Baby Bag

ბავშვის პირველი ახალი წელი - 15 რჩევა დაუვიწყარი დღესასწაულის მოსაწყობად

ბავშვის პირველი ახალი წელი - 15 რჩევა დაუვიწყარი დღესასწაულის მოსაწყობად
ბავშვი მშობლისთვის საუკეთესო საჩუქარია. როდესაც ოჯახში პატარა იბადება, ყველას ყურადღება მისკენ არის მიმართული. თუ სახლში ჩვილი გყავთ, რომელიც ახალ წელს პირველად ​ხვდება, ალბათ, მისთვის განსაკუთრებული დღესასწაულის მოწყობას გეგმავთ. თუ გსურთ, რომ ბავშვის პირველი ახალი წელი თქვენთვის და ოჯახის სხვა წევრებისთვისაც დაუვიწყარი აღმოჩნდეს, ყურადღებით გაეცანით სტატიაში შემოთავაზებულ საინტერესო და კრეატიულ რჩევებს.

• საახალწლო აქტივობები წინასწარ დაგეგმეთ

შესაძლოა, მეუღლეს ხშირად ეკამათებით, რადგან ვერ გადაგიწყვეტიათ, რომლის მშობლების ოჯახში უნდა შეხვდეთ ახალ წელს. თუ ოჯახში პატარა გყავთ, სავარაუდოდ, როგორც თქვენს, ასევე თქვენი მეუღლის მშობლებს, უდიდესი სურვილი აქვთ, რომ ახალი წელი თქვენთან ერთად გაატარონ. სწორედ ამიტომ, საახალწლო აქტივობები მეუღლესთან ერთად წინასწარ დაგეგმეთ. უმჯობესია, თუ დიდ საოჯახო დღესასწაულს მოაწყობთ და ყველანი ერთად შეიკრიბებით. გული არც თქვენს მშობლებს დაწყვიტოთ და ნურც თქვენი მეუღლის ოჯახს დატოვებთ უყურადღებოდ.

• ძველ ნივთებს დაემშვიდობეთ

ახალი წლის დადგომამდე ბავშვის იმ ნივთებს უნდა დაემშვიდობოთ, რომლებიც აღარ გჭირდებათ. ის სათამაშოები და ტანსაცმელი, რომელიც პატარას აღარ გამოადგება, ერთად მოაგროვეთ და საქველმოქმედო მიზნით გამოიყენეთ. თუ მეორე ბავშვს ელოდებით, ნივთები მისთვის გადაინახეთ. შეგიძლიათ თქვენს ორსულ მეგობარს გაუწიოთ დახმარება. სახლში სივრცე აუცილებლად გაათავისუფლეთ, რათა ახალ წელს მიღებული საჩუქრებისთვის ადგილი გქონდეთ.

• შეადგინეთ სურვილების სია

ბავშვისთვის საჭირო და აუცილებელი ნივთების შესახებ თქვენ ყველაფერი იცით. სწორედ ამიტომ, ახალი წლის დადგომამდე აუცილებლად ჩამოწერეთ სურვილების ნუსხა და თქვენს ოჯახის წევრებს, ახლობლებსა და ნათესავებს დაურიგეთ. თუ ისინი თქვენთან მოსვლას გეგმავენ და პატარასთვის საჩუქრის შერჩევას ცდილობენ, უმჯობესია, თუ გარკვეულ დახმარებას გაუწევთ და მიანიშნებთ, რა სახის საჩუქარი გაგახარებთ უფრო მეტად.

• ბავშვი სტრესისგან უნდა დაიცვათ

პირველი ახალი წელი ბავშვისთვის დიდი სიხარულის მომტანი უნდა იყოს. მიუხედავად იმისა, რომ თქვენ მისთვის დაუვიწყარი დღესასწაულის მოწყობას ცდილობთ, პატარას ყოველდღიური რუტინა თანმიმდევრულად უნდა დაიცვათ. ის დროულად უნდა გამოკვებოთ, ათამაშოთ, გაართოთ და დააძინოთ. ბავშვს მეტისმეტად ნუ დასტრესავთ და გადაჭარბებული მხიარულებით ნუ გადაღლით.

