Baby Bag

ონლაინ კონფერენცია მასწავლებლებისთვის - იხილეთ დეტალები

ონლაინ კონფერენცია მასწავლებლებისთვის - იხილეთ დეტალები
მასწავლებლები

გიმნაზია „შავნაბადა“ მასწავლებელთა პროფესიული განვითარების ეროვნულ ცენტრთან ერთად აცხადებს მასწავლებელთა ონლაინკონფერენციის მონაწილეთა რეგისტრაციას.

კონფერენცია, სახელწოდებით „დისტანციური სწავლების გამოწვევები, პრობლემები და მიღწევები“, გაიმართება 2020 წლის 13 ივნისს, ონლაინ რეჟიმში, ზუმის (Zoom) ონლაინ პლატფორმის გამოყენებით.

კონფერენციის მიზნები:

  • დისტანციურ სწავლებაში მასწავლებელთა საუკეთესო პედაგოგიური გამოცდილებისა და წარმატებული პრაქტიკის გაზიარების ხელშეწყობა;
  • დისტანციური სწავლების პროცესებში ახალი მიდგომების, სტრატეგიებისა და სასწავლო რესურსების მიმართულებით ცოდნისა და გამოცდილების გააქტიურება;
  • დისტანციური სწავლების პროცესებში ინკლუზიური განათლების მიმართულებით გამოცდილების გაზიარება.

მოსალოდნებლი შედეგი:

მასწავლებლებს შესაძლებლობა მიეცემათ დისტანციური სწავლების საუკეთესო გამოცდილების საფუძველზე, საკუთარი სასწავლო პრაქტიკა მაქსიმალურად მრავალფეროვანი, თანამედროვე მოთხოვნებთან შესაბამისი და პროდუქტიული გახადონ.

მიზნობრივი ჯგუფი:

საჯარო და კერძო სკოლების ყველა დაინტერესებული მასწავლებელი, ფსიქოლოგი/სპეც.პედაგოგი.

კონფერენციის ჩატარების ეტაპები და ვადები

I. კონფერენციის სარეგისტრაციო განაცხადისა და აბსტრაქტის გადმოგზავნის ბოლო ვადა - 20.05.2020

II. აპლიკანტებისათვის აბსტრაქტის განხილვის შედეგები ცნობილი გახდება 25.05.2020

III. აპლიკანტის მიერ საკონფერენციო თემისა და საპრეზენტაციო მასალის დასრულებული ვერსიის გადმოგზანის საბოლოო ვადა - 08.06.2020

IV. კონფერენციის გახსნა - 13.06.2020

კონფერენცია იმუშავებს 4 სექციად:

1) ტექნიკური უზრუნველყოფა და სასწავლო ინტერნეტპროგრამები დისტანციურ სწავლებაში

2) მოსწავლეთა ჩართულობა და მოტივაცია

3) სასწავლო პროცესის გაციფრულება და ფსიქოლოგიური ფონი

4) სსსმ მოსწავლეები და დისტანციური სწავლება

კონფერენციაში მონაწილეებს ვთავაზობთ თემებს, რომლებიც, სავარაუდოდ, დააინტერესებს სასკოლო საზოგადოებას, თუმცა, ეს არ არის ვალდებულება და აუცილებელი პირობა. ქვემოთ მოცემული ჩამონათვალი ხელს შეუწყობს მასწავლებლებს, შეარჩიონ ან თავად შემოგვთავაზონ ის საკითხები/თემები, რომელი მიმართულებითაც მზად არიან თავიანთი გამოცდილება გაუზიარონ სხვებს.

