Baby Bag

„თუ დედა დაუღეჭავად კოვზით ჩქარ-ჩქარა აყლაპებს ბავშვს საკვებს, სითბოს არ გამოხატავს მის მიმართ, ირღვევა კვებითი დამოკიდებულება,“- ნათია ფანჯიკიძე

„თუ დედა დაუღეჭავად კოვზით ჩქარ-ჩქარა აყლაპებს ბავშვს საკვებს, სითბოს არ გამოხატავს მის მიმართ, ირღვევა კვებითი დამოკიდებულება,“- ნათია ფანჯიკიძე

ფსიქოლოგმა ნათია ფანჯიკიძემ კვებითი აშლილობების გამომწვევ მიზეზებზე ისაუბრა და აღნიშნა, რომ პრობლემის სათავე, შესაძლოა, ადამიანის ადრეულ ბავშვობაში იმალებოდეს:

„დროული ჩარევა აუცილებელია, განსაკუთრებით, თუ გენეტიკაში არის რომელიმე რთული კვებითი აშლილობა. მაგალითად, ანორექსია ფსიქიკურ დაავადებათა შორის ნომერი პირველია სიკვდილიანობით.

ყურადღების მიქცევა ყველაზე სწორია ორალურ ფაზაში, ძალიან მცირეწლოვან ბავშვობაში. როგორც წესი, ამ ფაზაში ირღვევა კვებითი დამოკიდებულება. თუ დედა დაუღეჭავად კოვზით ჩქარ-ჩქარა აყლაპებს საკვებს, სითბოს არ გამოხატავს მის მიმართ, თუ ბავშვი გაჯეტებში უყურებს ამ დროს რამეს, ვერ კონცენტრირდება გემოზე, ფაქტურაზე, ვერ იღებს პროცესისგან სიამოვნებას, როგორც წესი ამის რეპლიკა არის ერთგვარი ჩაყრა საკვების, სიცარიელის ამოვსება.

ფროიდის მიხედვით ორალურ ფაზაში, როდესაც ბავშვი გადადის კბენაზე, ამ დროს მას რომ ვწევთ გვერდზე, მაშინ იღებს ტრავმას, რომ სიამოვნების მიღება მისთვის ყოველთვის არ არის შეთავაზებული. ძალიან მცირეწლოვან ასაკში როგორ ვეფერებით ბავშვს, კვების პროცესი როგორი სიამოვნებით და სიმშვიდით არის სავსე, ეს მას აუცილებლად გამოადგება მოზარდობაში. მოზარდობაში ყურადღება უნდა მივაქციოთ რამდენად ჭარბია და მუდმივია ბავშვის ასეთი თვითაღქმა, რომ ის არ არის საკმარისად ლამაზი, გამხდარი,“- აღნიშნულ საკითხზე ნათია ფანჯიკიძემ ტელეკომპანია „ფორმულას“ გადაცემაში „ჯანმრთელობის ფორმულა“ ისაუბრა.

წყარო: ​„ჯანმრთელობის ფორმულა“

შეიძლება დაინტერესდეთ

გულის რიტმის აჩქარება კოვიდის გადატანის შემდეგ - კარდიოლოგი გიორგი პაპიაშვილი გულის რიტმის დარღვევის გამომწვევ მიზეზებზე

გულის რიტმის აჩქარება კოვიდის გადატანის შემდეგ - კარდიოლოგი გიორგი პაპიაშვილი გულის რიტმის დარღვევის გამომწვევ მიზეზებზე

კარდიოლოგმა გიორგი პაპიაშვილმა კოვიდის გადატანის შემდეგ გულის რიტმის აჩქარების პრობლემაზე ისაუბრა და მისი გამომწვევი სავარაუდო მიზეზები დაასახელა:

„პანდემიის ეპოქაში ვცხოვრობთ და ძალიან ბევრმა ადამიანმა გადაიტანა უკვე კოვიდ-19. ძალიან ბევრი პაციენტი დაგროვდა ასეთი სიმპტომებით. ნამდვილად არ არის ეს გადაჭარბებული. საკმაოდ ბევრი პაციენტი უჩივის კოვიდის გადატანის შემდეგ გულის რიტმის გარკვეულ დარღვევებს. კოვიდს მთელს ორგანიზმზე აქვს გავლენა და ის გულზეც სერიოზულ გავლენებს ახდენს. ზოგ სიტუაციაში კოვიდი იწვევდა გულის კუნთის ანთებას, ზოგ სიტუაციაში იწვევდა თრომბოზების განვითარებას, აქედან გამომდინარე გულის კუნთის შემდგომ დაზიანებას. არის ასევე აღწერილი არაერთი შემთხვევა, როდესაც კოვიდმა გამოიწვია არა უშუალოდ გულის კუნთის დაზიანება, არამედ გულის ნერვების. ყველა ორგანოს აქვს თავისი ნერვები და ნერვული რეგულაცია. ჩვენს გულსაც აქვს ავტონომიური ნერვული რეგულაცია, რომელიც განაპირობებს იმას, თუ როგორ პასუხობს გული კონკრეტულ სიტუაციას. ეს ხორციელდება ნერვების საშუალებით. აღწერილია შემთხვევები ამ ნერვული დაბოლოებების დაზიანების. ეს იწვევს იმას, რომ კოვიდის გადატანის შემდეგ გახშირებულია შეუსაბამო სინუსური ტაქიკარდია. 

როდესაც სირბილის დროს გული ჩქარდება, ამას ჰქვია სინუსური ტაქიკარდია, რადგან მას აქვს თავისი მიზეზი. ვირბინეთ და აგვიჩქარდა გული. ძალიან გახშირებულია შეუსაბამო სინუსური ტაქიკარდია, რომელიც არ რის გამოწვეული კონკრეტული გამღიზიანებლით. არც გვირბენია, არც გვინერვიულია, მაგრამ მაინც ძალიან აჩქარებული გვაქვს გული. გვაქვს შემთხვევები, როდესაც ადგომისას, წამოჯდომისას, შეუსაბამოდ უჩქარდება ადამიანს გული. ამ ნერვული დისრეგულაციის მკურნალობის მზა რეცეპტი არ არსებობს. ხშირ შემთხვევაში უბრალო სიმპტომური დახმარება არის ხოლმე საჭირო და დროთა განმავლობაში ორგანიზმი ახდენს ამის დაბალანსებას.

როდესაც ვნახავთ, რომ კოვიდის შემდეგ ადამიანს აჩქარებული გულისცემა აქვს, არ ნიშნავს, რომ პირდაპირ ეს დიაგნოზი უნდა დავსვათ. ცხადია, ჩასატარებელია კვლევები, რომ სხვა ცნობილი დაავადებები გამოვრიცხოთ, რომელიც გულის რიტმის დარღვევას იწვევს. თუ ვხედავთ, რომ სხვა დაავადებები გამოირიცხა და კლინიკური მიმდინარეობა ჩვენ მიერ ჩამოთვლილ სიმპტომატიკას შეესაბამება, მაშინ ამას უკვე ვარქმევთ ამ სახელს და ვიცით, რომ ეს არის კოვიდის მიერ დატოვებული კუდი,“- მოცემულ საკითხზე გიორგი პაპიაშვილმა საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო:​ „პირადი ექიმი - მარი მალაზონია“

წაიკითხეთ სრულად