Baby Bag

განათლების სამინისტროს განცხადება კორონავირუსთან დაკავშირებით

განათლების სამინისტროს განცხადება კორონავირუსთან დაკავშირებით

საქართველოს განათლების, მეცნიერების, კულტურისა და სპორტის სამინისტრო აცხადებს, რომ საქართველოში კორონავირუსის დაფიქსირების მიხედავად, არც საერთაშორისო სტანდარტითა და არც ჯანდაცვის რეკომენდაციებით, დღეის მდგომარეობით, სწავლის შეწყვეტის საფუძველი არ არსებობს.

„ამის მიუხედავად, პრევენციისა და რისკის ეფექტიანი მართვის მიზნით, საქართველოს განათლების, მეცნიერების, კულტურისა და სპორტის სამინისტრო სკოლებში სანიტარულ ნორმებს ამკაცრებს. კერძოდ, მოსწავლეთა ჯანმრთელობის, სასწავლო პროცესის ეფექტურობისა და სკოლებში ჯანმრთელი გარემოს შესაქმნელად, საქართველოს განათლების, მეცნიერების, კულტურისა და სპორტის სამინისტროს მიერ სანიტარიისა და ჰიგიენის ნორმების დასაცავად სკოლებში მოთხოვნები კიდევ უფრო გაიზრდება. შესაბამისად, ადგილობრივი საგანმანათლებლო რესურსცენტრების მიერ სკოლების მონიტორინგის პროცესი უფრო ინტენსიური გახდება, რათა თავიდან იქნას აცილებული ნებისმიერი გართულება,“ - წერია უწყების მიერ გავცრელებულ ინფორმაციაში.

სამინისტრო სკოლების ადმინისტრაციას კიდევ ერთხელ მოუწოდებს, სანიტარულ-ჰიგიენური პირობების დაცვა სკოლებში სათანადოდ უზრუნველყონ, რისთვისაც აუცილებელია დაიცვან შემდეგი პირობები:

  • სკოლა ყოველდღიურად დალაგდეს სველი წესით;
  • საკლასო ოთახების, სხვა სასწავლო და დამხმარე ოთახების დალაგება გაკვეთილების დამთავრების შემდეგ მოხდეს გაღებული ფანჯრებისა და ფრამუგების მდგომარეობაში. ორი ცვლის შემთხვევაში, დალაგდეს 2-ჯერ;
  • ჩატარდეს შენობის გენერალური დასუფთავება როგორც სარეცხი, ასევე სადეზინფექციო საშუალებებით;
  • ტუალეტები, ბუფეტი, სასადილო და სამედიცინო კაბინეტი დასუფთავდეს სადეზინფექციო საშუალებებით;
  • სანიტარულ-ტექნიკური აღჭურვილობის დასუფთავება მოხდეს ყოველდღიურად. უნიტაზის დასაჯდომი ჩასარეცხი ავზის სახელურები და კარების სახელურები გაირიცხოს ცხელი წყლითა და სადეზინფექციო საშუალებების გამოყენებით;
  • სასადილოს დასუფთავება მოხდეს ყოველი საუზმე, სადილისა და სამხარის შემდეგ;
  • მაგიდები და ჭურჭელი გაირეცხოს სპეციალური ხსნარებით;
  • დეზინფექციის დროს ძირითადი ყურადღება უნდა მიექცეს იმ ნივთების დამუშავებას, რომლებიც გადამწყვეტ როლს თამაშობენ ინფექციის გადაცემაში (კარის სახელურები, კარები, მაგიდის ზედაპირები);
  • ჰაერ-წვეთოვანი ინფექციის დროს ხშირად განიავდეს კლასები, ოთახები გაიწმინდოს მტვრისაგან, დასუფთავდეს სველი წესით;
  • სკოლის ადმინისტრაციის მიერ დადგინდეს ტუალეტების დასუფთავების წესები, პერიოდულობა, დასუფთავებისათვის განკუთვნილი ინვენტარისა და გამოყენებული ჰიგიენური საშუალებების ნუსხა;
  • ნაგვის ყუთების გაცლა მოხდეს მათი 2/3-ზე გავსებისას. გაცლის შემდეგ ნაგვის შემკრებებს ჩაუტარდეს დეზინფექცია;
  • სკოლის ტერიტორიაზე არ დაიშვას უმეთვალყურეო ცხოველები;
  • სკოლაში უზრუნველყოფილი იყოს ნახმარი წყლების მოცილება/არინება და სეპტიკური ავზების დაცლა დროულად და უსაფრთხოდ;
  • სკოლის ადმინისტრაციის ორგანიზებით, სპეციალიზებული სამსახურის მეშვეობით, ჩატარდეს ნარჩენების კონტეინერების განთავსების ადგილის, ასევე საწყობებისა და სარდაფების პერიოდული დამუშავება.

