Baby Bag

„პურისა და კარტოფილის მირთმევა ერთად არ არის კარგი კომბინაცია,“ - ლევან რატიანის რეკომენდაცია

ტელეკომპანია „რუსთავი 2“-ის გადაცემა „ექიმების“ წამყვანებმა ის საკვები პროდუქტები დაასახელეს, რომელთა ერთად მირთმევა რეკომენდებული არ არის:

„როდესაც ორგანიზმში ხვდება ჯანსაღი, დაბალკალორიული, მაგრამ ერთმანეთთან შეუთავსებელი პროდუქტები, მათი მონელება ძალიან ძნელდება და ხდება არასასარგებლო ჩვენთვის. ამ დროს ძალიან იტვირთება ჩვენი საჭმლის მომნელებელი სისტემა, წარმოიქმნება მავნე ნივთიერებები, ტოქსინები, რაც იწვევს მეტეორიზმს და შეიძლება სხვადასხვა დაავადებების და ალერგიის მიზეზიც გახდეს. გაგაცნობთ იმ პროდუქტებს, რომელთა ერთად მირთმევა არ არის რეკომენდებული.

პურისა და კარტოფილის მირთმევა ერთად არ არის კარგი კომბინაცია, ვინაიდან ორივეში ნახშირწყლები მკვეთრი სიჭარბითაა წარმოდგენილი და იწვევს საჭმლის მომნელებელი სისტემის გადატვირთვას.

მაკარონი და პომიდორი კომბინაციაში არ არის რეკომენდებული. პომიდორი შეიცავს ტუტე მჟავებს, რაც სახამებლის მონელებას უშლის ხელს. პასტაში უხვად არის სახამებელი. ამ პროდუქტების კომბინაცია იწვევს შებერილობას, მეტეორიზმს და რთულად ხდება მისი მონელება. უმჯობესია ისინი ცალ-ცალკე მივირთვათ.

პიცა და გაზიანი სასმელი ერთად არ არის რეკომენდებული. პიცაში შემავალი ნახშირწყლები ცილებთან და სახამებელთან ერთად მოსანელებლად საკმაოდ დიდ ენერგიას მოითხოვს. გაზიან სასმელში შემავალი შაქარი იწვევს მონელების პროცესის შეფერხებას, ცრუ შიმშილის შეგრძნებას გვიტოვებს, უფრო მეტ საკვებს მივირთმევთ და კუჭში გვაქვს სრული არეულობა. პიცა მივირთვათ წყალთან ერთად.

ბანანი და რძე ასევე არ უნდა მივიღოთ ერთად. მიუხედავად იმისა, რომ ძალიან გემრიელია ამ ორი პროდუქტის კომბინაცია, ის ძალიან რთულად მოსანელებელია ჩვენი კუჭისთვის. ბანანი და რძე ერთად იწვევს მეტეორიზმს და საჭმლის მომნელებელი სისტემის დიფუნქციას, ტკივილს მუცლის არეში, გულძმარვას, სიმძიმის შეგრძნებას.“

წყარო:​ „ექიმები“

შეიძლება დაინტერესდეთ

შაქრიანი დიაბეტის მართვა ბავშვებში - თემაზე ბავშვთა ენდოკრინოლოგი ნინო ხელაძე საუბრობს

შაქრიანი დიაბეტის მართვა ბავშვებში - თემაზე ბავშვთა ენდოკრინოლოგი ნინო ხელაძე საუბრობს

საახალწლო რეკომენდაციებზე შაქრიანი დიაბეტის დროს „პირადი ექიმი მარი მალაზონიას“ პირდაპირ ეთერში ბავშვთა ენდოკრინოლოგმა ნინო ხელაძემ ისაუბრა.

მისი თქმით, თუ ბავშვს შევუქმნით ძალიან სტრესულ გარემოს და ბევრ რამეს ავუკრძალავთ, შანსი იმისა, რომ ის არ დაემორჩილება წესებს, გაიზრდება. აუცილებელია ვიპოვოთ კომპრომისი და პირველ რიგში, დავიწყოთ შერჩევა პროდუქტებისა, რომელიც ჯანსაღად ჩაანაცვლებს რაფინირებულ ტკბილეულს. მაგალითად, ჩირი, ტყლაპი, ჩურჩხელა, თხილეული უკეთესი ალტერნატივაა, ვიდრე კრემიანი ნამცხვარი. 