საკონფერენციო თემატიკა

  1. დისტანციური სწავლების პროცესში ტექნიკური და სასწავლო პროგრამების მიმართულებით გამოცდილებისა და მიღწევების გაზიარება;
  • ტექნიკური აღჭურვილობა, პროგრამული უზრუნველყოფა და ხარისხიანი ინტერნეტი - პრობლემები და მათი გადაჭრის გზები
  • დისტანციური სწავლების პროცესში ახალი ვირტუალური სასწავლო პროგრამების ხელმისაწვდომობა, გამოყენება და გამოწვევები.
  1. დისტანციური სწავლების პროცესში მოსწავლეთა ჩართულობის, მოტივაციისა და სწავლების მეთოდების, სტრატეგიების, მიდგომების გაზიარება;
  • ონლაინ სწავლება და კლასის ორგანიზების ფორმები;
  • პროექტებით სწავლება დისტანციურად;
  • მულტიმედიური რესურსის ეფექტური გამოყენება დისტანციური სწავლების დროს;
  • განმავითარებელი შეფასება დისტანციური სწავლების პირობებში;
  • წიგნიერების უნარების განითარება დისტანციური სწავლების დროს;
  • მოსწავლეთა დამოუკიდებელი სწავლის (სწავლის სწავლა) ხელშეწყობა დისტანციური სწავლების პირობებში;
  • წერითი უნარების განვითარებაზე ზრუნვა დისტანციური სწავლების პირობებში;
  • კომპლექსური დავალებები, როგორც თემის/საკითხის შეჯამების საშუალება და მისი ეფექტური გამოყენება დისტანციურ სწავლებაში;
  • მოსწავლეთა შემოქმედებითი უნარების განვითარების ხელშეწყობა დისტანციური სწავლების დროს;
  • და ა.შ.
  1. გამოცდილების გაზიარება დისტანციური სწავლების პროცესში თანხმლები სტრესის გადაჭრის გზებში (მოსწავლეებსა და მასწავლებლებში);
  • ადაპტაცია ციფრულ სივრცეში და შექმნილი ფსიქოლოგიური ფონი - პრობლემები და გადაჭრის გზები;
  • პედაგოგთა, მოსწავლეთა და მშობელთა თანამშრომლობა/მხარდაჭერა დისტანციურად;
  • მოსწავლეთა უფლებები და გამოწვევები ონლაინ საგაკვეთილო

პროცესში.

  • ონლაინ სწავლება - აღქმა და განწყობა.
  1. დისტანციური სწავლების პროცესში ინკლუზიური განათლების მიმართულებით გამოცდილებების გაზიარება.
  • განსაკუთრებული საჭიროების მქონე მოსწავლეების ადაპტაცია ონლაინ საგაკვეთილო პროცესში;
  • განსაკუთრებული საჭიროების მქონე მოსწავლეების ქცევის მართვა ონლაინ სასწავლო პროცესში;
  • სსსმ მოსწავლეების ჩართვა და სოციალიზაცია დისტანციური სწავლების პროცესში;
  • ონლაინ სწავლების დადებითი და უარყოფითი მხარეები ინკლუზიურ განათლებაში;
  • სპეც.მასწავლებლის როლი ონლაინ სწავლების პროცესში.

მოთხოვნები:

