Baby Bag

ბავშვის კვების 7 პრინციპი ევგენი კომაროვსკისგან

ბავშვის კვების 7 პრინციპი ევგენი კომაროვსკისგან

ცნობილი პედიატრი ევგენი კომაროვსკი მშობლებს ბავშვის კვების 7 მთავარ პრინციპს აცნობს:

1. ნუ შექმნით კვების კულტს. უმადო ბავშვის კვება უსარგებლოა და შესაძლოა, საზიანოც იყოს მისი ჯანმრთელობისთვის. ყველაზე ხშირად ბავშვი უმადობას იმის გამო გრძნობს, რომ ენერგია სათანადოდ არ დაუხარჯავს. ბავშვის მადის გასაძლიერებლად მისი დღის ორგანიზება იმგვარად უნდა მოხდეს, რომ მან მეტად იაქტიუროს და მეტი ენერგია დახარჯოს.

2. გაითვალისწინეთ ბავშვის მხრიდან საკვებზე უარის თქმის მიზეზები. შესაძლოა, ამის უკან კბილის ტკივილი, ცუდი განწყობა ან სხვა მიზეზი დგას. უყურადღებოდ არ დატოვოთ ბავშვის ფიზიკური თუ მენტალური მდგომარეობა, რომელიც უმადობას იწვევს.

3. თუ ბავშვი ავადაა, როგორც წესი, ის კვებაზე უარს ამბობს. ეს ბუნებრივია და ნუ დააძალებთ მას საკვების მიღებას. ორგანიზმი ამ გზით ენერგიას ზოგავს, რათა ინფექციას გაუმკლავდეს. ის ცდილობს, რომ ენერგია საკვების გადამუშვებაზე არ დახარჯოს.

4. კვების რეჟიმი აუცილებლად უნდა არსებობდეს, თუმცა ის არა დროის მიხედვით, არამედ ბავშვის მადისა და საკვების მომზადების განრიგის თანახმად უნდა განსაზღვროთ.

5. ნუ აიძულებთ ბავშვს წვნიანის ჭამას. არაფერი ამყარებს მშობლების მტკიცებას, რომ აუცილებელია ბავშვმა დღეში ერთხელ მაინც მიირთვას ცხელი, წვნიანი კერძი. ათობით ქვეყანაში წვნიანს საერთოდ არ მიირთმევენ, თუმცა ბავშვები ჯანმრთელები იზრდებიან.

6. ბავშვმა ყველაზე უკეთ იცის, როდის და რამდენი უნდა მიირთვას.

7. მივცეთ თუ არა ბავშვს ტკბილეული? ბავშვს ტკბილეულის ზომიერად მიღების შესაძლებლობა უნდა მივცეთ. ტკბილის ჭარბად სიყვარული პანკრეასს საფრთხეს უქმნის ნახშირწყლების სწრაფი დაშლის გამო, თუმცა არ უნდა დაგვავიწყდეს, რომ ტკბილეული ენერგიისა და სიხარულის წყაროა. როდესაც ბავშვს ნაყინს ან სხვა ტკბილეულს აძლევთ, უნდა იფიქროთ იმაზე, თუ როგორ დახარჯავს ის მიღებულ ენერგიას.

წყარო:​ tuapsevesti.ru 

შეიძლება დაინტერესდეთ

„აუცრელმა მასწავლებელმა ნახევარი კლასი დააინფიცირა, ბავშვებმა კი ეს ინფექცია ოჯახის წევრებს გადასდეს,“ - ზაზა თელია ვაქცინაციის მნიშვნელობაზე

„აუცრელმა მასწავლებელმა ნახევარი კლასი დააინფიცირა, ბავშვებმა კი ეს ინფექცია ოჯახის წევრებს გადასდეს,“ - ზაზა თელია ვაქცინაციის მნიშვნელობაზე

დერმატო-ვენეროლოგმა ზაზა თელიამ ვაქცინაციის მნიშვნელობაზე ისაუბრა და აღნიშნა, რომ ვაქცინის გაკეთება ან მის გაკეთებაზე უარის თქმა სხვა ადამიანების ჯანმრთელობაზეც აისახება:

„დღეს ყველაზე საჭირო რამ, რაც მთელ მსოფლიოში ყველას სჭირდება, არის ეფექტური ვაქცინა. ​კვლევებმა დაადასტურა ვაქცინის უსაფრთხოება და ეფექტურობა. დღეისთვის პანდემიის წინააღმდეგ ბრძოლის ყველაზე ეფექტიან საშუალებას წარმოადგენს ვაქცინა. ავიცრებით თუ არ ავიცრებით, ამით ჩვენ შეგვიძლია ზეგავლენა მოვახდინოთ სხვა ადამიანებზეც.“

ზაზა თელიას თქმით, ბავშვებს პირბადის სწორად გამოყენება უჭირთ, სწორედ ამიტომ მნიშვნელოვანია, რომ მასწავლებლები აცრილები იყვნენ:

„ახლა იწყება სწავლა. ბავშვებს პირბადის სწორად გამოყენება გაუჭირდებათ. შესაბამისად დიდი მნიშვნელობა აქვს, რომ მასწავლებლები იყვნენ აცრილები. კალიფორნიაში არის ჩატარებული ძალიან საინტერესო კვლევა, სადაც​ აუცრელმა მასწავლებელმა ნახევარი კლასი დააინფიცირა, წინა მერხებზე მსხდომი ბავშვები. ამ ბავშვებმა ეს ინფექცია ოჯახის წევრებს გადასდეს. ჩვენ სტატისტიკურად რისკები უნდა შევაფასოთ. საზოგადოებისთვის აღქმა შეიძლება იყოს უფრო მარტივი, თუ უფრო გასაგებ ენაზე მივაწოდებთ ინფორმაციას.“

„აცრილებში ნაკლებია რისკი, აუცრელებში მეტია. რა თქმა უნდა, 100 %-იანი ეფექტურობის ვაქცინა არ არსებობს. ასევე არ არსებობს 100 %-იანი ეფექტურობის მედიკამენტი. შესაძლებელია, რომ აცრილსაც დაემართოს კოვიდი, თუმცა ამის რისკი ბევრად ნაკლებია. თუ აცრილს დაემართა, პოტენციურად შეიძლება აუცრელსაც გადასდოს. ჩვენ ვსაუბრობთ იმაზე, რომ აცრილებში რისკი ნაკლებია. ​ვირუსის გამრავლება ბევრად მეტია აუცრელ ადამიანებში. ვირუსის მუტირება უფრო მეტი ალბათობით მოხდება იმ შემთხვევაში, თუ ვირუსის გამრავლება მეტია. რაც უფრო მეტი ადამიანი აიცრება, მით უფრო ნაკლებია იმის ალბათობა, რომ მივიღოთ ახალი მუტირებული შტამი,“ - აღნიშნულ საკითხებზე დავით თელიამ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

წაიკითხეთ სრულად