Baby Bag

,,თხის რქა დედა საკუთარი შვილების ინტერესებს სიცოცხლის ფასად დაიცავს'' - რომელი ზოდიაქოს წარმომადგენელი ქალბატონები არიან საუკეთესო დედები?

,,თხის რქა დედა საკუთარი შვილების ინტერესებს სიცოცხლის ფასად დაიცავს'' - რომელი ზოდიაქოს წარმომადგენელი ქალბატონები არიან საუკეთესო დედები?

ყველა დედა უნიკალური და განსაკუთრებულია. თითოეული ზოდიაქოს ნიშნის წარმომადგენელ ქალბატონებს შვილებთან ურთიერთობისას ინდივიდუალური მეთოდები და მიდგომები აქვთ. მართალია, ყველა მშობელი შვილის კომფორტზე, სიმყუდროვესა და კეთილდღეობაზე ზრუნავს, თუმცა, როგორც აღმოჩნდა, ზოდიაქოს ნიშნის მიხედვით დედები ერთმანეთისგან მნიშვნელოვნად განსხვავდებიან. ვნახოთ, რომელი ზოდიაქოს წარმომადგენელი ქალბატონები არიან საუკეთესო დედები.

  • 1.თევზები (19 თებერვალი - 20 მარტი)

თევზი დედები შვილებს ხელოვნების სიყვარულს ასწავლიან და მათ კრეატიულ ადამიანებად ჩამოყალიბებაში უწყობენ ხელს. მათი შვილები ემოციური, მდიდარი წარმოსახვის მქონე, კეთილი და სხვათა მიმართ ემპათიით აღსავსე ადამიანები არიან. თევზი დედა შვილს ბუნების სიყვარულს და გასაჭირში მყოფთა დახმარებას ასწავლის. ის ბავშვს თავისუფალ და დამოუკიდებელ ადამიანად ზრდის. შესაძლოა, თევზმა დედამ შვილს საკუთარი ოცნებების რეალობად ქცევა ვერ ასწავლოს, მაგრამ ის საკუთარი შვილის ყველა წამოწყებას მხარს დაუჭერს და მას მიზნის მიღწევაში აუცილებლად დაეხმარება.

  • 2.ვერძი (21 მარტი - 19 აპრილი)

ვერძი დედა შვილების ყოველდღიურ გრაფიკს მუსიკალური აქტივობებით და სპორტით ტვირთავს. ის ბავშვებს სოციალურად აქტიურ პიროვნებებად აყალიბებს. ამასთან, ვერძ დედას თავადაც ყოველთვის დაკავებული გრაფიკი აქვს. მისი შვილები თავგადასავლების მოყვარული ადამიანები არიან. ვერძი დედები შვილებს პრობლემებთან თავით შეჯახებას და მათ წინააღმდეგ ბრძოლას ასწავლიან. ზოგჯერ ვერძს ბავშვებთან ურთიერთობაში უხეშობა ახასიათებს, რასაც ის ძალიან სწრაფად ნანობს. ვერძ დედებს შვილებზე ზეწოლაც ახასიათებთ. მათ დიდი ენერგიის მობილიზება სჭირდებათ, რათა ბავშვებს ყურადღებით მოუსმინონ და მათი სურვილები გაითვალისწინონ.

  • 3.ტყუპები (21 მაისი - 20 ივნისი)

ტყუპები საკუთარ შვილებს ნებისმიერ თემაზე სიამოვნებით ესაუბრებიან. ისინი ბავშვებთან საუბარს ადრეული ასაკიდანვე იწყებენ. ტყუპი დედები შვილებს არაფერს უმალავენ. მათ შვილებს სამყაროზე საკმაოდ ნათელი წარმოდგენა აქვთ. ტყუპი დედები შვილებს კომუნიკაციურ უნარებს წარმატებით უვითარებენ. ტყუპების განსაკუთრებულობა იმაშია, რომ მათ საკუთარი შვილის გაგება ყოველთვის შეუძლიათ, ბავშვის სქესს და ასაკს მნიშვნელობა არ აქვს. ისინი საუკეთესო წვეულებებს აწყობენ და ბავშვებთან ერთად შესანიშნავად ერთობიან.

