Baby Bag

რატომ არის აუცილებელი თეატრში სიარული ბავშვებისთვის?

რატომ არის აუცილებელი თეატრში სიარული ბავშვებისთვის?

რატომ არის აუცილებელი თეატრში სიარული ბავშვებისთვის? – ამ თემაზე გვესაუბრება სოციალური პედაგოგი და მოზარდთა განვითარების სპეციალისტი დიანა მაკალათია.

თეატრი მხოლოდ გართობის საშუალება არ არის, ის სულის საზრდოა, რომელიც მოზარდების სრულყოფილი და ჰარმონიული განვითარებისთვის აუცილებელია. ადამიანის პიროვნებად ჩამოყალიბება მცირე ასაკიდან იწყება. არსებობს რამდენიმე მიზეზი თუ რატომ უნდა ატაროთ მოზარდები თეატრში:

თეატრში სიარული, სპექტაკლებზე დასწრება პირველ რიგში უვითარებს ბავშვებს გარკვეულ მანერებს, აჩვევს საზოგადოების სხვადასხვა წესს, მაგალითად იმას, რომ სპექტაკლის მსვლელობის განმავლობაში არ შეიძლება ტელეფონის გამოყენება, საუბარი, სიარული, არაეთიკურად მოქცევა. ამ დროს ხდება დაკვირვება და ქცევათა დასწავლა გარემოებების მიხედვით. ამასთანავე მათ უმუშავდებათ ნებისყოფის, შინაარსზე ფოკუსირებისა და კონცენტრაციის უნარიც, თუმცა აუცილებელია სპექტაკლი ასაკობრივად ზუსტად იყოს მორგებული ბავშვზე.

თეატრი გვეხმარება დივერგენციული აზროვნების განვითარებაში. ეს გულისხმობს პრობლემის სხვადასხვაგვარი უჩვეულო გადაწყვეტის უნარს. დივერგენციული აზროვნება კონცენტრირდება ალტერანტიული პასუხების დიდი რაოდენობის წარმოქმნაზე, მათ შორის ორიგინალური, მოულოდნელი ან უჩვეულო იდეების ჩათვლით. ამრიგად, დივერგენიცული აზროვნება ასოცირდება შემოქმედებითობასთან. ამ ტიპის აზროვნებას კრეატიულსაც უწოდებენ, რადგან გამოირჩევა იდეების სიმდიდრითა და აზრის ორიგინალურობით.

ასე რომ, თეატრი წარმოსახვის განვითარებას ხელს უწყობს, ბავშვმა შესაძლოა სპექტაკლის შემდეგ გამოთქვას ინიციატივა საყვარელი გმირებისთვის კოსტუმების შექმნის, ან დახატოს ილუსტრაცია, გაუჩნდეს რომელიმე საკრავზე დაკვრის ან ცეკვის ინტერესი, ასევე შეიძლება მსახიობობაც მოუნდეს და მინი სპექტაკლები ჩაატაროს სახლში. მნიშვნელობა ენიჭება აქ ზუსტად იმას, რომ ბავშვს ინტერესები უჩნდება, რაც მომავალში პოზიტიურად იმოქმედებს მის ცხოვრებაზე.

გთავაზობთ აქტივობას, რომელიც ჩემმა მოსწავლეებმა ცენტრში განახორციელეს, თუ მშობელი ბრძანდებით ან მასწავლებელი, შეგიძლიათ თქვენც დაამზადებინოთ მუყაოს ყუთისგან თეატრის მინი მაკეტი და სხვადასხვა მიზნით გამოიყენოთ, დადგათ საბავშვო სპექტაკლები ქართულ თუ უცხოურ ენაზე, გაიუმჯობესოთ როგორც ენობრივი უნარები, ასევე შემოქმედებითი.

