Baby Bag

„ჩემი კლასელები არაფრად მაგდებენ, არავის ესმის ჩემი,“- შალვა ამონაშვილის რჩევები ბავშვებს, რომლებსაც სკოლაში მეგობრების შეძენა უჭირთ

„ჩემი კლასელები არაფრად მაგდებენ, არავის ესმის ჩემი,“- შალვა ამონაშვილის რჩევები ბავშვებს, რომლებსაც სკოლაში მეგობრების შეძენა უჭირთ

აკადემიკოსმა შალვა ამონაშვილმა 12 წლის გოგოს შეკითხვას უპასუხა, რომელსაც კლასში ბავშვებთან დამეგობრების პრობლემა აქვს:

„ვარ 12 წლის გოგო. არავის ესმის ჩემი. ასე გამოდის, რომ ჩემი კლასელები არაფრად მაგდებენ. ერთი კვირა რომ არ მივიდე კლასში, ვერავინ შეამჩნევს. ნუ გწყინსო, რომ მეუბნებიან, ესეც მწყინს. არ მინდა, რომ მწყინდეს. როგორ დავიმეგობრო ბავშვები?“

შალვა ამონაშვილმა 12 წლის მოსწავლეს ურჩია, რომ კლასელებთან ინიციატივა მან თავად გამოიჩინოს და მათ მეგობრობა დაუმტკიცოს:

„ჩემო ძვირფასო, შეუძლებელია, რომ არავინ არ გამჩნევდეს. ვიღაც კიდეც გამჩნევს, თვალს გადევნებს, მოსწონხარ. ხანდახან ასეა, რომ გამჩნევენ, უნდათ, რომ მოვიდნენ, მაგრამ თავმოყვარეობა ხელს უშლით. ეს გულში არ ჩაიდო, რომ ვერ გამჩნევენ, პატივს არ გცემენ. თუ ამას გულში ჩაიდებ, შენვე ჩაკეტავ გზას მეგობრობისკენ. შენს თავს უთხარი: „ყველა მიცნობს, ყველას ვუყვარვარ, მეც მიყვარს ყველა, ყველასთან უნდა ვიმეგობრო.“ ​არ შეიძლება, რომ შენს კლასში ერთი ვიღაც მაინც შენთან არ მეგობრობდეს. დაუმტკიცე იმას შენი კარგი მეგობრობა.“

„არ უცადო, როდის დაგიმტკიცებს სხვა მეგობრობას. შენ დაუმტკიცე ერთგულებით, იმით, რომ არაფერი გშურს მისი, შეეშველო, მოუსმინო, მისი საიდუმლო შეინახო. იმ ერთის მეშვეობით მეორე გაგიჩნდება, მესამე, მეხუთე და მთელი კლასი შენი მეგობარი გახდება. მოთმინება იქონიე. მოუთმენლობას თუ გამოვიჩენთ, შეიძლება მომავალი შეგვეზღუდოს და რაც კარგი უნდა მომხდარიყო, არ მოხდეს. შენი სიყვარული, შენი კეთილი დამოკიდებულება არავის არ მოაკლო კლასში. არ ელოდო, რომ შენ მოგექცნენ კარგად, რომ მერე შენ მოექცე. ეს არის, რაც შენ გაგხდის მაგნიტს და თანდათანობით უფრო მოგიზიდავს მეგობრებს. აბა შენ იცი, როგორ გამოიყენებ ამ რჩევებს,“- აღნიშნა შალვა ამონაშვილმა.

წყარო: ​„ამონაშვილის აკადემია“

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

„თუ მასწავლებელს რწმენა არ აქვს, მას ყოველთვის შეეშლება ბავშვთან ურთიერთობაში და გადავა ძა...
​აკადემიკოსმა შალვა ამონაშვილმა ჰუმანური პედაგოგიკის ქრისტიანული საფუძვლების შესახებ ისაუბრა. მისი თქმით, კლასიკური პედაგოგიკა მთლიანად ქრისტიანობას ეფუძნება:„ჰუმანური პედაგოგიკა ქრისტიანობიდან გამოდი...

შეიძლება დაინტერესდეთ

5 გზა ბავშვის აზროვნების უნარის გასავითარებლად

5 გზა ბავშვის აზროვნების უნარის გასავითარებლად

ბავშვის აზროვნების უნარის განვითარებაზე ზრუნვა პირველივე წლიდანვე უნდა დაიწყოთ. მნიშვნელოვანია, რომ პატარას დამოუკიდებლობისკენ სწრაფვაში ხელი შეუწყოთ და მისი მისწრაფებები წაახალისოთ. თქვენი შვილის აზროვნების უნარის განვითარებაზე თუ ზრუნავთ, ჩვენ მიერ შემოთავაზებულ მარტივ აქტივობებს ყურადღებით გაეცანით. მათი გამოყენებით ​ბავშვს დამოუკიდებლად მოქმედებასა და აზროვნების უნარის გაუმჯობესებაში დაეხმარებით.

