუშავებული ლითონის მასალა

ჩვილი ბავშვის ტანსაცმელი მაქსიმალურად კომფორტული უნდა იყოს. როგორც წესი, ახალშობილის ტანისამოსს რამდენიმე ელვა შესაკრავი მაინც აქვს, რომელიც ბავშვის კანს გამუდმებით ეხახუნება. შესაკრავები უმეტესად ისეთი მასალისგან მზადდება, რომელიც ახალშობილის ნაზი კანისთვის საზიანო არ არის, თუმცა რიგ შემთხვევებში, შესაძლოა, ელვა შესაკრავის შემადგენლობაში ისეთი ნაერთები შედიოდეს, რომელიც ბავშვის კანს აღიზიანებს. ნიკელისგან დამზადებული შესაკრავები ჩვილისთვის საზიანოა. თუ თქვენი შვილის კანი მგრძნობიარეა, შესაკრავთან კონტაქტის ადგილას მას წითელი ლაქები გაუჩნდება და დაზიანებული კანი შეუშუპდება.

• მზისგან დამცავი კრემი

ჩვილი ბავშვი გარეთ თუ გაგყავთ, მისი კანის მზისგან დასაცავად ქუდი ან ქოლგა უნდა გამოიყენოთ. მშობლების ნაწილი მეტისმეტი სიფრთხილის გამო ჩვილს ბუნებაში გასეირნებისას მზისგან დამცავ კრემსაც უსვამს. მზისგან დამცავ კრემში შემავალი ინგრედიენტები საკმაოდ მრავალფეროვანია. ზოგიერთ მათგანს ჩვილის კანზე გამონაყარის გაჩენის უნარი შესწევს. გარდა ამისა, მზისგან დამცავი კრემი ახალშობილის კანის ულტრაიისფერი გამოსხივებისგან დასაცავად ყოველთვის ეფექტური არ არის. ამერიკის პედიატრთა აკადემიის რეკომენდაციით, მზისგან დამაცვი კრემის გამოყენება 6 თვემდე ასაკის ბავშვებში რეკომენდებული არ არის, რადგან ჩვილის კანი ჯერ კიდევ ჩამოყალიბების პროცესშია.

• სურნელოვანი ლოსიონები

სურნელოვანი ლოსიონი დედების ერთ-ერთ საყვარელ პროდუქტად ითვლება, მისი გამოყენებისას ჩვილს სასიამოვნო არომატი ასდის, რაც უფროსებს ძალიან ხიბლავთ, თუმცა ლოსიონებისთვის განსაკუთრებული სურნელის მისანიჭებლად, მწარმოებლები მას სხვადასხვა ქიმიური ნაერთებით ამდიდრებენ. აღნიშნული ნაერთები ჩვილის კანისთვის სასარგებლო ნამდვილად არ არის. ბავშვების ნაწილს სურნელოვან ლოსიონებზე ალერგიული რეაქცია უვლინდება. ჩვილებს, რომლებსაც სხვადასხვა ქიმიური ნაერთისადმი განსაკუთრებით მაღალი მგრძნობელობა აქვთ, ხშირად ატოპიური დერმატიტის დიაგნოზს უსვამენ. პატარებს გაღიზიანებული კანი ექავებათ და თავს არაკომფორტულად გრძნობენ. უმჯობესია, ჩვილ ბავშვებში უსუნო ლოსიონები გამოიყენოთ, რათა მათი ნაზი კანი გაღიზიანებისგან დაიცვათ.

• მოზრდილებისთვის განკუთვნილი კანის მოვლის საშუალებები

მოზრდილებისთვის განკუთვნილი კანის მოვლის საშუალებების ჩვილებში გამოყენებას საკმაოდ ბევრი უკუჩვენება აქვს. როგორც წესი, მსგავსი პროდუქტების შემადგენლობაში შემავალი ძლიერი ქიმიური ნაერთები ბავშვებში ალერგიულ რეაქციებს იწვევს და მათ კანსაც მნიშვნელოვნად აზიანებს. მედიკოსები დედებს ურჩევენ, რომ ახალშობილების კანის მოვლისთვის მხოლოდ ჩვილებისთვის განკუთვნილი პროდუქტები გამოიყენონ.