• საფუძველი ჩაუყარეთ ახალ ტრადიციას

ახალ წელს სიახლეებით უნდა შეხვდეთ. ეცადეთ ძველი ჩვეულებების გარდა დღესასწაული ახალი ტრადიციებითაც გაამდიდროთ. მართალია, პატარა აქტივობებში მონაწილეობის მიღებას ჯერ ვერ შეძლებს, მაგრამ სამომავლოდ ისიც ტრადიციის განუყოფელ ნაწილად იქცევა. შეგიძლიათ, ოჯახის წევრებისთვის რამდენიმე ერთნაირი პიჟამა შეიძინოთ და ყველანი სადღესასწაულოდ გამოეწყოთ. თუ გურმანთა ოჯახი გაქვთ, საჩუქრების გახსნამდე დონატები მიირთვით. ერთ-ერთი საუკეთესო საახალწლო ტრადიცია, რომელსაც შეგიძლიათ აქტიურად მისდიოთ, ქველმოქმედებაა. ოჯახის წევრებთან ერთად წინასაახალწლოდ საქველმოქმედო აქტივობებში მიიღეთ მონაწილეობა. ადამიანებს ტანსაცმლით, საყოფაცხოვრებო ნივთებით ან გარკვეული თანხით დაეხმარეთ.

• დრო ბავშვთან ერთად გაატარეთ

საუკეთესო საჩუქარი, რომელიც თქვენს შვილს შეგიძლიათ მისცეთ - დროა. საახალწლოდ ერთი დღე მთლიანად ოჯახს მიუძღვენით. პატარასთან ერთად საყიდლებზე წადით ან სხვადასხვა თამაშით გაერთეთ. ბავშვს თქვენი ყურადღება უსაზღვროდ გაახარებს. თქვენ კი ოჯახთან ერთად გატარებული დრო გაგაბედნიერებთ.

• ეწვიეთ თოვლის ბაბუას

მართალია, თქვენი შვილი ჯერ კიდევ ძალიან პატარაა, მაგრამ მას თოვლის ბაბუასთან ერთად ფოტო აუცილებლად უნდა გადაუღოთ. ბავშვის ემოციები, როდესაც ის წვერებიან მოხუცს დაინახავს, თქვენთვის დაუვიწყარ მოგონებად იქცევა. ამ ყველაფრის ფოტოზე ასახვა კი არ უნდა დაგავიწყდეთ.

 წაიკითხეთ საახალწლო წიგნები

დღესასწაულებზე სერიოზული ლიტერატურა უნდა დაივიწყოთ. სპეციალურად ახალი წლის დღესასწაულისთვის შექმნილი წიგნები შეიძინეთ და დღის განმავლობაში გარკვეული დრო კითხვას დაუთმეთ, რათა ოჯახში ამაღლებული განწყობის შენარჩუნება შეძლოთ.

• ბავშვისთვის განსაკუთრებული საჩუქარი შეიძინეთ

მართალია, ბებიები და ბაბუები პატარას აუცილებლად გაანებივრებენ, მაგრამ თქვენ ბავშვისთვის განსაკუთრებული საჩუქარი უნდა შეიძინოთ, რომელიც მის პირველ ახალ წელს უფრო გამორჩეულს და დაუვიწყარს გახდის. პატარას ისეთი ნივთი უყიდეთ, რომელსაც ის მოზრდილ ასაკში გამოიყენებს. უმჯობესია, თუ ისეთ საჩუქარს შეიძენთ, რომელიც ბავშვისთვის ერთგვარ რელიქვიად იქცევა. შეგიძლიათ პატარას ძვირადღირებული ოქროს სამაჯური უყიდოთ. ზოგიერთი შვილისთვის ძვირფას ჭურჭელს ან თეთრეულს ყიდულობს.

