Baby Bag

„დასჯამდე არსებობს ძალიან ბევრი საშუალება, რომელმაც შეიძლება დასჯა თავიდან აგვაცილოს,“ - ფსიქოლოგი ლელა ტყეშელაშვილი

„დასჯამდე არსებობს ძალიან ბევრი საშუალება, რომელმაც შეიძლება დასჯა თავიდან აგვაცილოს,“ - ფსიქოლოგი ლელა ტყეშელაშვილი

ფსიქოლოგმა ლელა ტყეშელაშვილმა მშობლობის მნიშვნელობისა და ბავშვის აღზრდისას დაშვებული მნიშვნელოვანი შეცდომების შესახებ ისაუბრა. მისი თქმით, აღზრდა ბავშვისთვის სტრესული არ უნდა იყოს:

„მშობლობა გახლავთ ის, რომ გარჩეული იყოს, სად მივანიჭოთ ბავშვს თავისუფლება და სად არის ჩვენი დახმარება საჭირო. აღზრდა არ უნდა იყოს სტრესული. ახალგაზრდა მშობლებს, ვისაც ჯერ ცოტა შეცდომა აქვს დაშვებული აღზრდის პროცესში, მინდა ვუთხრა, რომ ასეთი სტრესი ადამიანს არ უნდა მივაყენოთ. დასჯამდე არსებობს ძალიან ბევრი საშუალება, რომელმაც შეიძლება დასჯა თავიდან აგვაცილოს. რა ალტერნატივა არსებობს იმისთვის, რომ დასჯის გამოყენება ნაკლებად დაგვჭირდეს? ეს გახლავთ ის, რომ ​აქცენტი გავაკეთოთ ქცევებზე, რომლებიც დამაკმაყოფილებელია. ბავშვი არის ნამდვილად დაინტერესებული იმით, რომ მშობლის თვალში კარგად გამოიყურებოდეს. ბუნებრივად მოხდება ისე, რომ ქცევებს, რომლებიც მიუღებელია კვებასთან, დღის რეჟიმთან, სწავლასთან, ჰიგიენასთან დაკავშირებით, ნაკლებად გამოიყენებს.“

ლელა ტყეშელაშვილმა აღნიშნა, რომ თუ ბავშვი მშობელს სისუსტეს შეამჩნევს, ის აუცილებლად გამოიყენებს ამას მანიპულირებისთვის:

„ბავშვმა თუ იგრძნო, რომ მას შეუძლია თუნდაც ორი წუთით გადაავადოს რაღაც, ​თქვენც დაღლილი ხართ, იშვიათად ხვდებით ბავშვს დღის განმავლობაში, თავს იკავებთ, რომ შენიშვნები მისცეთ, ოღონდ დღე დამთავრდეს და დაიძინოს, თუ მან თქვენი სისუსტე დაინახა, ამას გამოიყენებს. თუ დასჯაზე იქნება საუბარი და მაინცდამაინც ჭირვეულობასთან გვაქვს საქმე, ეს ჩვენი დამსახურებაა, იმიტომ, რომ უკვე შორს წავიდა პრობლემა. ფიზიკური შეხება უბრალოდ გამორიცხულია. იყო დრო, როდესაც გაწკეპვლა კარგ მშობლობად ითვლებოდა. ჩვენ გვასწავლინდნენ: „მტრად გაზარდე და მოყვრად გამოგადგება,“ მაშინ ითვლებოდა, რომ ეს ჩვეულებრივი ამბავი იყო. ახლა ჩვენი ბავშვებიც გათვითცნობიერებულები არიან, ბავშვის უფლებებზე საუბრობენ.“

ლელა ტყეშელაშვილის თქმით, როდესაც ბავშვის დასჯის მიზნით აკრძალვებს ვიყენებთ, სიფრთხილე უნდა გამოვიჩინოთ და სწორად განვსაზღვროთ, რა უნდა ავუკრძალოთ ბავშვს:

„დასჯა არის რაღაცის გაკეთების აკრძალვა, რაც მას უნდა. როდესაც ბავშვს ვეტყვით: „დღეს ტელეფონს არ მოგცემ, კომპიუტერს არ ჩაგართვევინებ,“ ეს ქვეტექსტით ბავშვისთვის ნიშნავს, რომ ისეთი მნიშვნელოვანი რამეა სმარტფონი და კომპიუტერი, რომ ​მე ამ კარგი რაღაცის გაკეთების საშუალებას არ მაძლევენ. რასაც ჩვენ ვუკრძალავთ, ბავშვი უფრო მეტ ფასს ადებს, ვიდრე სინამდვილეში უნდა ადებდეს.“