  • კონფერენციაში მონაწილეობის მისაღებად მონაწილეს უნდა ჰქონდეს ხარისხიანი ინტერნეტი, ვიდეოთვალი, მიკროფონი და აქტიურებული მომხმარებელი ზუმის (Zoom) ელექტრონულ პლათფორმაში;
  • აპლიკანტებმა პირველ ეტაპზე უნდა გამოაგზავნონ მოხსენების ერთგვერდიანი ანოტაცია (აბსტრაქტი), სადაც აღწერილი იქნება წარმოდგენილი გამოცდილება;
  • აპლიკანტის ნაშრომი თავსებადი უნდა იყოს ზოგადი განათლების ეროვნულ მიზნებთან, საგნობრივ სტანდარტებსა და კონფერენციის მიზნებთან;
  • შესაძლებელია, ორმა პედაგოგმა წარმოადგინოს ერთობლივი ნამუშევარი (სერთიფიკატი გადაეცემა ორივე მონაწილეს ინდივიდუალურად);
  • საკონფერენციო ნაშრომი უნდა ეფუძნებოდეს მომხსენებლის მიერ 2019-2020 სასწავლო წელს მეორე სემესტრში დისტანციურ სასწავლო პროცესში მიღებულ გამოცდილებას;
  • კონფერენციის მონაწილის ნაშრომის პრეზენტაციის რეგლამენტი - 8 - 10 წუთი, დებატები - 5 წუთი.
  • საპრეზენტაციო პროგრამა - PowerPoint ან აპლიკანტისთვის სასურველი სხვა პროგრამა;
  • კონფერენციის საორგანიზაციო კომიტეტი უფლებამოსილია, არ განიხილოს
  • აპლიკანტი, რომელიც არ აკმაყოფილებს ზემოთ მოცემულ მოთხოვნებს;
  • ერთი მონაწილის მიერ წარმოდგენილი ერთზე მეტი ნაშრომი;
  • გუნდური (ორზე მეტი პირის მიერ წარმოდგენილი) ნაშრომი;
  • დაგვიანებით წარმოდგენილი ნაშრომი.

აბსტრაქტი უნდა მოიცავდეს:

  • თემის სახელწოდებას;
  • შესავალს (პრობლემის/საკითხის აღწერა);
  • ძირითადი ნაწილს (განხორციელებული სამუშაოები/აქტივობები, მეთოდები და პროცესის მოკლე აღწერა);
  • დასკვნას;
  • გამოყენებულ ლიტერატურას (საავტორო უფლებების დაცვის მიზნით, იმ შემთხვევაში, თუ აპლიკანტმა გამოიყენა სხვისი ნაშრომი, აუცილებელია, მიუთითოს ავტორი და თავად ნაშრომის სახელწოდება).

აბსტრაქტი გამოგზავნეთ ელექტრონულ მისამართზე: [email protected]

აბსტრაქტის გამოგზავნისას აპლიკანტებმა უნდა მიუთითონ შემდეგი მონაცემები:

  • სახელი და გვარი
  • ტელეფონის ნომერი
  • რეგიონი, რაიონი, სკოლა
  • საგანი
  • სათაურის ველში - თემის სახელწოდება.

ნამუშევრის ტექნიკური მახასიათებლები:

ტექსტის შრიფტი - Sylfaen; ზომები - ნაშრომის სახელწოდება - 14 Bold, ძირითადი ტექსტი - 12, ინტერვალი - 1.5.

შენიშვნა: კონფერენცის მონაწილეთათვის გაიცემა სსიპ მასწავლებელთა პროფესიული განვითარების ეროვნული ცენტრისა და გიმნაზია „შავნაბადას“ დირექტორების მიერ დამოწმებული სერთიფიკატი.

მომხსენებლებს შეარჩევს კვალიფიციური სპეციალისტებისგან დაკომპლექტებული კომისია.

დამატებითი ინფორმაციისთვის დაუკავშირდით პროექტის საორგანიზაციო კომიტეტს ელექტრონულ მისამართზე:

[email protected]

[email protected]

ან ნომერზე: 598 588 859

განათლება #მასწავლებელი #ონლაინსწავლება

შეიძლება დაინტერესდეთ

განათლება

​„ჯარისკაცი განათლების სისტემაში“ - წარმატებული დირექტორის წარმატების ფორმულა

​„ჯარისკაცი განათლების სისტემაში“ - წარმატებული დირექტორის წარმატების ფორმულა

საუბარს საკუთარი ისტორიით იწყებს, იმ გზით, თუ როგორ მივიდა გადაწყვეტილებამდე - გამხდარიყო სკოლის დირექტორი. მაშინ მტკიცედ სწამდა, რომ ცვლილებების მოხდენა შეეძლო. „დავინახე და ვიგრძენი, რომ რეფორმების წარმატებით განხორციელებაში დირექტორების როლი ძალიან მნიშვნელოვანია, რადგან რეფორმების მთავარი ღერძი ხომ სკოლაა“ - ეს სიტყვები დღეს უკვე ბევრს ნიშნავს, რადგან ის ​საქართველოს ყველაზე წარმატებულ​ი სკოლის ყველაზე წარმატებულ დირექტორს, ლენა გომართელს ეკუთვნის.

