Baby Bag

„10 ბავშვიდან 7 პირველ სიტყვას ნაცვლად „დედისა,“ ამბობს „ალექსს,“ „მაშას...“ ეს კატასტროფაა,“- პედიატრი თემურ მიქელაძე

„10 ბავშვიდან 7 პირველ სიტყვას ნაცვლად „დედისა,“ ამბობს „ალექსს,“ „მაშას...“ ეს კატასტროფაა,“- პედიატრი თემურ მიქელაძე

პედიატრმა თემურ მიქელაძემ ბავშვებში ეკრანდამოკიდებულების პრობლემაზე ისაუბრა და მშობლებს მოუწოდა, რომ შვილები ეკრანს მაქსიმალურად ჩამოაშორონ:

„სავალალო მდგომარეობამდე მივედით. ქართული პოპულაციისთვის ყველაზე მნიშვნელოვანი არის სიტყვა „დედა.“ მივედით იქამდე, რომ ბავშვები პირველ სიტყვას ნაცვლად „დედისა,“ ამბობენ „ალექსს,“ „მაშას.“ მე ვთვლი, რომ ეს არის კატასტროფა. 10 ბავშვიდან 7 ამბობს უკვე ამ სიტყვებს პირველად. ასეთ ბავშვს ვერც მოვაშორებთ უკვე მერე ეკრანს. ვიღაც ექიმთან მიყვანა, რომ ის მოაგვარებს ამ პრობლემას, არ არის სიმართლე. ის ამ პრობლემას ვერ მოაგვარებს.

მიიყვანთ ბავშვს ექიმთან, იწყებთ D ვიტამინის განსაზღვრას, ტყვიის განსაზღვრას. ეს არის მეორეხარისხოვანი. ასე არსად არ კეთდება, არცერთ ქვეყანაში. ექიმი წყვეტს უნდა გაკეთდეს თუ არა. დავსდევთ ერთ ლაბორატორიას, მეორე ლაბორატორიას. ეს მეორეხარისხოვანია. ეს არაფერი არ არის. არანაირი ტყვიის მაღალი შემცველობა ისეთ პრობლემას არ შექმნის, როგორც ეკრანდამოკიდებულება.

როდესაც ბავშვი მთელი დღე არის მიჯაჭვული ეკრანს, შეიძლება იყოს აკომოდაციის სპაზმი. მხედველობის ორგანო იძაბება ამ დროს. თუ ბავშვი ახლოდან უყურებს ტელევიზორს, უნდა გამოირიცხოს მხედველობის პრობლემა. მთელი დღე ბავშვი არ უნდა იჯდეს ტელევიზორთან, რა თქმა უნდა,“- მოცემულ საკითხზე თემურ მიქელაძემ „რადიო იმედის“ ეთერში ისაუბრა.

წყარო: ​რადიო „იმედი“ 

შეიძლება დაინტერესდეთ

„ფარისებრი ჯირკვლის კვანძების 90% კეთილთვისებიანია, 10% შემთხვევაში ისინი შეიძლება იყვნენ ავთვისებიანი,“ - ენდოკრინოლოგი ნაია ლატარია

„ფარისებრი ჯირკვლის კვანძების 90% კეთილთვისებიანია, 10% შემთხვევაში ისინი შეიძლება იყვნენ ავთვისებიანი,“ - ენდოკრინოლოგი ნაია ლატარია

ენდოკრინოლოგ-ნუტრიციოლოგმა ნაია ლატარიამ ჩიყვის გამომწვევ მიზეზებსა და დაავადების მიმდინარეობის თავისებურებებზე ისაუბრა. მან აღნიშნა, რომ ჩიყვს უმეტესად უსიმპტომო მიმდინარეობა აქვს:

„ჩიყვი არის ფარისებრი ჯირკვლის მოცულობაში გაზრდა. ასევე ჩიყვი არის, თუ ნორმალური მოცულობის პირობებში ფარისებრ ჯირკვალში წარმოიქმნა კვანძოვანი ჩანართები. შეიძლება ეს კვანძები სხვადასხვა ზომის იყოს. დიფუზური და კვანძოვანი ჩიყვი ძირითად შემთხვევებში უსიმპტომოდ მიმდინარეობს. სიმპტომები გამოვლინდება იმ შემთხვევაში, თუ მოცულობაში ძალიან გაიზარდა ფარისებრი ჯირკვალი. თუ კვანძები გაიზარდა ზომაში, შეიძლება მოხრჩობის შეგრძნებამ შეაწუხოს ადამიანი, ყლაპვის გაძნელებამ. ​ზოგიერთ თანმხლებ დაავადებას ასევე ტკივილის სინდრომიც ახასიათებს. სხვა შემთხვევაში, როგორც წესი უსიმპტომოდ მიმდინარეობს და შემთხვევით ხდება აღმოჩენა.“

ნაია ლატარიას თქმით, კვანძოვანი წარმონაქმნები ფარისებრი ჯირკვლის ფუნქციურ ცვლილებებსაც იწვევს:

„კვანძოვან წარმონაქმნებს ფუნქციური ცვლილებაც ახლავს ფარისებრი ჯირკვლის, ​როდესაც ჰორმონების დონე არის შეცვლილი. სიმპტომები, როგორებიც არის უძილობა, თავის ტკივილი, საერთო სისუსტე, ადვილად დაღლა, წონაში მატება, კლება, ეს ყველაფერი უკვე ფუნქციურ დარღვევებს ახასიათებს. ფარისებრი ჯირკვლის და კვანძის წარმოქმნის ყველაზე ხშირი მიზეზი არის იოდის დეფიციტი ან აუტოიმუნური პროცესები, როდესაც ფარისებს ჯირკვალს იმუნური სისტემა ებრძვის. იოდდეფიციტით გამოწვეული ჩიყვის შემთხვევაში, ეს არ ნიშნავს იმას, რომ პაციენტს შემდგომ იოდის პრეპარატები უნდა მივცეთ და ამით დავიწყოთ მკურნალობა.“

„ფარისებრი ჯირკვლის კვანძების 90 % კეთილთვისებიანია. 10 % შემთხვევაში ისინი შეიძლება იყვნენ ავთვისებიანი. ერთ-ერთი გზა ამის დასადგენად არის ბიოფსიური კვლევა. თუ კვანძები არის კეთილთვისებიანი, მედიკამენტოზური თერაპია არ ინიშნება. ინიშნება მხოლოდ დინამიკაში დაკვირვება. ​თუ კვანძები არის ავთვისებიანი, მაშინ ქირურგიულად უნდა მოხდეს მათი მოშორება. ავთვისებიანი კვანძებიც ფარისებრი ჯირკვლის შემთხვევაში საიმედო პროგნოზით ხასიათდება და მკურნალობას ადვილად ექვემდებარება,“- აღნიშნულ საკითხებზე ნაია ლატარიამ ტელეკომპანია „რუსთავი 2“ - ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

წაიკითხეთ სრულად