Baby Bag

ბავშვის მოვლასთან დაკავშირებით უფროსი თაობის რჩევებს გაგებით მოეკიდეთ და თავშეკავებით შეხვდით - ევგენი კომაროვსკის რჩევები ახალგაზრდა მშობლებს

ბავშვის მოვლასთან დაკავშირებით უფროსი თაობის რჩევებს გაგებით მოეკიდეთ და თავშეკავებით შეხვდით - ევგენი კომაროვსკის რჩევები ახალგაზრდა მშობლებს

პედიატრმა ევგენი კომაროვსკიმ ახალგაზრდა მშობლებს ურჩია, ბავშვის მოვლასთან დაკავშირებით უფროსი თაობის წარმომადგენლების რჩევებს გაგებით მოეკიდონ:

უფროსი თაობის წარმომადგენლები, სავარაუდოდ, აქტიურად შეეცდებიან ბავშვის მოვლის საკითხებზე საკუთარი გამოცდილების თქვენთვის გაზიარებას. მათი გამოცდილების მადლიერებით მიღების პარალელურად, აუცილებლად უნდა გაითვალისწინოთ, რომ ბოლო 20-40 წლის განმავლობაში ბავშვის მოვლის წესები და ტექნიკა პრინციპულად შეიცვალა.

თანამედროვე მშობლებს უამრავი დამხმარე საშუალება აქვთ, რაც მათ ცხოვრებას უმსუბუქებს: სარეცხი მანქანა, ერთჯერადი საფენები, მშრალი და სველი ხელსახოცები, რადიო და ვიდეო ძიძები, ელექტრონული თერმომეტრი, სტერილიზატორები, ფაფები, საბავშვო საკვების ფართო არჩევანი, თანამედროვე ტანსაცმელი (განსაკუთრებით ზამთრის), სათამაშოები, დასაბანი საშუალებები, საბავშვო კოსმეტიკა და სხვა უამრავი რამ, რაზეც თქვენი ბავშვების ბებოებს ოცნებაც კი არ შეეძლოთ. ისინი ვერც წარმოიდგენდნენ, რომ ზოგჯერ ბავშვის ავადობისას საავადმყოფოში წასვლა საჭირო არ იქნებოდა, რადგან სახლში დედებს ექნებოდათ ჰაერის დამატენიანებელი, საბავშვო ცხვირის წვეთები და ა.შ.

ბავშვის მოვლასთან დაკავშირებით უფროსი თაობის რჩევებს გაგებით მოეკიდეთ და თავშეკავებით შეხვდით, ნუ იქნებით ირონიულები და ნუ დაანახვებთ მათ თქვენს ირონიულ ღიმილს.

წარმოიდგინეთ, როგორ ინსტრუქციებს მისცემს პეიჯერის მფლობელი ადამიანს, რომელიც სმარტფონს იყენებს. წარმოიდგინეთ? მაშინ, გაიღიმეთ და უთხარით უფროს ადამიანს მადლობა.

თქვენ უნდა იმუშაოთ იმაზე, რომ თქვენს შვილებსა და თქვენი შვილების ბებიებს სრულიად სხვა გამოცდილება გაუზიაროთ: ეს თანამედროვე, ბედნიერი მშობლობის გამოცდილებაა, რომელიც არ გულისხმობს 24-საათიან მუხლჩაუხრელ შრომას, არამედ ბედნიერებას და სიამოვნებას ანიჭებს მშობელს.

​წყარო

შეიძლება დაინტერესდეთ

„ფრაზები: „რა გატირებს? ვინ არ ყოფილა ორსულად? რა არის ეს ტირილი?“ ძალიან გულსატკენია იმ მდომარეობაში,“ - მზიკო დალაქიშვილი

„ფრაზები: „რა გატირებს? ვინ არ ყოფილა ორსულად? რა არის ეს ტირილი?“  ძალიან გულსატკენია იმ მდომარეობაში,“ - მზიკო დალაქიშვილი

ბავშვთა და მოზარდთა ფსიქოლოგმა მზიკო დალაქიშვილმა მშობიარობის შემდგომი დეპრესიისა და შფოთვის შესახებ ისაუბრა. მან აღნიშნა, რომ მშობიარობის შემდეგ სევდიანობა ბუნებრივი მდგომარეობაა:

„ეს ბუნებრივი მდგომარეობაა, როდესაც ქალბატონი მშობიარობის შემდგომ თავს დაძაბულად, დაღლილად, არასასურველად გრძნობს. თვლის, რომ მის გარშემო ყველაფერი ისე არ არის, როგორც საჭიროა. დავიწყოთ იქიდან, რომ ფიგურა იცვლება, განწყობა იცვლება. ეს ყველაფერი ერთად ქმნის ემოციურ ფონს, რომელსაც ბევრი არქმევს დეპრესიას, თუმცა მე მაინც გავმიჯნავდი დეპრესიას იმ მდგომარეობისგან, რომელზეც მე ახლა ვისაუბრე.“

მზიკო დალაქიშვილის თქმით, ორსულობისას ჰორმონალური ცვლილებები გარდაუვალია, რისთვისაც ყველა ქალი მზად უნდა იყოს:

„ჰორმონალური ცვლილებები გარდაუვალია. ეს ყველასთან ხდება, რომლის შედეგადაც რაღაც ცვლილებები არის. ჭრილობა რომ გაქვს გახსნილი და ყველაფერი მტკივნეულია, ასეთები ვხდებით ბუნებრივად. გარემო ფაქტორებს დიდი მნიშვნელობა აქვს. თუ გარემო ამას გაგებით მოეკიდება და თითოეულ ცრემლს მიიღებს ნორმალურად, არ მოხდება ამაზე გამახვილება ყურადღების, ეს დადებითად იმოქმედებს. „რა გატირებს? ვინ არ ყოფილა ორსულად? რა არის ეს ტირილი?“- ეს ყველაფერი ძალიან გულსატკენია იმ მდომარეობაში. შეიძლება ამას დაემატოს რაღაც წყენა, რომელიც გაგახსენდება და მიდიხარ რაღაც მდგომარეობამდე.“

„დეპრესიაში მყოფი ადამიანი იმ მდგომარეობამდე მიდის, რომ შვილი საერთოდ არ უნდა, აღარც ქმარი უნდა, აღარც თავისი თავი მოსწონს. ამ სამყაროში ამოვარდნილად გრძნობს თავს, ვერ ხედავს მომავლის პერსპექტივას. გარემოც ძალიან წუხდება მუდმივად შეწუხებული ადამიანით. ყველაზე მთავარი მაინც ბავშვია. რაც უნდა მგრძნობიარე იყო, ეს ცრემლები იყოს სიყვარულის და ნუ იქნება დარდის, რომ რა გავაკეთე ეს?! ამასაც გაგებით მოვეკიდები. შეიძლება ყველაფერი დაემართოს ადამიანს, მაგრამ მივმართოთ პროფესიონალს და ვაღიაროთ ეს მდგომარეობა. დავიწყოთ ცხოვრება თავიდან,“- აღნიშნულ საკითხზე მზიკო დალაქიშვილმა ტელეკომპანია „იმედის“ გადაცემაში „იმედის დღე“ ისაუბრა.

წყარო:​ „იმედის დღე“

წაიკითხეთ სრულად