პროფესიით მასწავლებელია, გერმანისტი, რომელსაც ეს პროფესია საკუთარმა გერმანულის მასწავლებელმა შეაყვარა და სწორედ მისი ხათრით გადაწყვიტა ამ სფეროს გაჰყოლოდა. შემდეგ იყო სხვადასხვა სამსახური, უმაღლეს დაწესებულებებში, სკოლებში, რესურსცენტრში, თუმცა ჩვენი ამბავი იმ დღიდან იწყება, როდესაც ჩვენი ისტორიის მთავარმა გმირმა ქალბატონმა 2014 წელს მტკიცედ გადაწყვიტა დირექტორობა და საჩხერის N2 საჯარო სკოლის კარები შეაღო.

„ვფიქრობ, რომ დირექტორობა ძალიან საინტერესო საქმიანობაა. ამ სფეროში ადამიანს შეუძლია ყველა მხრივ რეალიზება, საკუთარი უნარების, განათლების წარმოჩენა. სკოლა გვაძლევს ჩვენ საშუალებას, რომ აღმოვაჩინოთ ლიდერები, საკუთარ თავში, პედაგოგებში და მოსწავლეებშიც. ეს სფერო მე მაძლევს იმის შესაძლებლობას, რომ მოსწავლეები გავზარდო პროფესიულად და დავაყენო სწორ გზაზე. ამაზე უკეთესი, რა შეიძლება მოხდეს?!“ - ამბობს ლენა გომართელი და საკუთარ წარმატებებზე დაუზარელად გვიყვება.

მისი თქმით, სკოლა საუკეთესო ასპარეზია იმისთვის, რომ თითოეული მასწავლებლის, მშობლისა და მოსწავლის ცხოვრება სიკეთისკენ შეცვალო. მართალია, თავიდან ეს პროცესი ცოტათი რთული იყო, რადგან დირექტორობა კომპლექსურ ცოდნა მოითხოვს, თუმცა მის პროფესიულ კარიერაში გამოჩნდა „ათასწლეულის გამოწვევის ფონდი“ და ლიდერობის სამწლიანი აკადემია, რომელმაც ძალიან დიდი როლი ითამაშა მისი, როგორც დირექტორის ჩამოყალიბებაში.

„აკადემიაში სწავლის დროს, მივიღე ძალიან დიდი ცოდნა მართვისა და ლიდერობის კუთხით. ამ პერიოდში, თუ კი, რამე პროექტი დავგეგმეთ და განვახორციელეთ, ეს სწორედ ამ აკადემიის, მისი ტრენერებისა და იმ ცოდნის დამსახურებაა, რომელსაც დაუზარებლად გვიზიარებდნენ იქ“ - ჰყვება წარმატებული დირექტორი და იმ გუნდის შექმნის პერიოდს იხსენებს, რომელმაც საქართველოს საუკეთესო სკოლა აჩუქა.