  • მოაწყვეთ საბავშვო წვეულება

  • საახალწლო განწყობის ასამაღლებლად სტუმრად თქვენი მეგობრები და მათი მცირეწლოვანი ბავშვები მოიწვიეთ. პატარებს თავზე სანტას ქუდები დაახურეთ და სპეციალურად ახალი წლისთვის შეძენილი სათამაშოებით გართობის შესაძლებლობა მიეცით. მშობლებმა შეგიძლიათ მათთვის ფოტოების გადაღებით გაირთოთ თავი ან სხვა აქტივობებით დაკავდეთ.

    • ბავშვის ზრდა კადრზე აღბეჭდეთ

    ფრაზა „დრო გარბის“ ყველაზე მეტად პატარებთან მიმართებაში მართლდება. ბავშვი ძალიან სწრაფად იზრდება. შვილის ყოველწლიური ზრდის მაჩვენებლის შესაფასებლად, პატარას ფოტო ნაძვის ხესთან ან ბუხართან გადაუღეთ. მსგავსი ფოტოები ყოველწლიურად უნდა გადაიღოთ. ბავშვის ზრდა კადრზე აღბეჭდეთ და ეს ყოველწლიურ ტრადიციად აქციეთ.

    • ბავშვის ოთახი განათებებით მორთეთ

    ბავშვებს ფერადი ნათურები ძალიან უყვართ. პატარას გასახალისებლად მისი საძინებელი განათებებით მორთეთ. მთავარია, იცოდეთ, რომ ბავშვს ნათურებზე წვდომა არ აქვს, რათა მის უსაფრთხოებაში დარწმუნებული იყოთ. როდესაც ბავშვს განათებულ ოთახს პირველად აჩვენებთ, მის თვალებში დანახული ბედნიერი ნაპერწკლები დაუვიწყარ მოგონებად დაგრჩებათ.

    • დაამზადეთ სადღესასწაულო ბარათები

    ყველა მშობელი ონცებობს, რომ ისეთი სადღესასწაულო ბარათი დაამზადოს, რომელზეც მისი შვილის გამოსახულება იქნება დატანილი. ბავშვისთვის საახალწლო სათამაშოები და აქსესუარები შეიძინეთ. როდესაც ის თამაშს დაიწყებს, პატარას საინტერესო ფოტოები გადაუღეთ. თუ ბავშვი ჯერ ძალიან პატარაა და თამაში არ შეუძლია, ის საახალწლო დეკორაციებთან დასვით და ფოტოები ისე გადაუღეთ. გადაღებული ფოტოებიდან საუკეთესო კადრი შეარჩიეთ და ის საახალწლო ბარათის დასამზადებლად გამოიყენეთ.

  • ბავშვს ქალაქი დაათვალიერებინეთ

  • ერთ წლამდე ასაკის ბავშვისთვის დაუვიწყარი დღესასწაულის მოსაწყობად შორეულ ქვეყნებში სამოგზაუროდ წასვლა ნამდვილად არ დაგჭირდებათ. საკმარისია ქალაქში შვილთან ერთად გაისეირნოთ. საახალწლო დეკორაციებისა და სადღესასწაულოდ მორთული ვიტრინების დანახვა ბავშვს წარმოუდგენლად გაახარებს.

    • ბავშვის შეგრძნებები წაახალისეთ

    დღესასწაულის უკეთ აღსაქმელად ბავშვის შეგრძნებები წაახალისეთ. ნება მიეცით პატარას ნაძვის ხეს შეეხოს, მისი წიწვები დაყნოსოს, სათამაშოები ხელში დაიჭიროს. ბავშვს ფერადი ნათურების ყურების შესაძლებლობა უნდა მისცეთ. პატარასთან ერთად მოუსმინეთ სადღესასწაულო მუსიკას, დარეკეთ ზარები. ბავშვს რომელიმე სადღესასწაულო კერძი გაასინჯეთ. ახალ წელს მას სიახლეებთან ზიარების შესაძლებლობა უნდა მიეცეს. ბავშვისთვის დაუვიწყარი დღესასწაულის ჩუქება საოცრად გაგახალისებთ და გაგაბედნიერებთ. 

