„გარე დაკვირვების წესის დამტკიცების შესახებ“ ბრძანებაში ცვლილებაა. შესაბამისი დოკუმენტი, რომელსაც განათლების, მეცნიერების, კულტურისა და სპორტის მინისტრი მიხეილ ჩხენკელი აწერს ხელს, საკანონმდებლო მაცნეში დღეს, 13 მაისს გამოქვეყნდა.
ბრძანების თანახმად, იმ მასწავლებლებს, რომლებმაც 2020 წლის 2 მარტიდან ზოგადსაგანმანათლებლო დაწესებულებებში სასწავლო პროცესის შეჩერების გამო ვერ შეძლეს გარე დაკვირვების გავლა, უფლება აქვთ გარე დაკვირვებაზე რეგისტრაცია გაიარონ 2020-2021 სასწავლო წლის განმავლობაში.
ამასთან, როგორც ბრძანებაშია აღნიშნული, მასწავლებლებისთვის გარე დაკვირვებაზე რეგისტრაციის გავლის ვადები და შესაბამისად, გარე დაკვირვების გავლის ვადები განისაზღვრება მასწავლებელთა პროფესიული განვითარების ეროვნული ცენტრის დირექტორის ინდივიდუალური-ადმინისტრაციული სამართლებრივი აქტით.
,,დღეს რომ იყოს სექტემბერი, ჩვეულებრივ რეჟიმში დავიწყებდით სწავლას''
ჯანდაცვის მინისტრმა ეკატერინე ტიკარაძემ ეპიდსიტუაციისა და სავარაუდო მეორე ტალღის შესახებ ,,იმედის დილის'' ეთერში ისაუბრა. მინისტრი სექტემბერში სწავლის განახლების საკითხსაც შეეხო და აღნიშნა, რომ დღეს რომ იყოს სექტემბერი, სწავლა ჩვეულებრივ რეჟიმში დაიწყებოდა:
,,იმ ეპიდსიტუაციიდან გამომდინარე, რაც დღეს გვაქვს, ვფიქრობთ, რომ სწავლა განახლდება. თუმცა ჯერ კიდევ სამი თვე გვაქვს წინ და ამ სამ თვეში როგორ განვითარდება მოვლენები არ ვიცით. ჩვენ უნდა ვისწავლოთ ვირუსთან სწორი ქცევა და შემდეგ მისი მართვა, თორემ შემოდგომასა და ზამთარში მასთან ერთად ცხოვრება გაგვიჭირდება. დღეს რომ იყოს სექტემბერი, ჩვეულებრივ რეჟიმში დავიწყებდით სწავლას,'' - აღნიშნა მინისტრმა.