  • 4.თხის რქა (22 დეკემბერი - 19 იანვარი)

თხის რქა დედა საკუთარი შვილების ინტერესებს სიცოცხლის ფასად დაიცავს. ისინი ძალიან ლოიალური მშობლები არიან და ბავშვს ყოველთვის მხარდაჭერას უცხადებენ. თხის რქა დედობას ძალიან სერიოზულ პასუხისმგებლობად თვლის. ის შვილებს ეთიკურად ზრდის და მათ დისციპლინას აჩვევს. როგორც წესი, თხის რქა დედებს სამსახურიც აქვთ. ისინი ძალიან ბევრს შრომობენ და ხშირად იმის შეხსენება სჭირდებათ, რომ დრო საკუთარ თავსაც უნდა დაუთმონ.

  • 5.კურო (20 აპრილი - 20 მაისი)

კურო დედებს წმინდანის მოთმინება აქვთ. ისინი ძალიან მიწიერი არსებები არიან და სამყაროს რეალისტური პერსპექტივიდან უყურებენ. კუროებს სიჯიუტე ახასიათებთ, რაც თინეიჯერ შვილებთან ურთიერთობაში ხშირად ხელს უშლით. კურო დედა ცდილობს შვილებს სილამაზისა და ბუნების პატივისცემა ასწავლოს. იმის გამო, რომ კუროებს ჭამა ძალიან უყვართ, ისინი სურსათის შესაძენად ზედმეტად დიდ თანხებს ხარჯავენ. კურო დედები ფრთხილად უნდა იყვნენ, რადგან, შესაძლოა, შვილებს ჭარბი წონის პრობლემა შეუქმნან.

  • 6.სასწორი (23 სექტემბერი - 22 ოქტომბერი)

სასწორები შესანიშნავი დედები არიან. მათ სიმშვიდე უყვართ. სასწორი დედები ოჯახში ჰარმონიას ამყარებენ. როდესაც ბავშვები ჩხუბობენ, ისინი აუცილებლად ორივე მხარეს მოუსმენენ და მათ შერიგებასაც შეძლებენ. სასწორ დედებს დისციპლინა არ მოსწონთ. ისინი შვილებთან მეგობრობენ, თუმცა ამჯობინებენ, რომ შვილებს მაშინ დაუმეგობრდნენ, როდესაც ისინი გაიზრდებიან. სასწორი დედა შვილს სიკეთის კეთებას, სხვების თანაგრძნობას და მეგობრობას ასწავლის.

  • 7.კირჩხიბი (21 ივნისი - 22 ივლისი)

კირჩხიბი დედა შვილების მფარველი და საუკეთესო აღმზრდელია. კირჩხიბის შვილებმა ყოველთვის იციან, რომ ისინი უყვართ და მათზე ზრუნავენ. ისინი ბავშვებს ყოველთვის უსმენენ და მათ მხარდაჭერასაც უცხადებენ. კირჩხიბი დედა სახლში კომფორტულ და თბილ ატმოსფეროს ქმნის. როდესაც ბავშვები თავს ცუდად გრძნობენ, ის მათ საყვარელ ნამცხვარს გამოაცხობს, რათა შვილების გაბედნიერება შეძლოს. კირჩხიბი დედა შვილს კრეატიულობის განვითარებაში ეხმარება. ის საკუთარი შვილის ნიჭიერებასა და საოცარ უნარებზე ყველასთან ხმამაღლა საუბრობს.

  • 8.მშვილდოსანი (22 ნოემბერი - 21 დეკემბერი)

მშვილდოსან დედას ვეებერთელა გული აქვს და მთელი სამყარო საკუთარი შვილისთვის უნდა. ის ბავშვებთან ერთად ხშირად მოგზაურობს. მშვილდოსანი დედა შვილს თავისუფლების სიყვარულს, ცოდნისადმი ინტერესს და საოცარ იუმორის გრძნობას ადრეული ასაკიდანვე უვითარებს. ის მხიარული დედაა, რომელიც ყოველთვის ცდილობს ბავშვებს დადებითი განწყობა შეუქმნას. მშვილდოსანს იმპულსური ხასიათი აქვს, მას განწყობა ხშირად ეცვლება. ის შვილებს ზედმეტ შეზღუდვებს არ უწესებს. მშვილდოსანი დედა ცდილობს ბავშვი დამოუკიდებელ ადამიანად გაზარდოს.

