განათლების სამინისტროს აქვს დეტალური გაიდლაინები სწავლის პროცესის წარმართვასთან დაკავშირებით

„ეროვნულ გამოცდებზე ერთ ოთახში არაუმეტეს 10 აბიტურიენტი იქნება“, - ამის შესახებ განათლების, მეცნიერების, კულტურისა და სპორტის მინისტრმა მიხეილ ჩხენკელმა განათლების ანტიკრიზისული გეგმის პრეზენტაციისას განაცხადა.

მისივე თქმით, ეროვნულ გამოცდებთან დაკავშირებით საზოგადოებას დეტალები ივნისში ეცნობება:

„ივნისში გვექნება უფრო მკაფიო და დეტალური სურათი ეპიდსიტუაციასთან დაკავშირებით. ერთადერთი, რაც შეიძლება შეიცვალოს ეროვნულ გამოცდებათან დაკავშირებით, ეს არის თარიღი. შეიძლება გამოცდების ჩატარების თარიღმა გადაიწიოს აგვისტოსკენ, იმ შემთხვევაში, თუ ეპიდსიტუაცია შეიცვლება და იქნება მკაფიო რეკომენდაცია სამედიცინო სფეროს წარმომადგენლებისგან. თუმცა დღეის მდგომარეობით, არც გამოცდის ფორმატისა და არც თარიღის ცვლილება არ განიხილება. ეს ძალიან დიდი თემაა და ივნისში გამოცდების ეროვნულ ცენტრთან ერთად გვექნება ცალკე პრეზენტაცია, სადაც მთელს საზოგადოებას ეცნობება ყველა დეტალი ეროვნულ გამოცდებთან დაკავშირებით,“ - განაცხადა მიხეილ ჩხენკელმა.

როგორც განათლების, მეცნიერების, კულტურისა და სპორტის მინისტრმა პრეზენტაციაზე აღნიშნა, გამოცდების დროს ზედმიწევნით კარგად იქნება დაცული ჯანდაცვის სფერო პროტოკოლები:

„ის, რომ გამოცდების დროს ზედმიწევნით კარგად იქნება დაცული პროტოკოლები, რომელსაც ჯანდაცვის სფერო მოგვაწოდებს, ეს ცალსახად ასეა. მაგალითად, ერთ სივრცეში, ერთ ოთახში გამოცდების ჩატარების დროს არაუმეტეს 10 აბიტურიენტი იქნება. გარდა ამისა, იქნება მთელი ნუსხა სპეციფიკური პროტოკოლისა. ივნისში, როდესაც ეროვნული გამოცდის თარიღებს გამოვაცხადებთ, პროტოკოლთან დაკავშირებით ყველა დეტალი იქნება წარმოდგენილი,“ - განაცხადა მიხეილ ჩხენკელმა.