1. მოამზადეთ ბავშვი ხოხვისა და სიარულისთვის

ბავშვი იატაკზე ხოხვის, ჯდომისა და სიარულისთვის მზადებას მუცელზე წოლით იწყებს. თქვენი პატარა ხალიჩაზე ყოველდღიურად დააწვინეთ მუცლით. შესაძლოა, თავდაპირველად, მას ეს არ მოეწონოს, რის გამოც​ ყველაფერი ფრთხილად უნდა გააკეთოთ. ბავშვი თავდაპირველად მუცელზე დაიწვინეთ, თავად კი ხალიჩაზე ზურგით დაწექით. როდესაც ბავშვი ხალიჩაზე მუცლით წოლას თავადაც შეძლებს, მას ახლოს სათამაშოები დაულაგეთ. ბავშვმა უნდა სცადოს სათამაშოების ახლოს მოზიდვა. თავდაპირველად ბავშვი ხალიჩაზე 2-5 წუთით უნდა დატოვოთ. დროთა განმავლობაში კი ეს დრო 20 წუთამდე შეგიძლიათ გაზარდოთ.

2. ბავშვს წიგნები წაუკითხეთ

კითხვა ბავშვს ახალ სიტყვებს აცნობს და ის მშობლიურ ენას უკეთ ეცნობა. როდესაც მშობელი მას წიგნს უკითხავს, ბავშვი კითხვის პროცესში აქტიურად ერთვება. კითხვისას მაქსიმალური მონდომება გამოიჩინეთ. გაახმოვანეთ ნაწარმოების პერსონაჟები და საგნები. თითოეული პერსონაჟის გახმოვანებისთვის სხვადასხვა ხმის ტემბრი და მიმიკა გამოიყენეთ. ბავშვს წიგნში გამოსახულ ფიგურებსა და საგნებზე ხელით მიუთითეთ. პატარებს ძალიან უყვართ ხმოვანი წიგნები, რომლებიც ფერადი ნახატებით ძალიან მდიდარია. მსგავსი წიგნები განსაკუთრებით მოსწონთ 6-12 თვის ასაკის პატარებს.

3. თქვენს შვილს ხშირად ესაუბრეთ

რაც უფრო მეტ სიტყვას მოისმენს ბავშვი ადრეული ასაკიდან, მით მეტად გაუადვილდება მას საუბრის დაწყება და აზრის გამართულად გადმოცემა. ​თქვენი მოსმენა ბავშვს საუბრის რიტმის შესწავლაშიც ეხმარება, ის სწავლობს როგორ დასვას კითხვები, როგორ ჩამოაყალიბოს წინადადება. მართალია, თანამედროვე ბავშვებს თანატოლებთან და უფროსებთან კომუნიკაციის დეფიციტი აქვთ, თუმცა ეს დანაკლისი თქვენ უნდა შეავსოთ. შეგიძლიათ ბავშვთან ერთად ენობრივი თამაშები ითამაშოთ.

4. იყავით თქვენი შვილის გულშემატკივარი

ხელი ჩასჭიდეთ თქვენს შვილს, გაუღიმეთ, გაამხნევეთ, როდესაც სიახლესთან ზიარებას ცდილობს. ეს ბავშვს მეტ სითამამეს შესძენს, ის სწავლისა და ახალი აღმოჩენებისადმი მეტად გახსნილი გახდება. მშობელთან მიჯაჭვულობა ბავშვს მეტ გამბედაობას სძენს, რათა დამოუკიდებელი ნაბიჯების გადადგმა სცადოს.

5. თამაშს განსაკუთრებული მნიშვნელობა მიანიჭეთ

თამაში ბავშვს გარემოს შესწავლაში ეხმარება. ის მიზეზ-შედეგობრივი კავშირების აღმოჩენას იწყებს.​ თქვენი შვილი წაახალისეთ, რომ მან წარმოსახვითი თამაშები შეიყვაროს. ბავშვს სათამაშო ჭიქა მიაწოდეთ და დააკვირდით, დაიწყებს თუ არა ჭიქიდან წყლის დალევას. ახალი აღმოჩენები და მნიშვნელოვანი უნარების ათვისება ბავშვის ტვინს განვითარებაში ძალიან ეხმარება.

მომზადებულია​ parents.com -ის მიხედვით

თარგმნა ია ნაროუშვილმა

წაიკითხეთ სრულად