  • 9.ქალწული (23 აგვისტო - 22 სექტემბერი)

ქალწული დედა შვილის გატეხილ თოჯინას და გატეხილ გულს ერთნაირი წარმატებით გაამთელებს. მას შვილებისადმი ყოველთვის დიდი მოლოდინები აქვს. ქალწული დედა ხშირად კრიტიკულია, თუმცა შვილი მაშინაც უყვარს, როდესაც ის მას იმედებს უცრუებს. ქალწული დედა საოცრად მშრომელია. ის შვილებს ზრდის, მუშაობს, მოხალისეობასაც არ ერიდება და სახლიც ყოველთვის მოწესრიგებული აქვს. ქალწული ბავშვს დისციპლინას აჩვევს და ცდილობს ის მებრძოლ ადამიანად ჩამოაყალიბოს. ის პერფექციონისტი დედაა, რომელიც ხშირად იმდენად მომთხოვნია, რომ შვილის ფსიქიკაზე ნეგატიურად ზემოქმედებს.

  • 10.მორიელი (23 ოქტომბერი - 21 ნოემბერი)

მორიელი საოცრად ინტუიციური დედაა. ის შვილის სატკივარს ან განსაცდელს ყოველთვის წინასწარ გრძნობს. მორიელი ლოიალური, ძლიერი და გულწრფელი დედაა. მთავარია, შვილებმა მასთან არასდროს იცრუონ. ფრთხილად იყავით, ვიდრე მორიელის შვილს რამეს აწყენინებთ, რადგან მისი შურისძიება სასტიკი იქნება. მორიელი ოჯახს საკუთარ თავზე მაღლა აყენებს. საფრთხის მოახლოების შემთხვევაში ის შვილებს თავგანწირვით იცავს.

  • 11.მერწყული (20 იანვარი - 18 თებერვალი)

მერწყული დედები ყოველთვის სიმართლეს ამბობენ და კონფორმულები არასდროს არიან. ისინი შვილებს სხვების თანაგრძნობასა და დახმარებას ასწავლიან. მერწყული დედა ბავშვებს ისეთი მნიშვნელოვანი საკითხების შესახებ ესაუბრება, როგორიცაა მაგ. გლობალური დათბობა. ის შვილების წარმოსახვას და ექსპერიმენტულ უნარებს მაქსიმალურად ავითარებს. მერწყული დედა ბავშვის ემოციური აფეთქების დროს მოუთმენელი და ფიცხია. მას ხშირად სჭირდება იმის შეხსენება, რომ შვილებს სიყვარულში უნდა გამოუტყდეს და სითბო აგრძნობინოს.

  • 12.ლომი (23 ივლისი - 22 აგვისტო)

ლომი დედა ძალიან ბავშვური და მხიარულია. ის ბავშვებთან ერთად ხშირად თამაშობს და მათ სასიამოვნო საჩუქრებით ანებივრებს. ლომი ეგოისტი ნიშანია, რის გამოც ის საკუთარ ინტერესებს ხშირად შვილების ინტერესებზე წინ აყენებს. რატომ იხდის ის ძვირადღირებულ წვეულებას, იმიტომ რომ შვილების სურვილებს ასრულებს, თუ იმიტომ, რომ სხვა დედებს საკუთარი უპირატესობა დაუმტკიცოს?! ლომს საკუთარი შვილები ძალიან უყვარს, თუმცა ნარცისისტული ახირებების გამო ზოგჯერ მათ ინტერესებს არ ითვალისწინებს. ლომი დედა სიამოვნებით გაეფლირტავება შვილის მასწავლებელს ბავშვის თანდასწრებით, თუნდაც ეს მის შვილს საერთოდ არ მოსწონდეს.

მომზადებულია yourtango.com-ის მიხედვით

თარგმნა ია ნაროუშვილმა


არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდ​ნე დედების ჯგუფი“)

შეიძლება დაინტერესდეთ

​,,აი, რატომ უნდა მისცე ახალშობილს ხსენი'' - პედიატრი მიზეზებს ასახელებს

​,,აი, რატომ უნდა მისცე ახალშობილს ხსენი'' - პედიატრი მიზეზებს ასახელებს

რატომ უნდა მივცეთ ახალშობილს ხსენი? - აღნიშნულ თემაზე ​პედიატ​რი თამარ ობგაიძე წერს. გთავაზობთ მის ნათქვამს სიტყვა-სიტყვით:

,,დედის რძე ცოცხალი ნივთიერებაა, რომლის შემადგენლობა მარტო დაბადების შემდეგ დღეებში კი არა, კვებიდან კვებამდე იცვლება და ზუსტად თანხვდება ჩვილის მოთხოვნილებებს.