„სკოლის წარმატება გუნდზეა დამოკიდებული. ნებისმიერი პროექტი, რომელიც სკოლაში და ან მის გარეთ ხორციელდება, დირექტორისა და მასწავლებლების ერთობლივი მუშაობის შედეგია. მე არ მიცდია, რომ გარედან მომეყვანა ახალი პედაგოგები, თუმცა კი, იყო კადრების ცვლილებაც, მაგრამ ეს მოხდა ძალიან ობიექტურად და გამჭვირვალედ. მე მაქსიმალურად ვეცადე, რომ ის გუნდი, რომელიც დამხვდა სკოლაში, განმევითარებინა, მინდოდა, რომ მათი მონაწილეობით მიმეღწია წარმატებებისთვის და ეს ასეც მოხდა. მათი შესაძლებლობები შევისწავლე და ჩვენი სკოლის ყველა სამომავლო გეგმა ჩამოვაყალიბე მათ ძლიერ მხარეებზე დაყრდნობით. წარმატებული სკოლაც ამ პრინციპზე დგას - ყველა აკეთებს თავის საყვარელ საქმეს თავისი შესაძლებლობების მაქსიმუმის ფარგლებში, ხოლო წარმატებული დირექტორი კი ამ პროცესს უზრუნველყოფს და ეხმარება მათ ახალი შესაძლებლობების აღმოჩენაში, განვითარებასა და განხორციელებაში“.

რა თქმა უნდა, მკითხველს დააინტერესებს, თუ რითია გამორჩეული საჩხერის N2 საჯარო სკოლა და რატომ მიიღო მან საქართველოში საუკეთესო სკოლის სტატუსი. ამ კითხვაზე პასუხის გაცემის დროს ლენა გომართელი „მსოფლიო განათლების კონკურსს“ იხსენებს, სადაც ზუსტად მსგავსი კითხვა დაუსვეს და სთხოვეს, გამოეყოთ ხუთი მიმართულება, რომელიც მათ სკოლას გამორჩეულს ხდიდა.

„პირველი და ყველაზე მნიშვნელოვანი მიმართულება არის უცხო ენების გაძლიერებული სწავლება. სკოლაში არსებულმა ადამიანურმა რესურსმა მე მომცა შესაძლებლობა, რომ უფრო გამეძლიერებინა უცხო ენების სწავლება და ჩვენ ახლა მოსწავლეებს ვთავაზობთ არა მხოლოდ სასწავლო მასალებს, არამედ სხვადასხვა ლიტერატურას, სავარჯიშოებს, დავალებებს, რესურსებს. უცხო ენების მიმართ მსგავმა ყურადღებამ კი ჩვენ შესაძლებლობა მოგვცა, სხვა მიმართულებებიც გაგვეძლიერებინა და ამჯერად პრიორიტეტი საბუნებისმეტყველო მეცნიერებები აღმოჩნდა. STEM-ის ფარგლებში ბევრ კონკურსში მივიღეთ მონაწილეობა, ბევრი გრანტი მოვიპოვეთ და სკოლაში რობოტექნიკის კლუბიც კი დავაარსეთ. მესამე მიმართულება პროფესიულ განათლებას უკავშირდება, რომელიც სკოლის ინოვაციაა. დღეს ჩვენს სკოლაში მოსწავლეები შვიდი მიმართულებით (მზარეულის, კონდიტერის, დიზაინერის, ელექტრიკოსის, IT სპეციალისტის, დურგლისა და ექთანის საგანმანათლებლო პროგრამები) ეუფლებიან პროფესიას. ეს საშუალებას გვაძლევს, რომ მათ საკლასო ოთახებში მიღებული ცოდნა პრაქტიკაში გამოიყენონ. მეოთხე მიმართულება მშობლების განათლებას ეხება. ჩვენი სკოლა „ახალი სკოლის მოდელში“ ჩაერთო, რომლის ფარგლებშიც მშობელთა საჭიროებები ვიკვლიეთ და აქედან გამომდინარე, სკოლაში „მშობელთა სკოლა“ დავაარსეთ. ამ სკოლაში ჩვენ მშობლებს ვუტარებდით ტრენინგებს, ვებინარებს, შეხვედრებს, რა თქმა უნდა, მათ საჭიროებებზე მორგებულს. ბოლო, მეხუთე მიმართულებად უნდა დავასახელო მდგარდი განვითარების მიზნების განხორციელებისკენ გადადგმული ნაბიჯები. მთავარი აქცენტი კეთდება იმ 17 მიზანზე, რომელიც 2030 წელს უნდა ჰქონდეს მსოფლიოს და რაც კი სკოლაში პროექტი ხორციელდება, ვცდილობთ, რომ სწორედ ამ მიზნებს იყოს მორგებული და მათი დანერგვისკენაა მიმართული“ - განმარტავს ლენა გომართელი.