თეატრში ვიზიტი მშობლებისთვის ასევე შესანიშნავი საშუალებაა ახლო კონტაქტი დაამყარონ შვილებთან, გააღრმავონ კომუნიკაცია, თუ გადატვირთული სამსახურის გამო ვერ ახერხებთ სათანადო დრო დაუთმოთ შვილებს, თეატრი მოგცემთ ერთად სასიამოვნოდ დროის გატარების საშუალებას, რომელიც გაჯერებულოი იქნება დიალოგებით, დისკუსიით, სპექტაკლის მიმოხილვით და ა.შ

თეატრი ასევე სოციალური უნარების გაუმჯობესებისთვისაც საუკეთესო გზას წარმოადგენს. ბავშვები სხვადასხვა გათამაშებული სიუჟეტის მეშვეობით სწავლობენ ადამიანთა ემოციების შესახებ, ხდებიან მეტად ემპათიურები, მათ შესაძლოა გაიგონ ისეთი ემოციების/სიტუაციების შესახებაც, რომელიც რეალურ ცხოვრებაში არ განუცდიათ, მაგ: ძალადობა, სიკვდილი, ბულინგი და ა.შ დაინახონ სამყაროს ორი ურთიერთსაპირისპირო ძალა: სიკეთე და ბოროტება.

თეატრი ამბავს გვიყვება, ამბის თხრობა კი ეხმარება ბავშვებს ენობრივი უნარების გაუმჯობესებაშიც. თეატრალურმა პერფორმანსებმა შესაძლოა კომუნიკაციური უნარებზე დადებითად იმოქმედოს. სპექტაკლი ნამდვილად მოგვწყვეტს დროებით მაინც ტექნოლოგიურ სამყაროსგან, რომელიც ხშირად აფერხებს მოზარდის განვითარებას, მცირე ასაკიდან უყალიბდებათ ბავშვებს ტელეფონებისადმი ადიქცია, ამიტომ მსგავსი გასვლითი დღეები მათთვის განტვირთვასთან ერთად არის საშუალება რეალური სამყარო დაინახონ ისეთი როგორიც ნამდვიალდ არის.


შეიძლება დაინტერესდეთ

„ვერც ბებია და ვერც ძიძა ვერ ანაცვლებს მშობელთან ურთიერთობას,“ - ნეიროფსიქოლოგი მარიამ ხვადაგიანი

„ვერც ბებია და ვერც ძიძა ვერ ანაცვლებს მშობელთან ურთიერთობას,“ - ნეიროფსიქოლოგი მარიამ ხვადაგიანი

ნეიროფსიქოლოგმა მარიამ ხვადაგიანმა ბავშვის აღზრდაში მშობლის აქტიური მონაწილეობის მნიშვნელობაზე ისაუბრა და ხაზი გაუსვა ორივე მშობლის როლს შვილის ცხოვრებაში:

„ბავშვს სასურველია ზრდიდეს ორივე მშობელი. უამრავი კვლევა არსებობს, თუ რატომ არის ეს სასურველი. კვლევებით მტკიცდება, რომ ძალიან მნიშვნელოვანია მშობლის მონაწილეობა ბავშვის აღზრდაში. ზრდასრულ ასაკში ბავშვის აკადემიურ მიღწევაზე გავლენას ახდენს უფრო დედასთან ურთიერთობა, ხოლო ​ემოციურ ჩამოყალიბებაზე - მამასთან ურთიერთობა. ბავშვის აღზრდასთან მიმართებაში მამის როლი ძალიან მნიშვნელოვანია.“

მარიამ ხვადაგიანის თქმით, თუ მშობლები აღზრდაში აქტიურად ვერ მონაწილეობენ, სასურველია ეს როლი ბებია-ბაბუამ იტვირთოს:

„იმ შემთხვევაში, თუ ამის შესაძლებლობა არ არის, სასურველია ბებია და ბაბუა იღებდნენ მონაწილეობას აღზრდაში. იმ შემთხვევაში, თუ ვერც ბებია-ბაბუა ვერ იღებს მონაწილეობას ბავშვის აღზრდაში, უკვე გადავდივართ ძიძაზე. რა თქმა უნდა, ​ვერც ბებია და ვერც ძიძა ვერ ანაცვლებს მშობელთან ურთიერთობას.“

„ძალიან ​მნიშვნელოვანია, რომ მშობელმა დღეში ერთი საათი მაინც გამოყოს კონკრეტულად ბავშვთან ურთიერთობისთვის. ეს დრო უნდა გამოვყოთ არა ჯგუფური აქტივობებისთვის, არამედ კონკრეტულად „მე და ჩემი შვილი.“ ეს ურთიერთობა სასურველია, რომ იყოს ყოველდღიურად დღეში ერთი საათი მაინც,“ - აღნიშნულ საკითხზე მარიამ ხვადაგიანმა Music Box-ის ეთერში ისაუბრა.

წყარო: ​Music Box

წაიკითხეთ სრულად