„ძირს რომ დავწექი, ზევით დამახტა ვიღაც და გადამეფარა, რომ ტყვია არ მომხვედროდა,“- ლევან რატიანი 2008 წლის ომის მძიმე ამბებს იხსენებს

დღეს სამშაბათია და მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ამჯერად ენდოკრინოლოგ-ნუტრიციოლოგი თინათინ კაჭარავა მოგაწვდით კომპეტენტურ ინფორმაციას, როგორ ვიკვებოთ პანდემიის პირობებში.

ჩვენი მკითხველის მხრიდან არ წყდება ინტერესი, თუ როგორი უნდა იყოს კვების რაციონი არსებული კოვიდ პანდემიის პირობებში. უპირველეს ყოვლისა, უნდა აღინიშნოს, რომ სწორ, დაბალანსებულ კვებას, ვერც აქ ავუვლით მხარს. პანდემიისას განსაკუთრებით მნიშვნელოვანია ჩვენი იმუნური სისტემის გამართული მუშაობა. სასურველია, რაციონი გაჯერებული იყოს ვიტამინებით და მინერალებით. განსაკუთრებული უპირატესობა ენიჭება ვიტამინებს: D, C და მინერალ თუთიას. განვიხილოთ, რომელი პროდუქტებია მდიდარი აღნიშნული ვიტამინებით და მინერალით.

D ვიტამინი (დეტალებზე არ შევჩერდები, ​ვრცლად იხ. ჩვენი სტატია D ვიტამინთან დაკავშირებით). ყველასთვის ცნობილია, რომ D ვიტამინს ადამიანი ასინთეზირებს მზის სხივებისგან, რომელიც არის მისი ძირითადი წყარო. თუმცა არსებულ პირობებში ადამიანი უმეტეს დროს ატარებს დახურულ სივრცეში და სასურველია, მივიღოთ საკვები, რომელიც გაჯერებული იქნება D ვიტამინით. 

ესენია: 

თევზეული (კალმახი, ქაშაყი, სკუმბრია, ორაგული, თინუსი), 
​კვერცხი, 
​რძის ნაწარმი, 
​საქონლის ხორცი.

C ვიტამინი (იგივე ასკორბინის მჟავა) - არის მძლავრი ანტიოქსიდანტი, მონაწილეობს ნივთიერებათა ცვლის პროცესებში, ხელს უწყობს ორგანიზმის მიერ რკინის ათვისებას, უზრუნველყოფს იმუნური სისტემის სწორ, გამართულ ფუნქციონირებას, მოქმედებს ანთების და ალერგიის წინააღმდეგ, აჩქარებს რეპარაციულ (აღმდგენით) პროცესებს ორგანიზმში. 

C ვიტამინით მდიდარია:

ფორთოხალი,
​გრეიფრუტი,
​ასკილი, 
​კივი,
​შავი მოცხარი, 
​მწვანე ბოსტნეული, 
​მჟავე კომბოსტო, 
​კენკრა, 
​პომიდორი, 
​ყვავილოვანი კომბოსტო, 
​კარტოფილი.

თუთია - ეს არის მინერალი, რომელსაც ორგანიზმი მხოლოს საკვები პროდუქტიდან იღებს. დიდია მისი როლი იმუნური სისტემის გამართულ ფუნქციონირებაში. მას მიაწერენ, რომ იგი აფერხებს ვირუსების გამრავლების პროცესს ორგანიზმში. მისი ნორმალური დონე ორგანიზმში ამცირებს ავადობის ხანას. 

თუთიით მდიდარია: 

მზესუმზირა, 
​კაკალი, 
​თხილი, 
​გოგრის თესლი, 
​ნიორი, 
​ზღვის პროდუქტები, 
​რძის ნაწარმი.

სწორი, დაბალანსებული კვება ადამიანს დაეხმარება პრევენციული თვალსაზრისით, ხოლო თუ არის ლაბორატორიული კვლევებით დადასტურებული ვიტამინების თუ მინერალების დეფიციტი, აქ უკვე საჭიროა კონკრეტული მკურნალობა, რომელიც უნდა დაინიშნოს ექიმის მეთვალყურეობის ქვეშ.

გისურვებთ ჯანმრთელობას!​