    მომზადებულია parents.com-ის მიხედვით
    თარგმნა ია ნაროუშვილმა 

    შეიძლება დაინტერესდეთ

    თუ ქალი და მისი ოჯახი მომზადებულები და ინფორმირებულები შეხვდებიან ორსულობას ყველა უსიამოვნების და გართულების პრევენცია შესაძლებელია

    თუ ქალი და მისი ოჯახი მომზადებულები და ინფორმირებულები შეხვდებიან ორსულობას ყველა უსიამოვნების და გართულების პრევენცია შესაძლებელია

    ორსულების მშობიარობისთვის მოსამზადებელ ფსიქოლოგიურ რჩევებზე ​MomsEdu.ge-ს ესაუბრა ფსიქოლოგი რუსუდან სამხარაძე.
    - რა არის მთავარი დეტალი, რისთვისაც მზად უნდა იყოს ორსული, რომ მშობიარობის შემდეგ ნაკლები ფსიქოლოგიური წნეხის ქვეშ აღმოჩნდეს?
    - ორსულობა ქალის ცხოვრების განსაკუთრებული პერიოდია, სიხარულთან და ბედნიერებასთან ერთად ხშირად დაბნეულობის, შიშის, შფოთვის, უგუნებობისა და დეპრესიის პერიოდად იქცევა. ახალი სიცოცხლის ჩასახვა, დიდ მოლოდინთან ერთად, ორგანიზმისთვის დიდი გამოწვევაცაა და ეს საპასუხისმგებლო გამოცდა ქალის არა მარტო ფიზიკურ, არამედ ფსიქიკურ ჯანმრთელობასაც ელის.
    მღელვარების მიზეზები შესაძლოა იყოს:

    ​- პასუხისმგებლობის შიში;
    - მშობიარობის შიში;
    - სხეულის ფორმების ცვლილება;
    - ჯანმრთელობის პრობლემები;
    თუ ჩვენ განვიხილავთ დედობას, როგორც ფსიქო-სოციალურ ფენომენს, რომელიც ბავშვის განვითარების ყველა პირობას უნდა უზრუნველჰყოფდეს, უნდა შევეხოთ დედის ფსიქოლოგიურ მდგომარეობას. ორსულობა და მშობიარობა საკმაოდ სტრესულია ქალის ფიზიოლოგიისა და ფსიქიკისთვის, ჰორმონალურ ცვლილებებთან ერთად იცვლება რეალობა და ხდება დედის ახალ როლთან ადაპტაცია, რომელიც შეიძლება მიმდინარეობდეს (პოსტნატალურ) მშობიარობის შემდგომი ფსიქოემოციური გართულებებით. მაგალითად, შეიძლება ახალბედა დედას არ ახარებდეს ჩვილის მოვლის პროცესი, განიცდიდეს ქრონიკულ გადაღლას და გაღიზიანებას, რაც კიდევ უფრო შეიძლება უმძაფრებდეს დანაშაულის გრძნობას, რომ ვერ აკმაყოფილებს „იდეალური“ დედის პარამეტრებს. ზოგჯერ ჩნდება ფიქრები, რომ ის ვერ აკმაყოფილებს ბავშვის მოთხოვნილებებს ხარისხიანად, თითქოს და მას არ აქვს საკმარისი ემოციური და ტაქტილური (შეხებითი) კონტაქტი ჩვილთან. აღნიშნული ფიქრები და შიშები ორსულში, ახალბედა დედაში, შესაძლოა იწვევდეს გუნება-განწყობის ცვლილებას, სისუსტეს, უმადობასა და ძილის სირთულეებს.

    დედის შემაწუხებელი ფიქრები, რომ თავს ვერ ართმევს დაკისრებულ მოვალეობას, ხასიათის მუდმივი ცვალებადობა, დანაშაულის გაძლიერებული გრძნობა და ინტენსიური ემოციები, შესაძლოა კიდევ უფრო რთულ ფორმებში გადაიზარდოს და შფოთვით აშლილობამდეც კი მივიდეს. რაც თავის მხრივ გავლენას ახდენს არა მხოლოდ დედაზე, არამედ ბავშვზე და ხანდახან, ბავშვის მიმართ აგრესიის მიზეზიც შესაძლოა გახდეს.

