ჩრდილოეთ კაროლინის უნივერსიტეტის პროფესორი კორტნი ჰარინგტონი, რომელიც ონლაინ სწავლების ორი წარმატებული პროგრამის ავტორია, მასწავლებლებს საინტერესო რჩევებს აძლევს. ვირტუალურ რეჟიმში სწავლება ყველა პედაგოგისთვის მარტივი არ არის. მასწავლებლებს ბავშვებისთვის ცოდნის გადაცემა სრულიად ახალ და ბევრი მათგანისთვის უცხო პირობებში უხდება. პედაგოგების დიდ ნაწილს მოსწავლეებთან ვირტუალურ რეჟიმში კომუნიკაცია უჭირს და არ იცის, როგორი მიდგომები ან სტრატეგიები გამოიყენოს, რათა სწავლის პროცესი უფრო ნაყოფიერი და ეფექტური გახადოს.
მასწავლებლებს, რომლებსაც დისტანციურ სწავლებასთან აქამდე შეხება არ ჰქონიათ, პროფესორ კორტნი ჰარინგტონის საინტერესო რჩევებს ვთავაზობთ. კორტნი ჰარინგტონის მიერ შექმნილი ორივე პროგრამა ასინქრონულ ვირტუალურ სწავლებას ეფუძნება. თუ გსურთ, რომ დისტანციური სწავლება ნაყოფიერი და წარმატებული იყოს, მისი რჩევები აუცილებლად გაითვალისწინეთ.
სწავლების პროცესი მაქსიმალურად გაამარტივეთ
ონლაინ სასწავლო პროგრამები ძალიან მრავალფეროვანია. თუ მათ საფუძვლიანად შეისწავლით, აღმოაჩენთ, რომ სწავლის პროცესის მიმდინარეობისას სხვადასხვა პროგრამული ფუნქციის გამოყენება შეგიძლიათ, თუმცა, პირველ ეტაპზე, მსგავსი მცდელობებისგან თავი მაქსიმალურად უნდა შეიკავოთ. მოსწავლეები პროგრამაში გარკვევას თავადაც ცდილობენ. მათ ბაზისური ცოდნა უნდა მისცეთ, თუ როგორ უნდა იმუშაონ დისტანციურ რეჟიმში. ნუ ეცდებით ბავშვების დატვირთვას ზედმეტი ტექნიკური საკითხებით. სწავლის ვირტუალურ რეჟიმზე გადასვლა მათთვისაც ისეთივე დამაბნეველია, როგორც თქვენთვის. ამიტომ ეცადეთ, სწავლის პროცესი მაქსიმალურად გაამარტივოთ.
შეცვალეთ პრეზენტაციის მეთოდები
ორშაბათს და ოთხშაბათს დილის 10 საათზე ვიდეო გაკვეთილის ჩატარება, როგორც ამას საკლასო ოთახში აკეთებდით, შესაძლოა, ნაყოფიერი სულაც არ იყოს. ეცადეთ, ბავშვებს მასალაზე წვდომა გაუმარტივოთ. ჩაწერეთ მოკლე ვიდეო ლექციები, მოსწავლეებს აუდიო მასალები მიაწოდეთ, რომელთა გადმოწერას და მოსმენას შეძლებენ, აუტვირთეთ ფოტოები, რომლებიც საკლასო ოთახში დაფაზე დახაზულ ან დახატულ ვიზუალურ მასალას ჩაანაცვლებს. აუცილებლად ჰკითხეთ ბავშვებს, თუ რომელ საათზე ან დღის რომელ მონაკვეთში იქნება მათთვის ონლაინ გაკვეთილების ჩატარება კომფორტული და მისაღები. თქვენი სწავლების მეთოდების შეცვლა აუცილებლად მოგიხდებათ. ვირტუალური გაკვეთილები თქვენგან განსხვავებულ მიდგომებს მოითხოვს, რაც სწავლების პროცესს უფრო ნაყოფიერს და ეფექტურს ხდის.