• სურნელოვანი სარეცხი საშუალებები

სურნელოვანი სარეცხი საშუალებები ჩვილის კანს მეტისმეტად აღიზიანებს. მასში შემავალი ქიმიური ნივთიერებები კანის სიწითლის და სხვადასხვა ანთებითი პროცესის გამომწვევ ერთ-ერთ მთავარ მიზეზად გვევლინება. სურნელოვანი საშუალებებით გარეცხილი ტანსაცმლის ჩაცმის შემდეგ მგრძნობიარე კანის მქონე ჩვილებს სიწითლე და გამოყანარი ხშირად აწუხებთ. ახალშობილის ტანსაცმლის გარეცხვის შემდეგ აუცილებელია სუფთა წყალში მათი საგულდაგულოდ გავლება, რათა ტანსაცმლიდან სარეცხი საშუალების კვალის გაქრობა შეძლოთ. უმჯობესია, თუ ბავშვის ტანსაცმელს სურნელოვანი სარეცხი საშუალებებით არ გარეცხავთ.

• ბავშვის სველი ხელსახოცი

დედები ბავშვის კანის გასასუფთავებლად სველ ხელსახოცებს რეგულარულად იყენებენ. საბავშვო სველი ხელსახოცების უდიდესი ნაწილი მეთილიზოთიაზოლინს შეიცავს. კვლევებით დასტურდება, რომ აღნიშნული კონსერვანტი კანზე მტკივნეული გამოყანარის გაჩენას იწვევს. მედიკოსები დედებს მოუწოდებენ, რომ სველი ხელსახოცის შეძენამდე ყურადღებით გაეცნონ პროდუქტის შემადგენლობას და არ შეიძინონ ისეთი სველი ხელსახოცები, რომლებიც მეთილიზოთიაზოლინს შეიცავს.

არ დაგავიწყდეთ !!!

Moms.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)


• არომატული საპონი

ჩვეულებრივი საპონი ბევრ ისეთ ინგრედიენტს შეიცავს, რომლებიც ჩვილის კანისთვის სასარგებლო ნამდვილად არ არის. არომატული საპონის შემადგენლობაში კი დამატებით ფორმალდეჰიდი და ნატრიუმის ლაურილის სულფატიც შედის. აღნიშნული პროდუქტები ფილტვებს, კანსა და თვალებს აღიზიანებს. პედიატრთა ნაწილი თვლის, რომ არომატული საპონი ატოპიური დერმატიტის განვითარებასაც უწყობს ხელს. ჩვილის კანის დასაცავად სპეციალურად ახალშობილებისთვის განკუთვნილი ნატურალურ ინგრედიენტებზე დამზადებული საპონი უნდა გამოიყენოთ. თუ დარწმუნებული არ ხართ, რომელი ჰიგიენური საშუალებების შეძენა გსურთ, რეკომენდაციისთვის პედიატრს მიმართეთ.

• დაბინძურებული საფენები

ბავშვებს საფენები დღის განმავლობაში რამდენჯერმე უნდა გამოუცვალოთ. თუ ბავშვი საფენს ხანგრძლივად ატარებს, მისი ნაზი კანი ღიზიანდება. შარდით ან ფეკალიებით დაბინძურებული საფენი ბავშვს დროულად უნდა გამოუცვალოთ. წინააღმდეგ შემთხვევაში მას კანზე დამწვრობები და წყლულები გაუჩნდება.

• სინთეთიკური სამოსი

ბავშვის ტანსაცმელი სხვადასხვა მასალისგან მზადდება. სინთეთიკური სამოსის ტარება ჩვილისთვის რეკომენდებული არ არის, რადგან ის კანის გაღიზიანებას იწვევს. ტანსაცმელი რომელიც არ სუნთქავს, ბავშვის კანს აზიანებს, რადგან ქსოვილის შემადგენლობაში შემავალი მავნე ქიმიური ნაერთები მასზე ნეგატიურად ზემოქმედებს. თუ თქვენს ჩვილს მგრძნობიარე კანი აქვს ან ბავშვი ალერგიულია, მას მხოლოდ ნატურალური მასალისგან დამზადებული ტანისამოსი უნდა ჩააცვათ.

