Baby Bag

რა გზა უნდა გაიაროს მასწავლებლობის მსურველმა, რომ სქემაში უფროსი მასწავლებლის სტატუსით ჩაერთოს

რა გზა უნდა გაიაროს მასწავლებლობის მსურველმა, რომ სქემაში უფროსი მასწავლებლის სტატუსით ჩაერთოს

​მასწავლებლობის მსურველმა სკოლაში მუშაობის დასაწყებად და სქემაში უფროსი მასწავლებლის სტატუსით ჩასართავად გარკვეული აქტივობები უნდა განახორციელოს.

მასწავლებელთა პროფესიული განვითარების ეროვნული ცენტრის ინფორმაციით, მასწავლებლობის მსურველმა პირველ რიგში, საგნის გამოცდა უნდა ჩააბაროს წარმატებით.

„მასწავლებლობის მსურველმა აუცილებლად უნდა ჩააბაროს საგანის გამოცდა, 61%-იანი მინიმალური ზღვარი უნდა გადალახოს. თუ მასწავლებლობის მსურველს დიპლომში პედაგოგი უწერია, მაშინ მას აღარ მოუწევს 60-კრედიტიანი გადამზადების პროგრამის გავლა და ის უკვე ამ გამოცდით სერტიფიცირებული გახდება.

სკოლაში ვაკანსიას რომ მოიძიებს და დირექტორთან გაფორმდება ხელშეკრულება, დირექტორმა უნდა მოიწეროს მასწავლებლის სახლში წერილი, რომ ჩართონ პროფესიული განვითარების სქემაში, პედაგოგს ამ შემთხვევაში უფროსი მასწავლებლის სტატუსი მიენიჭება და ამ სახით ჩაერთვება სქემაში. სტატუსის მინიჭებას დაახლოებით ერთი თვე სჭირდება.

რაც შეეხება მათ, ვისაც დიპლომში პედაგოგი არ უწერია, საგნის გამოცდის ჩაბარებასთან ერთად, უნდა გაიარონ 60 - კრედიტიანი გადამზადების პროგრამა - შეისწავლონ ერთწლიანი პედაგოგიკის კურსი.

ამ კურსს რომ გაივლის მასწავლებლობის მსურველი და ცნობა ექნება, ჩაითვლება სერტიფიცირებულ პედაგოგად და სქემაში უფროსი მასწავლებლის სტატუსით ჩაერთვება.

აღნიშნული ეტაპების გავლა უწევთ როგორც საჯარო, ასევე კერძო სკოლაში დასაქმების მსურველებს.

შეიძლება დაინტერესდეთ

2020-2021 სასწავლო წლიდან ახალი საგანმანათლებლო პროგრამისთვის პედაგოგები გადამზადდებიან

2020-2021 სასწავლო წლიდან ახალი საგანმანათლებლო პროგრამისთვის პედაგოგები გადამზადდებიან

საქართველოს განათლების, მეცნიერების, კულტურისა და სპორტის მინისტრის მიხეილ ჩხენკელის ინიციატივით, სკოლებში „Minecraft Education Edition“-ის საპილოტედ დანერგვის პროცესი მიმდინარეობს. პროექტი, რომელიც „Microsoft საქართველოსთან“ თანამშრომლობითა და კომპანიის „Mindworks Education“ ჩართულობით ხორციელდება, პირველ ეტაპზე ახალი სკოლის მოდელში ჩართული სკოლების სასწავლო პროცესში „Minecraft Education Edition“-ის პილოტირების რეჟიმში ინტეგრირებას გულისხმობს.

როგორც საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა დააანონსა, ახალი სასწავლო წლიდან 150-ზე მეტ სკოლაში საპილოტე რეჟიმში მაიკროსოფტის საგანმანათლებლო პროგრამა „Minecraft Education Edition“ სასწავლო პროცესს უფრო მრავალფეროვანსა და საინტერესოს გახდის.

„Minecraft Education Edition“ – თამაშზე დაფუძნებული საგანმანათლებლო პლატფორმაა, რომელსაც სკოლის პედაგოგები სხვადასხვა საგნის სწავლების დროს იყენებენ. იგი ხელს უწყობს მოსწავლეებში სივრცითი, ლოგიკური და შემოქმედებითი უნარების, ასევე კრიტიკული აზროვნების განვითარებას. ეს არის ღია სასწავლო გარემო, სადაც მოსწავლეებს შეუძლიათ იყვნენ შემოქმედებითები, ჩაატარონ ექსპერიმენტები და იმუშაონ პრობლემების მოგვარებაზე. „Minecraft Education Edition“ იდეალური პროგრამაა მოსწავლეებთან კომპლექსურ დავალებებზე სამუშაოდ. მისი გამოყენება შესაძლებელია ნებისმიერ საგანში ცალკე ან ინტეგრირებულად.

განათლების, მეცნიერების, კულტურისა და სპორტის სამინისტროს ინფორმაციით, პროგრამის დანერგვის პირველი ეტაპი პედაგოგების გადამზადებას გულისხმობს.

„ახალი სკოლის მოდელში ჩართულმა სკოლებმა ნებაყოფლობით თითო მასწავლებელი წარადგინეს, რომელებიც მონაწილეობას იღებენ Minecraft-ის დანერგვის სწავლების დისტანციურ კურსში. პედაგოგებს უტარდებათ ყოველკვირეული ონლაინ ტრენინგები, ექსპერტებთან ერთად გეგმავენ სასწავლო აქტივობებს, რომლებსაც კლასებში საპილოტე რეჟიმში განახორციელებენ და შემდეგ თავიანთ გამოცდილებას პროექტში ჩართულ პედაგოგებს გაუზიარებენ.

პროექტის დანერგვის პირველი ეტაპის დასრულების შედეგად, სისტემაში იქნებიან გადამზადებული მასწავლებლები, რომლებსაც თავისუფლად შეეძლებათ „Minecraft Education Edition“-ის სხვა სკოლებში დანერგვაში მიიღონ მონაწილეობა. ასევე, მომზადდა სატრენინგო მასალები, ქართულად ითარგმნა ვიდეო-კურსი, რომელიც ნებისმიერ მასწავლებელს შეასწავლის Minecraft-ის ბაზისებს და მოამზადებს უფრო სიღრმისეული დავალებებისთვის, გადამზადდნენ ქოუჩები და ექსპერტები. ეს ყველაფერი კი ხელს შეუწყობს სასწავლო პროცესში „Minecraft Education Edition“-ის ეფექტიანად ინტეგრირებას,“ - აღნიშნულია განათლების, მეცნიერების, კულტურისა და სპორტის სამინისტროს მიერ გავრცელებულ ინფორმაციაში.

წაიკითხეთ სრულად