როგორ შევინარჩუნოთ მეგობრები ოჯახის შექმნის შემდეგ?

მეგობრებს თამამად შეგვიძლია მეორე ოჯახიც ვუწოდოთ. ისინი გამუდმებით თქვენზე ზრუნავენ, დახმარებასა და სიყვარულს გთავაზობენ. მეგობრების გარემოცვაში თქვენ გულწრფელი და ნამდვილი ხართ, რის გამოც არავინ გკიცხავთ ან გსაყვედურობთ. ოჯახის შექმნის შემდეგ მეგობრებთან ურთიერთობა რომ არ გაგიფუჭდეთ, ყურადღებით გაეცანით ჩვენს სტატიაში შემოთავაზებულ საინტერესო რჩევებს.

ცხოვრების გარკვეულ ეტაპზე თქვენ ახლობლებისა და მეგობრების უკეთ გაცნობას ახერხებთ. ის ადამიანები, რომლებიც ცხოვრებას პესიმისტურად უყურებენ, ცდილობენ თქვენც საკუთარი ხედვის ტყვეობაში გამყოფონ. როგორც წესი, მსგავსი მეგობრები ყოველთვის ნეგატიურ რჩევებს გაძლევენ და თქვენს ოჯახურ ურთიერთობებს ანგრევენ. ეცადეთ, ასეთ ადამიანებთან ახლო ურთიერთობისგან თავი შეიკავოთ. ისეთ ადამიანებს დაუახლოვდით, რომლებსაც ენდობით და რომლებსაც თქვენი წარმატება ახარებთ. ასეთი მეგობრები თქვენთვის ძლიერ დასაყრდენს წარმოადგენენ და პიროვნულ განვითარებაშიც გეხმარებიან.
​

არ აქვს მნიშვნელობა, რამდენად ხანგრძლივი ურთიერთობა გაკავშირებთ თქვენს მეგობრებთან, მათთან გატარებული დროის ლიმიტირება მაინც მოგიხდებათ. მეგობრებს კარგად უნდა აუხსნათ, რომ ოჯახის შექმნის შემდეგ თქვენი პრიორიტებები მნიშვნელოვნად შეიცვალა და მათთან ყოველდღიურად დიდი დროის გატარებას ვეღარ შეძლებთ. ამასთან, აუცილებლად უთხარით თქვენთვის ძვირფას ადამიანებს, რომ ისინი შეუცვლელები არიან და მათთან ურთიერთობის გაწყვეტას არასდროს ისურვებდით.
​

თავისუფალ დროს ურთიერთობების შენარჩუნებისთვის კრიტიკული მნიშვნელობა აქვს. ოჯახის შექმნის შემდეგ თქვენ საკუთარი თავისთვის ძალიან ცოტა დრო გრჩებათ. ამ მხრივ განსაკუთრებით მას შემდეგ იზღუდებით, რაც ოჯახში ბავშვი ჩნდება. მიუხედავად ამისა, მეგობრების შენარჩუნება თუ გსურთ, მათთვის დრო აუცილებლად უნდა გამონახოთ. სატელეფონო ზარი ან სოციალური ქსელით კონტაქტი ურთიერთობის შენარჩუნებაში ძალიან დაგეხმარებათ. მეგობრის თვეში ერთხელ ნახვაც კი თქვენს ურთიერთობას უფრო გაამყარებს. თქვენთვის ძვირფას ადამიანთან ერთად წარსულის გახსენება და მომავალზე საუბარი რელაქსაციისთვის საუკეთესო საშუალებაა.
​

ქორწინება თქვენს ცხოვრებას რადიკალურად ცვლის, რის გამოც თქვენ მეგობრებისთვის უამრავი რამ გაქვთ სათქმელი. მიუხედავად ამისა, როდესაც მათ თქვენს შთაბეჭდილებებს გაუზიარებთ, მოთმინება გამოიჩინეთ და მეგობრებსაც ყურადღებით მოუსმინეთ. მათ საუბარს ნუ შეაწყვეტინებთ. თუ მათთან ურთიერთობისას ეგოისტურ ქცევებს გამოავლენთ, თქვენს მეგობრებს გულს ატკენთ. ყველა თქვენი ახლობელი ადამიანი დაოჯახებული ვერ იქნება, რის გამოც, შესაძლოა, მათთვის თქვენი მეუღლის ნათესავების და ახლობლების შესახებ ამბების მოსმენა არც ისე საინტერესო იყოს. ნუ ეცდებით, რომ მათ ყველა წვრილმანზე ერთბაშად ესაუბროთ. მხოლოდ ისეთ თემებზე ისაუბრეთ, რომელიც ყველასთვის საინტერესო იქნება.
​

თქვენი მეგობრები თქვენთვის სერიოზულ დასაყრდენს წარმოადგენენ. სწორედ ამიტომ მათთან საკუთარ პრობლემებზე საუბარი, შესაძლოა, ძალიან მოგწონდეთ, მაგრამ არ დაივიწყოთ, რომ თქვენი მეუღლეც თქვენი მეგობარია. თუ მხარდაჭერა გჭირდებათ, ის პირველ რიგში თქვენს მეუღლესთან უნდა ეძებოთ. მეგობრებს ოჯახზე წინ ნუ დააყენებთ. ნუ დაივიწყებთ, რომ თქვენს მეუღლეს თქვენი თანადგომა ძალიან სჭირდება. თუ თქვენს შორის ორმხრივი ნდობა და მეგობრობა ჩამოყალიბდება, თქვენი ურთიერთობის სიმყარეს საფრთხე აღარ დაემუქრება.
​

ძველ მეგობრებთან ურთიერთობის შენარჩუნება მნიშვნელოვანია, მაგრამ თქვენს ცხოვრებაში, შესაძლოა, გაუთვალისწინებელი შემთხვევები მოხდეს. ადამიანები იცვლებიან და ამ ფაქტს ვერაფერს მოუხერხებთ. შესაძლოა, ახალ ნაცნობებთან დაახლოვების სურვილი გაგიჩნდეთ. თუმცა, ახალი მეგობრების შეძენა სულაც არ გულისხმობს იმას, რომ ძველ მეგობრებთან ურთიერთობა უნდა გაწყვიტოთ. მიუხედავად ამისა, თქვენ, შესაძლოა, რამდენიმე ახლობელ ადამიანთან განშორება მოგიხდეთ, რათა ახალი მეგობრები შეიძინოთ. თუ გრძნობთ, რომ ძველ მეგობრებთან სიახლოვე აღარ გაქვთ, ახალი ნაცნობობის გაბმა ნუ შეგაშინებთ. შეგიძლიათ, მეუღლის მეგობრებსაც თამამად დაუახლოვდეთ და მათთან ერთად დრო სასიამოვნოდ გაატაროთ.
​

ოჯახის შექმნა სერიოზულ პასუხისმგებლობებს გაკისრებთ, თუმცა ამის გამო მეგობრებთან ურთიერთობა არ უნდა გაგიფუჭდეთ. მათ მიმართ მცირედი ყურადღების გამოჩენა და ურთიერთობებისთვის თავისუფალი დროის გამონახვა, თქვენს მეგობრობას უფრო გაამყარებს. 

მომზადებულია ​momjunction.com-ის მიხედვით

​თარგმნა ია ნაროუშვილმა