Baby Bag

ბავშვებს, რომლებსაც გარკვეულ საგნებში ჩამორჩენა აქვთ და მასალის ათვისება უჭირთ, ზაფხულში დამატებითი გაკვეთილები ჩაუტარდებათ - ნიუ-იორკის მერი

ბავშვებს, რომლებსაც გარკვეულ საგნებში ჩამორჩენა აქვთ და მასალის ათვისება უჭირთ, ზაფხულში დამატებითი გაკვეთილები ჩაუტარდებათ - ნიუ-იორკის მერი
ნიუ-იორკის ხელისუფლებამ მოსწავლეთა შეფასების ახალი მოდელი წარმოადგინა. განათლების დეპარტამენტის მიერ გამართულ პრეზენტაციაზე ვირტუალური საზაფხულო სწავლების პროგრამის შესახებ ისაუბრეს, რომელიც წარუმატებელი მოსწავლეების დახმარებას ისახავს მიზნად.

პანდემიის გამო სწავლების დისტანციურ რეჟიმზე გადასვლამ განათლების სისტემა ახალი გამოწვევების წინაშე დააყენა. მთავრობის წარმომადგენლები აღნიშნავენ, რომ მათ უმთავრეს მიზანს დისტანციურ რეჟიმში მოსწავლეების სრულფასოვნად დატვირთვა და მათთვის საჭირო დახმარების აღმოჩენა წარმოადგენს.

„ყველა მოსწავლე მიიღებს დახმარებას, რომელიც მას სჭირდება. ბავშვებს, რომლებსაც გარკვეულ საგნებში ჩამორჩენა აქვთ და მასალის ათვისება უჭირთ, ზაფხულში დამატებითი გაკვეთილები ჩაუტარდებათ. საჭიროების შემთხვევაში მათ დახმარებას შემოდგომაზეც აღმოუჩენენ,“ - განაცხადა ნიუ-იორკის მერმა ბილ დე ბლაზიომ.

ცვლილებათა უმრავლესობა სწორედ იმ მოსწავლეების მდგომარეობის გაუმჯობესებაზეა მიმართული, რომლებსაც დაბალი ქულები აქვთ. ბავშვები, რომლებსაც საგნის სათანადო ცოდნა არ აქვთ, საზაფხულო სწავლების პროგრამაში ავტომატურად ჩაერთვებიან. აღნიშნული პროგრამა მერვე და მეთორმეტე კლასელ ბავშვებზეც ვრცელდება, რომლებიც დამამთავრებელ კლასებს მიეკუთვნებიან. ისინი დამატებით გაკვეთილებს აგვისტოს თვემდე მიიღებენ.

სხვადასხვა ასაკობრივი ჯგუფის წარმომადგენელი მოსწავლეებისთვის შეფასების განსხვავებული მეთოდები და სტრატეგიები გამოიყენება. დაწყებითი კლასის მოსწავლეები მხოლოდ ორი სახის შეფასებას მიიღებენ: „სტანდარტებს აკმაყოფილებს“ ან „გაუმჯობესება სჭირდება.“ მეხუთე-მერვე კლასელებსაც ამ ორი ნიშნულის მიხედვით შეაფასებენ, თუმცა მათ შეფასებას დამატებითი კრიტერიუმი ემატება. თუ მეხუთე-მერვე კლასელი მოსწავლე „მიმდინარე კურსის“ კატეგორიაში მოხვდება, მას დამატებითი საზაფხულო და საშემოდგომო პროგრამის გავლა მოუწევს. მაღალ კლასებში მოსწავლეები სტანდარტულად შეფასდებიან, მაგრამ მათ მიერ მიღებული შეფასებები GPA-ზე გავლენას არ იქონიებს. მოსწავლეები საგნებს ან ჩააბარებენ, ან მათი გავლა ხელახლა მოუწევთ, თუმცა ეს ქულების საშუალო მაჩვენებელზე არ აისახება.

საშუალო საფეხურის მოსწავლეებს 2021 წლის იანვრამდე საკურსო ნაშრომები, პრეზენტაციები და გამოცდები ჩაბარებული უნდა ჰქონდეთ. ამერიკის ენერგეტიკის დეპარტამენტი 247 000 მოსწავლეს Ipad-ებს გადასცემს, რათა მათ ინტერნეტთან მუდმივი წვდომა ჰქონდეთ და სწავლაში ხელი არ შეეშალოთ. ოჯახებს, რომლებსაც სახლში კომპიუტერი არ აქვთ, მერიის ცხელ ხაზზე დარეკვა მოუწევთ, რათა Ipad-ები მოითხოვონ.