მართლა ჯადოქრობაა!

კომპიუტერული სისტემების და კოსმოსის ერაში გასაკვირი ისევ რჩება დეიდს რძის თავისებურებები, რომელის ზუსტი ანალოგი კაცობრიობამ ვერაფრით შექმნა.

მოდი, მივყვეთ, როგორც იცვლება ქალის რძე ბავშვის დაბადების მერე.

ორსულობის ბოლოს სარძევე ჯირკვლებში ყვითელი ფერის ბლანტი სითხე - ხსენი წარმოიქნება. რატომ ყვითელი? იმიტომ, რომ ის მდიდარია ბეტა-კაროტინითა და პიგმენტი ლიპოქრომით. ხსენი „მწიფე რძისაგან” მკვეთრად განსხვავდება: შეიცავს ცილებისა და მარილების ჭარბ რაოდენობას, შაქარი და ცხიმი შედარებით ნაკლებია. ნატრიუმის და მაგნიუმის მარილების სიჭარბე ხელს უწყობს ნაწლავის სწრაფ დაცლას პირველი განავლისაგან, რომელიც სანაყოფე წყლითა და ნაწლავების ჩამოფქცვნილი უჯრედებითაა წარმოდგენილი. დიდი რაოდენობით შეიცავს B1, B12, C, E, A ვიტამინებს ძალიან კალორიულია. განსაკუთრებით კი პირველი დღის ხსენი, რომლის 1 ლიტრში 1500 კკალ ენერგიაა. მშობიარობის პროცესში დაღლილ ახალშობილს ეს ენერგია ძალიან სჭირდება. ხსენი შეიცავს ლეიკოციტებს, ლიმფოცოიტებს, მაკროფაგებს, რომლებიც ნაწლავის შიგნით იმუნიტეტის ფორმირებას უწყობენ ხელს. მაგრამ მთავარი მისი მთავარი სიმდიდრე მზა ანტისხეულებია, რომლებიც ინფექციების თავიდან აცილებაში გვეხმარება. პრაქტიკულად, ხსენი ის პირველი ვაქცინაა, რომელსაც ახალშობილი დაბადებიდან პირველივე წუთებში იღებს. ამავე დროს ის ადვილი მოსანელებელია ახალშობილის უმწიფარი კუჭ-ნაწლავისათვის. შეიცავს ბიფიდუმფაქტორს, რომელიც ხელს უწყობს ჩვილის ორგანიზმში სასარგებლო ბაქტერიების გამრავლებას.ხსენის შემადგენლობაში კიდევ ერთი განსაკუთრებული ნივთიერებაა - ლაქტოფერინი, რომელიც პატარას ავი მიკროორგანიზმებისაგან იცავს.

ნუ შეგაშინებს ხსენის სიმცირე - შენი პატარას კუჭიც ხომ ერთიბეწოა და ამ ჯადოსნური პროდუქტის მცირე რაოდენობა მისთვის სრულიად საკმარისია.

მოკლედ, ხსენი ნამდვილი სუპერპროდუქტია, რომელიც ახალშობილს აუცილებლად უნდა მისცე!

ლაქტაციის მე-3 დღიდან გამოიყოფა ხსნიანი რძე, მე-4-5 დღიდან გარდამავალი რძე. მეორე კვირიდან წარმოქნილ რძეს „ მწიფე რძეს“ ვუწოდებთ.

ხსენის რძედ გარდაქმნას თან ახლავს „რძის მოწოლის“ შეგრძნება, სარძევე ჯირკვლების გადიდება, გამკვრივება, სიმძიმის უსიამოვნო შგრძნებები.

ამ პროცესის რეგულირებასათვის აუცილებელია სარძევე ჯირკვლების სრულად დაცლა, რასაც პატარა ვერ ახერხებს და რძის გამოწველა ხდება საჭირო.

თუმცა ეს სხვა თემაა და შემდეგში მოგიყვები. ჯანმრთელობას გისურვებ!'' - აღნიშნავს პედიატრი. 
წაიკითხეთ სრულად