დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. რა არის ექსტრემალური კონტრაცეფცია? - მეან-გინეკოლოგი და ქირურგი ეკა ბუკია დღეს ამ თემაზე მოგაწვდით კომპეტენტურ ინფორმაციას.
ეს არის კონტრაცეფციის მეთოდი, რომელიც იცავს ქალს ორსულობისგან დაუცველი სქესობრივი აქტის დროს. უნდა იცოდეთ, რომ ექსტრემალური კონტრაცეფცია არ გიცავთ სქესობრივი გზით გადამდები დაავადებებისგან. ექსტრემალური კონტრაცეფციის მეთოდის გამოყენება შესაძლებელია სქესობრივი აქტის დასრულებისთანავე და აქტიდან 72 საათის განმავლობაში. ექსტრემალური კონტრაცეფცია ამცირებს დაორსულების რისკს, მაგრამ არ არის იმდენად ეფექტური, როგორც ყოველდღიური გამოყენების ჩასახვის საწინააღმდეგო აბებები ან პრეზერვატივი. ამ ტიპის კონტრაცეფციის გამოყენება უსაფრთხოა, თუმცა ზოგიერთ შემთხვევაში თან ახლავს სხვადასხვა სახის გართულებები.
ექსტრემალური კონტრაცეფციის დადებითი მხარეა ის, რომ მისი შეძენა შეგიძლიათ რეცეპტის გარეშე, ეფექტურობა - 95%.
როგორ უნდა მოვიქცეთ ექსტრემალური კონტრაცეფციის დროს?
დაუცველი სქესობრივი აქტის შემდეგ არაუგვიანეს 72 საათისა უნდა მიიღოთ მედიკამენტი. მოქმედების მექანიზმი მდგომარეობს ოვულაციის დათრგუნვაში (არ ხდება ფოლიკულის გახეთქვა, შესაბამისად, არც კვერცხუჯრედის განაყოფიერება).
რა გვერდითი მოვლენები შეიძლება ახლდეს თან ამ მეთოდის გამოყენებას?
შესაძლოა, იყოს შემდეგი გვერდითი ეფექტები:
- გულისრევა
- ღებინება
- ტკივილი მუცლის ქვედა არეში
- სისხლიანი გამონადენი საშოდან (მისი გახანგრძლივება შემდეგ მენსტრუალურ ციკლამდე)
- დაღლილობა
- თავის ტკივილი
- თავბრუსხვევა
- სარძევე ჯირკვლების ტკივილი
თუ მედიკამენტის მიღებიდან 2 საათში გექნათ ღებინება, დაურეკეთ თქვენს გინეკოლოგს და შეათანხმეთ, არის თუ არა საჭირო განმეორებით მედიკამენტის მიღება.
თუ მედიკამენტის მიღებიდან 3 კვირაში არ დადგა მენსტრუალური ციკლი, ჩაიტარეთ ტესტი ორსულობის დიაგნოსტირებისთვის.
თუ ექსტრემალური კონტრაცეფციის გამოყენების მიუხედავად ორსულობის ტესტი დადებითია, საჭიროა მიმართოთ გინეკოლოგს, რომ გამოირიცხოს საშილოსნოს გარე ორსულობის არსებობა.
ასევე უნდა იცოდეთ, რომ ერთი აბი გიცავთ ორსულობისგან მხოლოდ 1 დაუცველი სქეობრივი აქტის დროს და არა შემდგომი დაუცველი სქესობრივი აქტის დროს შესაძლო ორსულობისგან.
გისურვებთ ჯანმრთელობას!
არ დაგავიწყდეთ !!!
Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)