დამამთავრებელი კლასის მოსწავლეები, რომლებიც სკოლის დამთავრებას საზეიმოდ ვერ აღნიშნავენ, ფართომასშტაბიან ვირტუალურ ცერემონიაში მიიღებენ მონაწილეობას. „მოსწავლეებისთვის მნიშვნელოვან ღონისძიებას ვგეგმავთ, რომელიც ძალიან განსაკუთრებული იქნება.“ - განაცხადა ნიუ-იორკის მერმა.

ბილ დელ ბლაზიო სკოლის მოსწავლეებს ტვიტერზეც გამოეხმაურა: „თუ გრძნობთ, რომ ბევრ სირთულესთან გიწევთ გამკლავება, იცოდეთ, რომ ჩვენ თქვენი გვესმის. ამ გზაზე მარტო არ ხართ, ჩვენ ყველაფერში მხარს გიჭერთ. მე ვხედავ, როგორი შთამაგონებელი და ექსტრაორდინალური ადამიანები ხართ. წინ ნათელი მომავალია, რომელსაც თქვენ ქმნით. დიდი მადლობა!“

ვირტუალური ცერემონიის შესახებ მოსწავლეები დეტალურ ინფორმაციას უახლოეს მომავალში მიიღებენ.


მომზადებულია ​edition.cnn.com-ის მიხედვით
თარგმნა ია ნაროუშვილმა

Momsedu.ge-მ თქვენთვის, მასწავლებლებისთვის შექმნა ახალი სივრცე - „მასწავლებლების სანდო წყარო“, სადაც ყოველდღიურად ქვეყნდება საგანმანათლებლო სფეროს სიახლეები. გადმოდით ბმულზე და მოიწონეთ - „მასწავლებლების სანდო წყარო“.

შეიძლება დაინტერესდეთ

10 წიგნი, რომელმაც მთელი მსოფლიო აატირა

10 წიგნი, რომელმაც მთელი მსოფლიო აატირა

კარგი წიგნი მკითხველს ძლიერ ემოციებს განაცდევინებს. ლიტერატურა სიხარულისა და სევდის განცდებს თანაბრად იწვევს. წიგნის კითხვისას განსაკუთრებით ვგრძნობთ, რომ ცოცხლები ვართ და ჩვენი ცხოვრება უფრო საინტერესო ხდება. ჩვენს სტატიაში 10 წიგნს გაგაცნობთ, რომლის წაკითხვისას გულგრილი ვერ დარჩებით.

1. „სამი მეგობარი“ - ერიხ მარია რემარკი

რემარკის ეს რომანი მეოცე საუკუნის ერთ-ერთი ყველაზე პოპულარული და ცნობილი ნაწარმოებია. წიგნში ორი განსხვავებული ადამიანის სიყვარულის ისტორიას ეცნობით. მათ ყველგან თან დაჰყვებათ წარსულის აჩრდილები და საშინელი მოგონებები ომზე. მართალია, წიგნი მძიმე და მტკივნეული ემოციებით გავსებთ, მაგრამ ის სიცოცხლის სიყვარულსაც გასწავლით.

2. „ბიჭი ზოლიან პიჟამაში“ - ჯონ ბოინი

ცხრა წლის ბიჭუნა უცნაურ მეგობარს გაიჩენს, რომელიც გამუდმებით მშიერია და მავთულხლართის მეორე მხარეს ცხოვრობს. ბავშვები ვერ იგებენ, რა ხდება ზრდასრულთა სასტიკ სამყაროში, ისინი უბრალოდ ცხოვრობენ მათთან ერთად. არ არსებობს მკითხველი, რომელსაც ჯონ ბოინის საოცარი წიგნი გულს არ აუჩუყებს და უამრავ რამეზე არ დააფიქრებს.

3. „ჩემი და ბუხრის თაროზე ცხოვრობს“ - ანაბელ პიტჩერი

ოჯახში მწუხარებაა. ერთადერთი, ვინც არასდროს ტირის როჯერია. ის დარწმუნებულია, რომ ყველაფერი კარგად იქნება. ბიჭი ფიქრობს, რომ მისი და როზა, რომელიც ბუხრის თაროზე ცხოვრობს, ბედნიერებას იპოვის.

