„მთელი ცივილიზებული სამყარო სთხოვს პედაგოგებს 2 მიმართულებით კომპეტენციის დადასტურებას: პირველი ეს არის, პროფესიული უნარები და მეორე - საგნობრივი უნარები. მსოფლიოს საგანმანათლებლო საზოგადოება შეთანხმებულია იმაზე, რომ მასწავლებელმა პირველ რიგში უნდა იცოდეს საგანი. ცოდნა-გაცნობიერება ეს არის პირველი საფეხური. ამის შემდგომ უკვე მოდის სწავლების მიდგომები და თეორიები - როგორ მიიტანს მასწავლებელი ამა თუ იმ საკითხს მოსწავლემდე, როგორ დააინტერესებს და ჩართავს მას გაკვეთილში, ეს უკვე მეორე ნაწილია. ჩვენ ორივე მიმართულებით - როგორც საგნობრივი, ასევე პროფესიული მიმართულებით უფასოდ შევთავაზებთ პედაგოგებს ტრენინგებს. წინასწარ ვიცით, რომ ამაზე ძალიან დიდი მოთხოვნა იქნება და ცხელი ზაფხული გველოდება, ასევე ცხელი შემოდგომა.
ჩვენ გვინდა, პედაგოგების პროფესიული გადამზადება რამდენიმე მიმართულებით უფრო გავაძლიეროთ. სამი ძირითადი საკითხი, რაზედაც ვფიქრობთ, ეს არის:
1. პრაქტიკის კვლევა, რომელიც არის ძალიან ეფექტური საშუალება პედაგოგებისათვის და ითვალისწინებს კონკრეტულ კლასში არსებული პრობლემების მოგვარებიის გზებს.
2. ასევე გვინდა, რომ ყველა პედაგოგი გადამზადდეს ინკლუზიურ განათლებაში, რადგან ყოველწლიურად დაახლოებით 500-დან 700-მდე იმატებს იმ ბავშვთა რაოდენობა, რომლებიც არიან სპეციალური საგანმანათლებლო საჭიროების მქონე.
3. გვინდა, რომ სასკოლო უსაფრთხოებაში გადავამზადოთ ყველა პედაგოგი. ის პრობლემა, რაც შემდგომ ქუჩაში გადადის და ტრაგედიით მთავრდება, იწყება საკლასო ოთახში. მასწავლებელი, რაც უფრო ადრე შეამჩნევს ამ პრობლემას, მით უფრომე მეტად გვექნება საშუალება, თავიდან ავირიდოთ ტრაგედიები.“
ამის შესახებ მასწავლებელთა პროფესიული განვითარების ეროვნული ცენტრის დირექტორმა ბერიკა შუკაკიძემ საზოგადოებრივი მაუწყებლის გადაცემა „ახალ დღეში“ ისაუბრა.
„ჩვენი მიზანია, მოსწავლეები საკლასო ოთახებს დაუბრუნდნენ, თუმცა გარკვეული გამოწვევების წინაშე თუ დავდგებით, სხვა სცენარი გვექნება“
განათლების მინისტრის მოადგილის, ეკატერინე დგებუაძის განცხადებით, განათლების სამინისტრო ახალი სასწავლო წლისთვის ემზადება და სხვადასხვა მიმართულებით მუშაობს.
მისივე თქმით, განათლების სამინისტრო რეკომენდაციებს ჯანდაცვის სამინისტროსთან ათანხმებს.
რაც შეეხება გავრცელებულ ინფორმაციას, რომ სკოლებში სწავლა შესაძლოა, პირველ სექტემბერს დაიწყოს, დგებუაძე აცხადებს, რომ ჯერ კონკრეტული გადაწყვეტილება მიღებული არ არის.
„განათლების სამინისტრომ დაასრულა სასწავლო პროცესი 2019-20 წლის და დაიწყო მუშაობა ახალი სასწავლო წლისთვის მზადებისთვის. სხვადასხვა მიმართულებით ვმუშაობთ. გარდა ამისა, აქტიურად ვთანამშრომლობთ ჯანდაცვის სამინისტროსთან. იმ რეკომენდაციებს, რომლებსაც ჩვენ ვამზადებთ, ვათანხმებთ ჯანდაცვის სამინისტროსთან და შესაბამისად, განათლების სამინისტრო დღეს პროცესში იმყოფება, სხვადასხვა სცენარს ამუშავებს და სხვადასხვა მიმართულებით მუშაობს. კონკრეტული გადაწყვეტილება ჯერ მიღებული არ აქვს. შესაბამისად განათლების სამინისტრო ინფორმაციას ეტაპობრივად მოგაწვდით“,- განაცხადა დგებუაძემ.
კითხვაზე, განიხილება თუ არა დისტანციური სწავლება სექტემბრიდან, დგებუაძემ უპასუხა, რომ განათლების სამინისტრო სხვადასხვა სცენარს ამუშავებს.
„რა თქმა უნდა, განათლების სამინისტრო სხვადასხვანაირ სცენარს ამუშავებს. ჩვენ ყველაფრისთვის მზად უნდა ვიყოთ. შესაბამისად, პირველი, რაც მნიშვნელოვანია და ჩვენი მიზანია, რომ სასწავლო პროცესი დაიწყოს და მოსწავლეები დაუბრუნდნენ საკლასო ოთახებს. თუ გარკვეული გამოწვევების წინაშე დავდგებით, ჩვენ სხვადასხვა ვერსია გვექნება, რომელსაც მოსწავლეებს შევთავაზებთ“,- განაცხადა ეკა დგებუაძემ და დასძინა, რომ სწავლის დაწყების თარიღთან დკაავშირებით ჯანდაცვის სამინისტროსთან ერთად მუშაობენ და საბოლოო გადაწყვეტილება მოგვიანებით გახდება ცნობილი.