„აქვე უნდა აღინიშნოს, რომ სამინისტრო სრულადაა ჩართული უწყებათაშორის საკოორდინაციო საბჭოს მუშაობაში და იმ შემთხვევაში, თუ რაიმე სახით ვირუსის გავრცელების საფრთხე გამწვავდება, სასწავლო პროცესთან დაკავშირებით მიღებული იქნება შესაბამისი გადაწყვეტილება,“ - აღნიშნულია განათლების, მეცნიერების, კულტურისა და სპორტის სამინისტროს მიერ გავრცელებულ ინფორაციაში.

თუ გინდათ, რომ განათლების სფეროში მიმდინარე სიახლეების შესახებ ინფორმირებულები იყოთ, მოიწონეთ გვერდი „მასწავლებლების სანდო წყარო“.

შეიძლება დაინტერესდეთ

„წელს ზამთარი გვექნება უფრო მსუბუქი, ვიდრე გვქონდა შარშან,“ - ალექსანდრე გოგინავას დამაიმედებელი პროგნოზი

„წელს ზამთარი გვექნება უფრო მსუბუქი, ვიდრე გვქონდა შარშან,“ - ალექსანდრე გოგინავას დამაიმედებელი პროგნოზი

ინფექციონისტმა ალექსანდრე გოგინავამ იმედი გამოთქვა, რომ წელს ეპიდემიოლოგიური თვალსაზრისით უფრო მსუბუქი ზამთარი გველის, ვიდრე შარშან გვქონდა:

​ჩემი აზრით, ზამთარი გვექნება უფრო მსუბუქი, ვიდრე გვქონდა შარშან. მოსახლეობის გარკვეული ნაწილი არის ვაქცინირებული, ნაწილმა უკვე გადაიტანა კორონავირუსული ინფექცია. აქ არის კიდევ ერთი კითხვის ნიშანი. შემოდგომაზე და ზამთარში აქტიურდებიან სხვა რესპირატორული ვირუსები, მათ შორის, გრიპის ვირუსი. თუ როგორი ზამთარი გვექნება ეპიდემიოლოგიური კუთხით, დაკავშირებულია გრიპის ვირუსთანაც.“

ალექსანდრე გოგინავას თქმით, ეპიდემიოლოგიური სიტუაციის გასაუმჯობესებლად მნიშვნელოვანია გრიპის ვაქცინის გაკეთებაც:

„იმედია, არ მოხდება გრიპის ეპიდსიტუაციის გაუარესება და არ მოხდება თანდართვა ამ ორი აგრესიული რესპირატორული ვირუსის. ამისთვისაც მნიშვნელოვანია, რომ ვაქცინაციაში ჩავერთოთ. მოგეხსენებათ, რომ ​არსებობს გრიპის საწინააღმდეგო საკმაოდ ეფექტიანი ვაქცინა. განსაკუთრები იმ ადამიანებს, რომლებიც რისკ-ჯგუფებს წარმოადგენენ, მოვუწოდებთ და ვთხოვ, რომ ჩაიტარონ ვაქცინაცია, დაიცვან რეკომენდაციები.“

„სამწუხაროდ, არსებობს განცდა, რომ პანდემია არასდროს დასრულდება. ნებისმიერ პანდემიას და ეპიდემიას აქვს დასასრული. ასე იქნება კოვიდ-19-ის შემთხვევაშიც. იმ ქვეყნებში, სადაც არის ვაქცინაციის მაღალი მაჩვენებელი, არის ბევრად ნაკლები რეგულაცია. ზოგიერთ ქვეყანაში თითქმის ყველა რეგულაცია მოხსნილია. რაც მთავარია, არის დაბალი სიკვდილიანობა და ​ჰოსპიტალიზაციის მაჩვენებელი ბევრად შემცირებულია. თეორიულად შეიძლება მაინც დაგვემართოს კორონავირუსი, მაგრამ 90 %-ში ვაქცინაციის შემთხვევაში ვირუსს გადავიტანთ მსუბუქად,“ - აღნიშნულ საკითხებზე ალექსანდრე გოგინავამ Euronews Georgia-ს ეთერში ისაუბრა.

წყარო:​ Euronews Georgia

წაიკითხეთ სრულად