    ​თუ ახლად ნამშობიარებ ქალს ზემოთ ჩამოთვლილი სიმპტომები სუსტად აღენიშნება, აქვს მსუბუქი შფოთვა, ტირილის სურვილი, ხასიათის ცვალებადობა და ეს სიმპტომები 2 კვირაზე მეტხანს არ გრძელდება, შეგვიძლია ვივარაუდოთ, რომ ქალი ნელ-ნელა რეაბილიტირდა, ხოლო თუ ეს სიმპტომატიკა არ იცვლება ან მძაფრდება დროის გასვლის მიუხედავად, მაშინ აუცილებელია სპეციალისტების (გინეკოლოგის, ფსიქოლოგის, ნევროლოგის, ფსიქიატრის) კონსულტაცია.
    - როგორ უნდა მოემზადოს ორსული ან ის, ვინც ორსულობას გეგმავს ამ რთული და საინტერესო პერიოდისთვის? გვირჩიეთ რამდენიმე აქტივობა ან ფსიქოლოგიური სავარჯიშო, რითაც უფრო მეტი მზაობით შეხვდებიან ქალები მშობიარობას და მის შემდეგ განვითარებულ მდგომარეობას?
    - გამოწვევები და სირთულეები ინდივიდუალურია და ისინი სხვადასხვა ფორმითა და ინტენსივობით გვხვდება. თუ კი ქალი და მისი ოჯახი მომზადებულები და ინფორმირებულები შეხვდებიან ამ უნიკალურ პერიოდს, ყველა უსიამოვნების და გართულების პრევენცია შესაძლებელია.

    ​პრევენციისთვის სასურველია პერინატალურ ფსიქოლოგთან (ფსიქოლოგი, რომელიც მუშაობს შვილოსნობის საკითხებზე, პრე და პოსტ სამშობიარო პერიოდში) კონსულტაცია. ფსიქოლოგის მიზანია, დაეხმაროს ქალს, მიიღოს და გააცნობიეროს საკუთარი თავი ახალ როლში, მოამზადოს მშობიარობისთვის და მიაწოდოს ინფორმაცია შესაძლო დეპრესიის, შფოთვის შესახებ. აუხსნას, თუ რაოდენ მნიშვნელოვანია მშობელი-ბავშვის ჯანსაღი ინტერაქცია.

    ​რეკომენდაციების სახით ახალგაზრდა დედებს მინდა ვურჩიო, რომ მაქსიმალურად დატკბნენ ამ უნიკალური პერიოდით, ორსულობა და მშობიარობა ეს ის დროა, როცა მხოლოდ საკუთარ თავსა და სურვილებზე უნდა იყვნენ ორიენტირებულნი და გაინებივრონ თავი, იყვნენ კონტაქტში საკუთარ შეგრძნებებთან და სურვილებთან - შემდეგ ჩვილთან.

    ​მოითხოვეთ დახმარება ოჯახის წევრებისა თუ მეგობრებისაგან, ჩართეთ პროცესში მამა, მიიღეთ მისი ზრუნვა და ყურადღება მადლიერებით, შეადგინეთ და გაიზიარეთ ბავშვზე ზრუნვის დრო და განრიგი, თავისუფალი დრო გამოიყენეთ გამოსაძინებლად და სავარჯიშოდ, ჰაერზე სასეირნოდ ან გასართობად.

