,,კიდევ ერთხელ ვაფიქსირებ ჩემს პირად პოზიციას: საქართველოსთვის მინდა მხოლოდ ფაიზერი ან მოდერნას ვაქცინები''

ექიმი რეზიდენტი გიორგი ღოღობერიძე COVID-19-ის ახალ შტამზე საუბრობს და აღნიშნავს, რომ დიდ ბრიტანეთში აღმოჩენილი ახალი შტამი, ჯერ კიდევ სექტემბერში ფიქსირდებოდა:

„საზოგადოებისთვის რამდენიმე დღეა ცნობილია, რომ დიდი ბრიტანეთის სამხრეთ ნაწილში დაფიქსირებულია კოვიდის ახალი შტამი. ამ ახალ შტამზე კი წერს მედია, რომ დეკემბერში აღმოჩნდაო, მაგრამ რეალურად დეკემბერში არ აღმოჩენილა. ეს შტამი ჯერ კიდევ სექტემბერიდან ფიქსირდებოდა. უბრალოდ დეკემბრის პერიოდში გახდა უფრო დომინანტური შტამი დიდ ბრიტანეთში. ერთ-ერთი გამოკვლევის დროს, როცა შეისწავლეს ვირუსის ნუკლეინის მჟავა, ნახეს, რომ თურმე ახალი შტამი ყოფილა და ამ ინფორმაციამ შეაშფოთა საზოგადოება. ჯერჯერობით არაა ასე ფართოდ გახმაურებული, მაგრამ კიდევ ერთი ახალი შტამია აღმოჩენილი, ეს არის სამხრეთ აფრიკის შტამი, ალბათ ამ დღეებში იტყვიან ამის შესახებაც ტელევიზიები. სამხრეთ აფრიკის შტამი და დიდი ბრიტანეთის შტამებია ახლა დომინანტი შტამები, რომლებმაც წინა ხაზზე წამოიწიეს,“ - საუბრობს ექიმი.

გიორგი ღოღობერიძე კორონავირუსის აგებულებას ხსნის და მოსახლეობას COVID-19-ის ახალ შტამზე ისეთ სიახლეებს აწვდის, რომლებიც პანიკის საფუძველს არ მისცემს:

„თუ თქვენ ერთხელ უკვე მოიხადეთ კოვიდინფექცია, მიუხედავად იმისა, რომ არის ახალი შტამები (დიდი ბრიტანეთის და სამხრეთ აფრიკის), ისინი ჩვენს ორგანიზმზე ვერ იქონიებენ გავლენას. მართალია, ეს ვირუსი ვრცელდება უფრო სწრაფად, მეტად გადამდებია, მაგრამ ის არ იწვევს მძიმე ინფექციებს, ჯერჯერობით ასე ჩანს (რადგან იგივე რჩება ვირუსის საერთო აგებულება). ის ვაქცინებიც, რომლებიც ახლა შეიქნა, 99%-იანი ალბათობით კვლავ აღმოჩნდება ეფექტური ამ შტამების წინააღმდეგ და რომც არ აღმოჩნდეს ეფექტური (ამის თეორიული ალბათობა 1%-ია), 6 კვირაში მაინც შეიქმნება ახალი ვაქცინა, ამიტომ ისევ მოხდება ამ ვირუსის განეიტრალება ძალიან მარტივად,“ - ამბობს გიორგი ღოღობერიძე.

დასასრულს ექიმი მოსახლეობას რჩევებს აძლევს:

„კორონავირუსი ორგანიზმში რჩება დაახლოებით 2 კვირის განმავლობაში, მაგრამ, როცა ადამიანის იმუნური სისტემა არის დაქვეითებული, შეიძლება ვირუსის რამდენიმე კვირის, თვის განმავლობაშიც დარჩეს. ამიტომაც არის, რომ იმ პაციენტებში ხდება კორონავირუსის მუტაციები, რომელთა იმუნური სისტემაც არის დათრგუნული. ჩემი რჩევა იქნება, რომ არ ინერვიულო, შეხვდი ამ ყველაფერს ძალიან მშვიდად. მერე რა, რომ ახალი შტამებია, ჩვენი სხეული მაინც ახერხებს მათთან გამკლავებას ძალიან მარტივად. შეიქმენი პოზიტიური განწყობა, ნუ ინერვიულებ, ნუ შეიქმნი სტრესით ხელოვნურ იმუნოდეფიციტს. არანაირი რეინფექციის რისკი ამ ახალი შტამისგან ჯერჯერობით არ არსებობს“, - დასძენს გიორგი ღოღობერიძე.