• საწმენდი საშუალებები

იატაკისა და ავეჯის ზედაპირის გასუფთავების მიზნით დიასახლისები საწმენდ საშუალებებს აქტიურად იყენებენ. მსგავსი პროდუქტები დიდი რაოდენობით ტოქსიკურ ან შედარებით ნაკლებად მავნე ნივთიერებებს შეიცავს. დიასახლისები ცდილობენ ჯანსაღი ინგრედიენტებისგან დამზადებული საწმენდი საშუალებები გამოიყენონ, რაც სავსებით ბუნებრივია, თუმცა, მსგავსი ტიპის პროდუქტები დიდი რაოდენობით ამიაკს შეიცავს. ეს უკანასკნელი კი ჩვილი ბავშვების კანს აღიზიანებს. ამიაკთან ზედაპირული კონტაქტის დროს ბავშვის კანი წითლდება და პატარას ქავილის შეგრძნება აწუხებს. მსგავსი უსიამოვნებების თავიდან ასაცილებლად უმჯობესია იატაკის და ავეჯის ზედაპირის გასასუფთავებლად ძმარი ან სოდიანი წყალი გამოიყენოთ. 

მომზადებულია babygaga.com-ის მიხედვით
თარგმნა ია ნაროუშვილმა 

შეიძლება დაინტერესდეთ

ქება ყოველთვის დამსახურებული უნდა იყოს. ნუ შეაქებთ ბავშვს მაშინ, როდესაც ის ამას არ იმსახურებს

ქება ყოველთვის დამსახურებული უნდა იყოს. ნუ შეაქებთ ბავშვს მაშინ, როდესაც ის ამას არ იმსახურებს

როგორ ვაგრძნობინოთ შვილს, რომ მისით ძალიან ვამაყობთ? მშობლებს უჭირთ ბავშვების მიმართ აღფრთოვანების გამოხატვა, რადგან ეშინიათ, რომ ბავშვებს საკუთარ თავზე ზედმეტი წარმოდგენა არ შეუქმნან, რაც მათი წინსვლისა და წარმატებისთვის, შესაძლოა, საზიანო აღმოჩნდეს. ბავშვის მიღწევებისა და ღირსებების აღნიშნვა ისეთი ფორმით უნდა შეგეძლოთ, რომ მას სიამაყის განცდა გაუჩნდეს და არა ამპარტავნების. თქვენმა შვილმა უნდა იგრძნოს, რომ მისი შესაძლებლობების დანახვა და დაფასება შეგიძლიათ.

  • ბავშვი მნიშვნელოვანი მიღწევებისთვის შეაქეთ

ბავშვები ყოველდღიურად უამრავ რამეს აკეთებენ, თუმცა ზოგიერთი აქტივობა სხვებთან შედარებით ბევრად მნიშვნელოვანია. თუ ბავშვი მუსიკაზე დადის და მან მნიშვნელოვანი მუსიკალური ნაწარმოების დაკვრა ისწავლა, ბევრი იშრომა და საუკეთესო შედეგი მიიღო, ის თქვენგან შექებას იმსახურებს. თუ ბავშვი კონცერტისთვის მარტივ მუსიკას შეარჩევს, რადგან რთული ნაწარმოების მომზადება ეზარება, ის არ უნდა შეაქოთ. ქება ყოველთვის დამსახურებული უნდა იყოს. ნუ შეაქებთ ბავშვს მაშინ, როდესაც ის ამას არ იმსახურებს.

  • ბავშვი შრომის პროცესში უნდა შეაქოთ

თქვენი შვილი მნიშვნელოვან სპორტულ კონკურსს თუ მოიგებს და მას შეაქებთ, ის იფიქრებს, რომ ცხოვრებაში ყველაზე მთავარი გამარჯვებაა. უმჯობესია, მას უთხრათ, რომ მისი შრომა და მონდომება დაფასდა. ბავშვმა უნდა იგრძნოს, რომ გამარჯვება შემთხვევითობა არ არის. ის უნდა მიახვედროთ, რა მნიშვნელობა აქვს შრომას და მონდომებას. თუ ბავშვს მხოლოდ მოგების გამო აქებთ, ის ვერ გაიგებს, როგორი მნიშვნელოვანია შრომის პროცესი.

  • ბავშვს აუხსენით, თუ რა სირთულეები შეიძლება შეხვდეს ცხოვრებაში

ბავშვებს მიზნის მიღწევამდე ბევრი სირთულის გადალახვა უწევთ. ისინი ხშირად მეგობრებთან დროის გატარებას ვერ ახერხებენ, რადგან მეცადინეობენ ან სპორტული აქტივობებით არიან დაკავებულები. როდესაც ბავშვები სხვადასხვა კონკურსში მონაწილეობენ, მათ მარცხთან შეგუებაც უწევთ. როდესაც ბავშვის წარმატებებს აღნიშნავთ, აუცილებლად უთხარით მას, თუ რამდენი რამის გამოვლა მოუხდა, რათა მიზნისთვის მიეღწია. ბავშვმა უნდა იგრძნოს, რომ მის წარმატებებსა და წარუმატებლობებს თვალს ადევნებთ. მან უნდა იცოდეს, რომ თქვენთვის ყველაფერი მნიშვნელოვანია, რაც მის ცხოვრებაში ხდება.