    ​ესაუბრეთ, უმღერეთ მუცლადმყოფ ბავშვს და შემდეგ ჩვილსაც აქტიურად გაუზიარეთ თქვენი ემოციები და განცდები, ეს ტექნიკა დაგეხმარებათ ადვილად ამოიცნოთ საკუთარი და ბავშვის სიგნალები, და ამ სიგნალებს შესაბამისი მგრძნობელობით უპასუხოთ.
    ​პერიოდულად მიმართეთ რელაქსაციას (3-5 წუთი) - მიიღეთ კომფორტული პოზა, დახუჭეთ თვალები და წარმოიდგინეთ სიტუაცია/ადგილი, სადაც თავს იგრძნობთ მშვიდად, დაცულად და უსაფრთხოდ, ეს თქვენი „იდეალური ადგილი“ იქნება. ეს ტექნიკა ხელს უწყობს სიმშვიდისა და ბალანსის მოპოვებას, რაც დადებითად აისახება, როგორც ფიზიკურ ისე ემოციურ მდგომარეობაზე, საერთო ჯამში კი ადამიანის ჯანმრთელობაზე. რელაქსაცია/წარმოსახვა ეხმარება ადამიანს სიმშვიდე შეინარჩუნოს მთელი დღის მანძილზე.

    ​მოითხოვეთ სოციალური მხარდაჭერა!

    ​მნიშვნელოვანია, ორსულობის პერიოდის შესახებ კომუნიკაცია პარტნიორთან (თუ გყავს პარტნიორი), ოჯახის წევრებთან და/ან მეგობრებთან. ასევე, გამოცდილების გაზიარება იმ ქალებთან, რომლებიც ახლა გადიან ამ პროცესს: ორსულებთან და ახალშობილის დედებთან. ასეთი მხარდაჭერის მისაღებად, შეგიძლია სხვადასხვა ჯგუფში გაწევრიანდე, მათ შორის სოციალური ქსელების გამოყენებით.

    ​თუ ცოტას ნერვიულობ, იცოდე, რომ არ ხარ მარტო. შიში, შფოთვა, ახალ როლთან შეგუების სირთულე ძალიან ბუნებრივია, განსაკუთრებით პირველი ან დაუგეგმავი ორსულობის შემთხვევაში.

    ​- რას ურჩევდით პარტნიორებს და ოჯახის წევრებს, რომლებიც ორსულთან ერთად გადიან ამ რთულ პროცესს?

    ​- მშობიარობის შემდგომ ფსიქო-ემოციურ გართულებებს ხელს უწყობს ასევე, ისეთი სოციალური ფაქტორები, როგორებიცაა: ფინანსური პრობლემები და კეთილმოუწყობელი საცხოვრებელი პირობები, მხარდაჭერის არქონა ოჯახის წევრებისა და ნათესავებისაგან, პარტნიორთან დისჰარმონიული ან დაძაბული ურთიერთობები, პარტნიორის გულგრილობა ასეთ პერიოდში ძალიან მწვავედ აისახება ქალის ისედაც სენსიტიურ ფსიქიკაზე, დროებითი იზოლაცია ან სავალდებულო დეკრეტი. ქალი, რომლისთვისაც კარიერული ზრდა და სოციალური თვითრეალიზება პრიორიტეტულია, მძიმედ განიცდის ამ პერიოდს. ასევე საყურადღებოა ის ფიზიკური დისკომფორტი, რომელიც თან ახლავს ორსულობას/მშობიარობას და მშობიარობის შემდგომ ფიზიკურ რეაბილიტაციას: მცირე მენჯის ორგანოების დაწევა, ჩახევები ან საკეისრო კვეთის შემდგომი ჭრილობები, ლაქტაციის დამახასიათებელი ტკივილები და გართულებები, წონის მატება, კანის დეფორმირება, სხეულის შეცვლილი ფორმები, რაც ქალის თვითშეფასებაზე ნეგატიურად აისახება და დიდ განსაცდელში აგდებს.

    ​პარტნიორები და ოჯახის წევრები უნდა იჩენდნენ ყურადღებას და მაქსიმალურ მხარდაჭერას როგორც ფიზიკური დახმარების მხრივ, ასევე ემოციური კუთხითაც. ოჯახის წევრებმა კრიტიკის და ნეგატიური შეფასება/შედარებებისგან უნდა შეიკავონ თავი, გაგებით და თანაგრძნობით მოეკიდონ ქალის შეცვლილ ემოციურ მდგომარეობას. 

    ესაუბრა ელენე ოვაშვილი

    წაიკითხეთ სრულად