,,ამ დროს, რა თქმა უნდა, ყველა ბავშვმა, მოზარდმა და მშობელმა უნდა იცოდეს, როგორ გაიკეთოს ინსულინი იმ მიღებული საკვების შესაბამისად (შაქრიანი დიაბეტის დროს). თუ მივიღებთ ტბილეულს, თუნდაც გოზინაყის ( მიუხედავად იმისა, რომ ფრუქტოზას შეიცავს, შემდეგ გლუკოზად გარდაიქმნება) სახით, მშობელმა სწორად უნდა დაითვალოს და სწორად გაუკეთოს ბავშვს ინსულინი, იმ საკვებზე გათვლით, რასაც იღებს. 

კიდევ ერთი კარგი ღონისძიება იქნება, რომ ბავშვმა მეტი ივარჯიშოს, ფეხით ისეირნოს, იცეკვოს და რაც მიირთვა ფიზიკური დატვირთვის სახით გამოიყენოს. დღესდღეობით, მეტნაკლებად ხელმისაწვდომია სხვადასხვა ხელოვნური დამატკბობლები, რომლითაც შესაძლებელია ტკბილეულის მომზადება. აქაც გასათვალისწინებელია, რომ მშობელმა იცოდეს რომელი დამატკბობელია უსაფრთხო ბავშვისთვის და არ გადააჭარბოს გამოყენების ლიმიტს“- აღნიშნა ნინო ხელაძემ. 

ენდოკრინოლოგმა ჰიპოგლიკემიის შესახებაც ისაუბრა. მისი თქმით, ჰიპოგლიკემია არის მდგომარეობა, რომლის დროსაც სისხლში გლუკოზის დონე ნორმაზე დაბალია. ,,შაქრიანი დიაბეტის დროს ჰიპოგლიკემიის მიზეზი შეიძლება გახდეს: მედიკამენტის დოზის გადაჭარბება, კვების რეჟიმის დარღვევა, საკვების არაადეკვატური ულუფა, გადაჭარბებული ფიზიკური აქტივობა,'' - დასძინა ნინო ხელაძემ. 

ჰიპოგლიკემიის შესაძლო ნიშნებია: ოფლიანობა, გულის ფრიალი, კანკალი, წამოცხელება, სიწითლე ან გაფითრება, მხედველობის გაორება, ტუჩების დაბუჟება. მსუბუქი ჰიპოგლიკემიის დროს, უმჯობესია გამოიყენოთ პურის პატარა ნაჭერი, ნაკლებად ტკბილი ხილი (ვაშლი), ცილოვანი საკვები (რძე ან რძის ნაწარმი). 

დაიმახსოვრეთ! - შაქრის ფხვნილი, თაფლი და საკონდიტრო ნაწარმი გამოიყენეთ მხოლოდ მძიმე შემთხვევაში და მაქსიმალური სიფრთხილით, სისხლში გლუკოზის დონის მკვეთრი მატების თავიდან ასაცილებლად - აღნიშნული რეკომენდაცია გაიცა საქართველოს პირველი არხის გადაცემაში ,,პირადი ექიმი - მარი მალაზონია''. 

„ახალი წლის პერიოდში, როდესაც ყველა ოჯახში სტუმრიანობაა და მშობლებმა შესაძლოა დიდი დრო ვერ დაუთმონ ბავშვებს. თუმცა, ფიზიკური აქტივობა ძალიან მნიშვნელოვანი ნაწილია შაქრიანი დიაბეტის მქონე ბავშვების ცხოვრებაში, ამიტომ ყველა ოჯახმა უნდა გაითვალისწინოს და ყურადღება მიაქციონ ამ საკითხს. თუ დაგეგმილია ფიზიკური აქტივობა, უნდა გაკეთდეს ნაკლები ინსულინი. ჰიპოგლიკემია შესაძლოა, განვითარდეს უშუალოდ ვარჯიშის დროსაც და ვარჯიშიდან 2 საათის მანძილზეც კი (გააჩნია ვარჯიშის ტიპს). თუ მას არ გაუკეთებია ნაკლები ინსულინი, მაშინ მეტი საკვები უნდა მიიღოს (კომბინირებული ნახშირწყლის სახით), რათა ვარჯიში დაიფაროს ნახშირწყლოვანი დატვირთვით (მაგალითად, მჭადი და ყველი ან ნადუღი). განსაკუთრებით საყურადღებოა, თუ აქტივობა მოხდა ღამე, ძილის წინ. არსებობს თანამედროვე მეთოდები, რომელიც ჰიპოგლიკემიას ხსნის, მაგალითად, ინსულინის ტუმბო, გლუკოზის მონიტორინგის სისტემა - ეს საშუალებები ძალიან დაგეხმარებათ“ - აღნიშნა ნინო ხელაძემ.

წყარო: ​,,პირადი ექიმი - მარი მალაზონია''

წაიკითხეთ სრულად