  • ბავშვის წარმატება სათანადოდ დააფასეთ და მის მიმართ აღფრთოვანება გამოხატეთ

თქვენი შვილის წარმატებით თუ იამაყებთ, ამაში ცუდი არაფერია. ბავშვი იგრძნობს, რომ მისი მიღწევები სიხარულს განიჭებთ და გაბედნიერებთ. ბავშვებს ძალიან უხარიათ, როდესაც მათ შესაძლებლობებს ხოტბას ასხამთ და სათანადოდ აფასებთ. თქვენს შვილს აუცილებლად უთხარით კომპლიმენტები, თუ ის ამას იმსახურებს. ეს ბავშვზე დაუვიწყარ შთაბეჭდილებას მოახდენს.

  • გადაჭარბებული აღფრთოვანება საჭირო არ არის

თქვენს სიამაყეს გარკვეული კონტექსტი უნდა ჰქონდეს. ბავშვის წარმატება ზედმეტად არ უნდა აღნიშნოთ. თუ თქვენი შვილი ცხოვრებაში პირველად მოიგებს საფეხბურთო ჩემპიონატს, მეზობლებისა და ნათესავების მოპატიჟება არ გჭირდებათ. თუ საზეიმო მიღებას მოაწყობთ და ბავშვის გამარჯვებას გრანდიოზულად აღნიშნავთ, ის იფიქრებს, რომ უკვე ყველაფერს მიაღწია, რაც სურდა. ბავშვის მიღწევები ოჯახურ წრეში აღნიშნეთ და მას თქვენი სიხარული გაუზიარეთ.

  • შექება ყოველთვის დროული უნდა იყოს

ბავშვი მაშინ უნდა შეაქოთ, როდესაც ის წარმატებას აღწევს. მისთვის მნიშვნელოვანი მოვლენიდან ერთი კვირის შემდეგ ქებას დიდი მნიშვნელობა არ აქვს. ბავშვმა ყველაფერი სიღრმისეულად რომ განიცადოს და პროცესის მთლიანობა აღიქვას, ქება დროული უნდა იყოს.

  • ბავშვის შექების დროს ნეგატიური ფრაზები არ გამოიყენოთ

მშობლებს ბავშვის შექება ძალიან აშინებთ, რადგან ფიქრობენ, რომ ის ზედმეტად გათამამდება. თუ თქვენი შვილი სკოლაში ცუდად სწავლობს, მაგრამ სპორტში წარმატებულია, მისი მიღწევების შექებისას, სწავლაში მის წარუმატებლობას ნუ ახსენებთ. თუ ბავშვს აქებთ, მას პარალელურად შენიშნვები არ უნდა მისცეთ.

  • ბავშვის შექებისას მასზე უნდა კონცენტრირდეთ

როდესაც ბავშვს აქებთ, ის სხვებს არ უნდა შეადაროთ. ქების დროს მხოლოდ მასზე უნდა კონცენტრირდეთ. თუ ბავშვს სხვებს შეადარებთ და აღნიშნავთ, რომ ის სხვებზე უკეთესი ან უარესია, ამით მას თავდაჯერებას ვერ შემატებთ.

  • ბავშვს სხვების შრომის დაფასება ასწავლეთ

ბავშვის ღირსეულ ადამიანად ჩამოყალიბება თუ გსურთ, მას სხვების შრომის დაფასება უნდა ასწავლოთ. თუ ის სკოლაში წარმატებული მოსწავლეა, უნდა იცოდეს, რომ ეს მხოლოდ მისი დამსახურება არ არის. ბავშვს მასწავლებლისთვის მადლობის წერილი მიაწერინეთ. მან უნდა იცოდეს, რომ ჯგუფური მუშაობა და მიღწევები ისევე მნიშვნელოვანია, როგორც ინდივიდუალური წარმატება.

მომზადებულია ​verywellfamily.com - ის მიხედვით

თარგმნა ია ნაროუშვილმა

წაიკითხეთ სრულად