სამომავლო მიზნებზე საუბრისას დირექტორი აქცენტს ისევ უცხო ენებსა და საბუნებისმეტყველო მიმართულებების გაძლიერებულ სწავლებაზე აკეთებს და გვეუბნება, რომ სწორედ ამ გზით აპირებს სკოლა განვითარებას. მას არც ახალბედა დირექტორები და ის ახალგაზრდები ავიწყდება, რომლებიც ამ პროფესიაში აპირებენ შემოსვლას და მათ საკუთარ გამოცდილებაზე დაყრდნობით რჩევებს უზიარებს:

„ჩვენ ჩვენი მაგალითით უნდა ვაჩვენოთ ახალგაზრდებს, რომ სკოლა არის შესაძლებლობა, შესაძლებლობა, იყო წარმატებული, როგორც საშინაო, ისე, საგარეო ასპარეზზე. თუ ჩვენ გვინდა, რომ ჩვენი ქვეყანა იყოს ძლიერი, პირველ რიგში, სკოლა უნდა იყოს ძლიერი და სკოლის სიძლიერეს კი ის ახალგაზრდები განაპირობებენ, რომლებიც უნდა დაბრუნდნენ ამ სისტემაში. მათ არ უნდა შეეშინდეთ, კი, რთულია, ამხელა ადამიანური რესურსის მართვა, ამდენი საქმე, დამღლელია, თუმცა არა შეუძლებელი. თუ ახალგაზრდები სწორ ნაბიჯებს გადადგამთ, ჩათვალეთ, რომ თქვენ თქვენი ქვეყნის სწორ განვითარებას უწყობთ ხელს“.

ბოლოს, ჩვენი ისტორიის მთავარი შემოქმედი დასძენს, რომ ამ საქმეს, რომელსაც წლებია ემსახურება, დიდი ენთუზიაზმიც ახლავს თან და ეს დასაწყისიდანვე უნდა იცოდეს ყველამ, ვისაც მასწავლებლობა ან დირექტორობა მოუნდება.

„ჩვენ ვიცით, რომ განათლების სისტემაში ბევრი პრობლემაა, თუმცა თუ შენ იქნები ყოჩაღი და მონდომებული, ყველაფერს შეძლებ. მე არ მიყვარს წუწუნი, მით უმეტეს მუდმივად და სწორედ ამიტომ, არც ერთ შანსს არ ვუშვებ ხელიდან, რასაც ეს საქმიანობა მთავაზობს. ჩვენ ვმუშაობთ დაუზარელად, ვუმკლავდებით პრობლემებს და გვაქვს ბერკეტი, მაქსიმალურად გამოვავლინოთ ჩვენი შესაძლებლობები, აი ესაა ჩვენი წარმატება“ - განმარტავს ლენა გომართელი.

უკვე თითქმის ერთი თვე გავიდა, რაც საქართველოს საუკეთესო სკოლის ტიტულს საჩხერის N2 საჯარო სკოლა, ხოლო წარმატებული დირექტორისას - ლენა გომართელი, ატარებს. როგორც ჩანს, ეს მხოლოდ დასაწყისია, რადგან წარმატებულ დირექტორს წინ უფრო დიდი გზა ელოდება, დიდი გეგმებითა და მიზნებით, წარმატებული გზა - „განათლების სისტემის ჯარისკაცობამდე“. 
​
ავტორი: მარიამ გვარამია
​

წაიკითხეთ სრულად
გასათიშად დააჭირეთ ESC.