„ყველა ასაკში, როგორც მისი განვითარება აძლევს შესაძლებლობას, თავისი მდგომარეობის ექსპერტი უნდა გავხადოთ ბავშვი. უნდა ვკითხოთ: „როდის გააკეთებ?“ თუ მან იგრძნო, რომ თვითონ არის თავისი ქცევის ავტორი, გაცილებით უკეთ იცავს მერე ამ წესებს.​ დაგეგმვაში მიაღებინეთ ბავშვს მონაწილეობა. როდესაც თავისი ნათქვამი იქნება, რომ ჯერ ამას გავაკეთებ, მერე იმას გავაკეთებ, უკვე საშუალება გვექნება, რომ მოვთხოვოთ პასუხი: „აი, შენ რომ თქვი, რატომ არ გააკეთე?“ დემოკრატიული აღზრდა არის საუკეთესო აღზრდა. ბავშვის ნებისყოფის გამომუშავება ხდება იმ შემთხვევაში, როდესაც ის თვითონ იწყებს თავისი ქცევის რეგულაციას. ძალიან ცოტა რამეა, რაც ბავშვისთვის არ შეიძლება და უფროსისთვის შეიძლება. ბავშვებს უფრო ცუდად ესმით, ვიდრე ხედავენ. თუ იმას, რასაც ბავშვს ვუკრძალავთ, მშობელი აკეთებს, ჩავთვალოთ, რომ ფუჭად არის გადაყრილი ყველაფერი,“ - აღნიშნულ საკითხებზე ლელა ტყეშელაშვილმა საპატრიარქოს ტელევიზიის გადაცემაში „განთიადი“ ისაუბრა.

წყარო:​ „განთიადი“

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, „ფასდაკლებები დედებისთვის“ (ჯგუფში გასაწევრიანებლად ნახეთ ბმული - „ფასდაკლებები დედებისთვის“)

„დედის სიყვარული არის უპირობო სიყვარული, მამის სიყვარულს სჭირდება დამსახურება,“- ფსიქოლოგი...
​ფსიქოლოგი ლელა ტყეშელაშვილი ბავშვის აღზრდაში მამის მონაწილეობის მნიშვნელობაზე საუბრობს და აღნიშნავს, რომ ამ მხრივ ორივე მშობელს თავისი განსხვავებული როლი აქვს:​„ბავშვის მოვლა, აღზრდა და უპი...

შეიძლება დაინტერესდეთ

„შემოდგომა გვიჩვენებს, ვუახლოვდებით პანდემიის დასასრულს, თუ ველოდოთ ახალ ტალღას,“- თენგიზ ცერცვაძე

„შემოდგომა გვიჩვენებს, ვუახლოვდებით პანდემიის დასასრულს, თუ ველოდოთ ახალ ტალღას,“- თენგიზ ცერცვაძე

ინფექციური პათოლოგიისა და შიდსის ცენტრის გენერალურმა დირექტორმა თენგიზ ცერცვაძემ საქართველოსა და მსოფლიოში არსებული კორონავირუსის სტატისტიკის შესახებ ისაუბრა:

„კოვიდმა საქართველოში პაუზა აიღო და ამას მოჰყვა სიფხიზლის მოდუნება. მსოფლიო სტატისტიკა გვიჩვენებს, რომ ეს მთლად სწორი არ არის. საქართველოში არის ძალიან კარგი ეპიდსიტუაცია, უკეთესი არ შეიძლება. ეს არის დღეში 50-100-მდე ახალი შემთხვევა და სიკვდილობა არის მინიმალურ ნიშნულზე. დღეები გადის, როდესაც არცერთი სიკვდილობა არ ფიქსირდება. პიკიდან მსოფლიოც გამოვიდა და დიდი ტალღები არ არის, მაგრამ გაცილებით მეტი შემთხვევაა, ვიდრე საქართველოში. მსოფლიოში ყოველდღიურად ფიქსირდება კოვიდის 500 000-დან მილიონამდე ახალი შემთხვევა და 1000-დან 1500-მდე გარდაცვალება.

ეს პრაქტიკულად მთელს მსოფლიოშია. ისეთ ქვეყნებში მოიმატა სიკვდილობამ და რაოდენობამ, სადაც ტრადიციულად ადრე დაბალი იყო: იაპონია, სამხრეთ კორეა და ა.შ. საქართველოში დაბალ რიცხვებს უკეთეს ვაქცინაციას ვერ დავაბრალებთ. ვაქცინაციით საქართველო არის ერთ-ერთი ყველაზე დაბალი მოცვის ქვეყანა. პირიქით, ვაქცინაციის მიხედვით რომ ვიმსჯელოთ, საქართველოში გაცილებით მეტი უნდა იყოს შემთხვევა, ვიდრე სხვა ქვეყნებში, მაგრამ პირიქითაა. ერთი ვარიანტია, რომ რაღაც პერიოდში საქართველოში იყო ძალიან ბევრი კოვიდის შემთხვევა და კოვიდგადატანილებს განუვითარდათ ბუნებრივი იმუნიტეტი. მეორე აზრი სკეპტიკოსებში არ არის პოპულარული, მაგრამ კოვიდის მართვა ბოლო თვეებში ძალიან კარგია. სერიოზული გამოცდილება შეიძინა საქართველომ.

არის იმედი, რომ კოვიდის დასასრული მოახლოვდეს. შემოდგომა გვიჩვენებს, ვუახლოვდებით თუ არა კოვიდის დასასრულს, თუ ველოდოთ ახალ ტალღას. ყველა პანდემიას ჰქონდა თავისი კანონზომიერება. 2-3-4-5 წლის შემდეგ პანდემია თავისით მთავრდებოდა. მოელიან, რომ პანდემიის სრული ლიკვიდირება არ მოხდება, მაგრამ ის გადაიქცევა ენდემურ ვირუსად,“ - მოცემულ საკითხზე თენგიზ ცერცვაძემ ტელეკომპანია „რუსთავი 2“-ის გადაცემაში „სხვა შუადღე“ ისაუბრა.

წყარო: ​„სხვა შუადღე“

წაიკითხეთ სრულად