4. „სანამ ცოცხალი ვარ“ - ჯენი დაუნჰემი

მთავარი გმირი თექვსმეტი წლის არის, მაგრამ მან იცის, რომ მომავალი არც ისე ხანგრძლივია. გოგონა მძიმედ არის ავად. ის სურვილებისა და ოცნებების სიას შეადგენს, რომელთა შესრულებას გარდაცვალებამდე გეგმავს. ამ გულწრფელი რომანის წაკითხვის შემდეგ, მოგინდებათ, რომ სიცოცხლის თითოეული წამით დატკბეთ.

5. „მოუთმენლობა გულისა“ - შტეფან ცვაიგი

წიგნი უიმედო და ცალმხრივ სიყვარულზეა. საწოლს მიჯაჭვული ქალი უსაზღვროდ შეყვარებულია ოფიცერზე, რომელიც მის მიმართ მხოლოდ სიბრალულს განიცდის. ქალის სიყვარული იმდენად ძლიერია, რომ ის მამაკაცისგან საპასუხოდ არაფერს ითხოვს. ერთადერთი, რაზეც ქალი ოცნებობს - სასწაულია. მას სჯერა, რომ ფეხზე ადგომას და გავლას შეძლებს.

6. „ჩრდილების გამტაცებელი“ - მარკ ლევი

წიგნის მთავარი გმირი პატარა ბიჭია, რომელიც საოცარი უნარით არის დაჯილდოვებული. მას ჩრდილების ხმა ესმის და მათი გატაცებაც შეუძლია. ის ჩრდილებსა და მათ მეპატრონეებს მომავლის სასიკეთოდ შეცვლაშიც ეხმარება. ზრდასრულობაში ის ექიმი ხდება და საკუთარ ნიჭს დაავადებული ადამიანების სამკურნალოდ იყენებს. ერთადერთი, ვისი დახმარებაც მას არ შეუძლია, საკუთარი თავია.

7. „ოსკარი და ვარდისფერი ქალბატონი“ - ერიკ-ემანუელ შმიტი

ბიჭი, სახელად ოსკარი, სიმსივნით არის დაავადებული. საავადმყოფო მისი სახლია, ხოლო ვარდისფერი ქალბატონი ბიჭის მეორე დედაა. როდესაც ბიჭი გაიგებს, რომ მას მხოლოდ რამდენიმე დღე დარჩა, ვარდისფერი ქალბატონის რჩევით ის ერთ დღეს ათ წლად მიიჩნევს. თორმეტ დღეში ბიჭი გაზრდას, ჩამოყალიბებას, სიყვარულს და დაბერებასაც მოასწრებს.

8. „ვიღაცამ გუგულის ბუდეს გადაუფრინა“ - კენ კიზი

ციხესა და ფსიქიატრიულ კლინიკას შორის მთავარი გმირი ამ უკანასკნელს ირჩევს. ის ამაოდ ფიქრობს, რომ კლინიკაში უკეთ იქნება. მთავარი გმირი სისტემას ომს გამოუცხადებს და უკანასკნელ წუთამდე დარწმუნებულია, რომ მიზანს მიაღწევს. ეს მძიმე ისტორია ძალიან ბევრ რამეს გასწავლით და მიგახვედრებთ, რომ სიგიჟესა და ნორმალურობას შორის საზღვარი რთულად გასავლებია.

9. „წიგნის ქურდი“ - მარკუს ზუზაკი

პატარა ლიზელს რთული ცხოვრება აქვს. ის ნაცისტურ გერმანიაში ცხოვრობს. გოგონას მამას ყველა „კომუნისტად“ მოიხსენიებს. დედა კი მას და გოგონას პატარა ძმას სხვა ადამიანებს მიანდობს გასაზრდელად. ლიზელის ძმა მოულოდნელად იღუპება. გოგონას ერთადერთი ბედნიერება წიგნების კითხვაა. დაბეჭდილ სიტყვას მისთვის საოცარი ძალა აქვს.

10. ანა ფრანკის დღიური - ანა ფრანკი

ანა ფრანკი 15 წლის იყო, როდესაც ნაცისტურ ბანაკში დაიღუპა. ის 1942-დან 1944 წლამდე დღიურს აწარმოებდა. დღიურში მოზარდის ცხოვრება, ოცნებები, მომავლის გეგმები, სიყვარული და ოჯახური ცხოვრებაა აღწერილი. ამ ცოცხალი, გულწრფელი და საინტერესო წიგნის წაკითხვა საოცრად რთულია, თუმცა ჩვენი მოვალეობაა ისტორიის ბნელი ფურცლები ყოველთვის გვახსოვდეს.

მომზადებულია ​adme.ru -ს მიხედვით

თარგმნა ია ნაროუშვილმა 

წაიკითხეთ სრულად