,,ამაზრზენია მხცოვანი და უკვე დაავადებული ადამიანის სიკვდილზე ოცნებობდე ან საჯაროდ ღლიცინებდე. წარმოუდგენელი და ამაზრზენი''

კოპენჰაგენში გამართულ ონლაინ ბრიფინგზე ჯანდაცვის მსოფლიო ორგანიზაციის ევროპის რეგიონალური ოფისის დირექტორმა ჟურნალისტებს განუცხადა, რომ მტკიცება, თითქოს კორონავირუსით დაინფიცირება მხოლოდ ასაკოვანი ადამიანების სიცოცხლეს უქმნის საფრთხეს, უდიდესი შეცდომაა. დაავადების მძიმე მიმდინარეობის უმთავრესი ინდიკატორი ასაკი არ არის.

კორონავირუსის რთული ფორმა ძალიან ბევრ თინეიჯერს და ახალგაზრდა ადამიანს ჰქონდა. თითოეული მათგანი ინტენსიურ მკურნალობას საჭიროებდა. რიგ შემთხვევებში კი ვირუსის რთულმა ფორმამ ახალგაზრდებსა და მოზარდებში ლეტალური შედეგებიც გამოიწვია.

ევროპაში ყველაზე ახალგაზრდა მსხვერპლი 12 წლის გოგონა იყო, რომელიც Covid-19-მა ბელგიაში იმსხვერპლა, ხოლო ამერიკის შეერთებულ შტატებში ვირუსით 6 კვირის ჩვილი გარდაიცვალა. ჯანდაცვის მსოფლიო ორგანიზაციის ცნობით 50 წლამდე გარდაცვლილ ადამიანთა 10-15 %-ს საშუალო ან მძიმე მიმდინარეობის ვირუსი ჰქონდა.

ჯანდაცვის მსოფლიო ორგანიზაციის ცნობით, ასაკოვანი ადამიანები, რომლებსაც კარგი ჯანმრთელობა აქვთ, კორონავირუსს წარმატებით უმკლავდებიან. მსოფლიო მასშტაბით კლინიკებს არაერთმა 100 წელს გადაცილებულმა ინფიცირებულმა მიმართა, თუმცა მათი ნაწილი დღეს სრულიად გამოჯანმრთელებულია.

ჯანდაცვის მსოფლიო ორგანიზაციის ევროპის რეგიონული ოფისის დირექტორის თქმით, რეგიონში კორონავირუსის სულ 464, 859 შემთხვევა დაფიქსირდა, მათ შორის 30,098 ფატალურად დასრულდა.

ლეტალური შემთხვევების 80 %-ში ადამიანებს რაიმე სახის თანმდევი დაავადება ჰქონდათ, მათ შორის, ყველაზე ხშირი დიაბეტი და გულ-სისხლძარღვთა დაავადებები იყო.

მომზადებულია ​rte.ie-ის მიხედვით

თარგმნა ია ნაროუშვილმა