გააანალიზეთ, რა მეთოდებით შეაფასებთ მოსწავლეთა ცოდნის დონეს
ონლაინ გამოცდების ჩატარების გარდა, მოსწავლეების ცოდნის დონის შეფასება სხვა გზებითაც შეგიძლიათ. ამ მხრივ ერთ-ერთი ყველაზე ეფექტური მეთოდი დისკუსიების გამართვაა. ბავშვებს კარგად აუხსენით, თუ რა მოლოდინები გაქვთ. მოსწავლეებისადმი პატივისცემა გამოიჩინეთ, თუმცა კითხვების დასმას არ უნდა მოერიდოთ. კრიტიკულობა, შესაძლოა, ძალიან გამოგადგეთ. მოსწავლეების აზროვნების წასახალისებლად, ისინი ახალი გამოწვევების წინაშე ხშირად დააყენეთ. თქვენი მიზნები მკაფიოდ უნდა განსაზღვროთ. აუცილებლად უნდა იცოდეთ, თუ რას ელით მოსწავლეებთან გამართული დისკუსიის დასასრულს. თუ ბავშვებს ზუსტად ეცოდინებათ, რა გსურთ, დისკუსიები საოცრად კარგ შედეგს გამოიღებს.
გამოიჩინეთ მოქნილობა, როგორც მოსწავლეების, ასევე საკუთარი თავის მიმართ
მოსწავლეები ძალიან დაბნეულები არიან, რადგან განათლების მიღება სრულიად ახალ გარემოში უწევთ. ზოგიერთ მათგანს სახლში ხარისხიანი ინტერნეტი ან კომპიუტერიც კი არ აქვს. შესაძლოა, ყველა მოსწავლემ, რომელიც თქვენს კლასში ირიცხება, სახლიდან ვიდეო გაკვეთილებში მონაწილეობის მიღება ვერ შეძლოს. ამ მხრივ გადაჭარბებული მოლოდინები ნუ გექნებათ. თუ მოსწავლეები იგრძნობენ, რომ თქვენ ძალიან გადაღლილი და გადატვირთული ხართ, ისინიც დაიძაბებიან. ეცადეთ, ყველაფერს უფრო მსუბუქად შეხედოთ. ვირტუალურ სწავლებაზე გადასვლა გარკვეული ხარვეზებით მიმდინარეობს და ეს ნორმალურია. თქვენ ასეთ რეჟიმში გაკვეთილებს პირველად ატარებთ, შესაბამისად შეცდომებისგან დაზღვეული ვერ იქნებით. არაფერია, თუ ყველაფერს იდეალურად ვერ გააკეთებთ. ზედმეტი ნერვიულობა და სტრესი იმაზე მეტად დაგაზარალებთ, ვიდრე გამოუცდელობის გამო დაშვებული ტექნიკური ხასიათის შეცდომები.
პროფესორი კორტნი ჰარინგტონი აღნიშნავს, რომ ახალ გამოწვევასთან გამკლავება ყველა სასწავლო დაწესებულებას უჭირს. თუ თქვენ ვირტუალური სწავლება რთულად გეჩვენებათ, მარტო ნამდვილად არ ხართ. ამ გამოწვევებთან გამკლავება მთელი მსოფლიოს მასშტაბით ყველა პედაგოგს უძნელდება. კორტნი ჰარინგტონი დარწმუნებულია, რომ ერთობლივი ძალისხმევით მასწავლებლები ყველა სირთულის გადალახვას შეძლებენ.
Momsedu.ge-მ თქვენთვის, მასწავლებლებისთვის შექმნა ახალი სივრცე - „მასწავლებლების სანდო წყარო“, სადაც ყოველდღიურად ქვეყნდება საგანმანათლებლო სფეროს სიახლეები. გადმოდით ბმულზე და მოიწონეთ - „მასწავლებლების სანდო წყარო“.
თარგმნა ია ნაროუშვილმა
წაიკითხეთ სრულად
