Baby Bag

ნეგატიური მეგობრები ბედნიერებას და სიმშვიდეს გართმევენ, ისინი დასახული მიზნების მიღწევაშიც ხელს გიშლიან

ნეგატიური მეგობრები ბედნიერებას და სიმშვიდეს გართმევენ, ისინი დასახული მიზნების მიღწევაშიც ხელს გიშლიან
ფსიქოლოგია

​ნეგატიურ ადამიანებს მეგობრებთან ურთიერთობა მარტივად უფუჭდებათ, ისინი მათთან დროის სასიამოვნოდ გატარებას და მშვიდად საუბარს იშვიათად ახერხებენ. ნეგატიური მეგობრები ბედნიერებას და სიმშვიდეს გართმევენ, ისინი დასახული მიზნების მიღწევაშიც ხელს გიშლიან. თუ თქვენი მეგობარი ნეგატიური ადამიანია, მასთან ურთიერთობა სწრაფად უნდა გაწყვიტოთ.

  • ნეგატიური მეგობრები ენერგიას გართმევენ

ნეგატიურ მეგობართან ყოფნისას უსიამოვნო ფიქრებს, ალბათ, არაერთხელ შეუწუხებიხართ და მისი პესიმიზმიც გადმოგდებიათ. ნეგატიური მეგობრები ენერგიას გართმევენ და გამოფიტულს გტოვებენ, რადგან მათი პირადი ამბების მოსმენა საკმაოდ რთულია. თქვენ გამუდმებით დრამის მონაწილე ხართ, სულიერ და გონებრივ რესურსს ფუჭად ხარჯავთ. თქვენ გვერდით ისეთი ადამიანები უნდა იყოლიოთ, ვინც გაძლიერებთ და მოტივაციას გმატებთ. ნამდვილი მეგობარი გვირაბის ბოლოს სინათლეს დაგანახებთ და დაგარწმუნებთ, რომ მას ხელს აუცილებლად მიაწვდენთ. ის ნებისმიერი სირთულის გადალახვაში დაგეხმარებათ. თუ მეგობართან ურთიერთობისას ყოველთვის მის პრობლემებს ისმენთ და მას ანუგეშებთ, ენერგიისგან დაიცლებით. მსგავსი ურთიერთობები ძალიან სახიფათოა და ადამიანის სრულ გამოფიტვას იწვევს.

  • ნეგატიური მეგობრები თქვენს ინტერესებზე არასდროს ფიქრობენ

მეგობრობამ ძირს არ უნდა დაგცეთ. მან უნდა გაგაძლიეროთ და წინსვლაში დაგეხმაროთ. ნამდვილი მეგობარი, რომელსაც თქვენი ესმის, თქვენს ნუგეშისცემას, მოტივირებას და გაძლიერებას ეცდება. ის ყოველთვის თქვენი ინტერესებით იხელმძღვანელებს. ნეგატიური მეგობრები ყოველთვის თქვენგან ელიან დამხარებას, მათ არ აინტერესებთ თქვენ რა გჭირდებათ და რა გიჭირთ. მათ სურთ, რომ ყოველთვის მოუსმინოთ. ნეგატიური მეგობრისთვის თქვენ მხოლოდ ყური ხართ, რომელიც მის პრობლემებს ისმენს. თქვენი გრძნობები და განცდები მისთვის უინტერესოა. მსგავსი ადამიანებისგან თავი შორს დაიჭირეთ! ისინი მხოლოდ საკუთარ თავზე ფიქრობენ და სხვა ინტერესები არ აქვთ.

  • ნეგატიურ მეგობრებს თქვენი წარმატება არ უხარიათ

ნეგატიური მეგობარი არ გამხნევებთ და წარმატების მოპოვებაში არ გეხმარებათ, რადგან მას თქვენთვის კარგი არ სურს. ის ყოველთვის ცდილობს გეგმები ჩაგიშალოთ და მაქსიმალურად დიდი დრო წაგართვათ. ნეგატიურ მეგობარს თქვენი წარმატება აშინებს, რადგან ფიქრობს, რომ თქვენს ცხოვრებაში მისი ადგილი აღარ დარჩება. ეს მისი ყველაზე დიდი შიშია, რის გამოც ის თქვენს გამხნევებას არასდროს ეცდება. ასეთ ადამიანთან მეგობრობას ნამდვილად არ გირჩევთ.

  • ნეგატიურ ადამიანებს სურთ, რომ თქვენც პესიმისტ ადამიანად იქცეთ

ნეგატიურ ადამიანებს სურთ, რომ თავადაც ნეგატიური ხალხით იყვნენ გარშემორტყმული. თუ წარმატების მიღწევა გსურთ, ნეგატიურ ადამიანთან მეგობრობას არ გირჩევთ. მისი სასოწარკვეთა პოზიტიურ განწყობას წაგართმევთ და უკან დაგხევთ. პესიმიზმი ინფექციაა, ის თქვენში იჭრება და ეჭვებით გავსებთ. თქვენ ფიქრობთ, რომ წარმატების მიღწევა არ შეგიძლიათ, რადგან სათანადო უნარები არ გაქვთ. ნეგატიური მეგობარი მიზნისკენ სვლაში ხელს გიშლით და პასიურობისკენ გიბიძგებთ. წარმატების მიღწევა თუ გინდათ, გახსნილი და რისკიანი ადამიანი უნდა იყოთ. ნეგატიური მეგობარი ეჭვებით გავსებთ და სხვა ადამიანებისადმი ნდობას გაკარგვინებთ, რაც წინსვლაში ხელს ძალიან შეგიშლით.

  • ნეგატიური მეგობარი დიდი მიზნების მიღწევაში ხელს გიშლით

დიდი მიზნები თუ გაქვთ და წარმატებაზე ოცნებობთ, ნეგატიური მეგობრები ამის შესაძლებლობას ნაკლებად მოგცემენ. ნეგატიურობა თქვენს ცხოვრებას იმდენად მოიცავს, რომ მისგან თავის დაღწევას ვეღარ შეძლებთ. ის თქვენს ოცნებებს და მიზნებს ჩაანაცვლებს. თქვენს პოზიტიურ განწყობას ვინმე თავისი ნეგატიური აზრებით თუ ამსხვრევს, მისგან თავი შორს დაიჭირეთ. ნეგატიურ ადამიანთან პოზიტიური ვერ იქნებით. ის ამის შესაძლებლობას არ მოგცემთ.

მეგობრები სიფრთხილით შეარჩიეთ. ნეგატიურ ადამიანებს თქვენი ცხოვრების ხარისხის მნიშვნელოვნად გაუარესება შეუძლიათ. ნამდვილი მეგობრები კი წარმატების მიღწევაში დაგეხმარებიან და გასაჭირში არასდროს მიგატოვებენ.

მომზადებულია​ everydaypower.com -ის მიხედვით

თარგმნა ია ნაროუშვილმა

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

გამუდმებით სხვისი წუწუნის მოსმენა ენერგიას გართმევთ და ემოციურ სტაბილურობას გაკარგვინებთ
​ადამიანები, რომლებიც გამუდმებით წუწუნებენ, გარშემომყოფების განწყობაზე ნეგატიურად ზემოქმედებენ. თანამედროვე სამყაროში მოთხოვნილებები იმდენად გაიზარდა, რომ თითქმის ყველა ადამიანი რაღაცით უკმაყოფილოა. თ...
#საინტერესო #სიყვარული #მეგობრობა ფსიქოლოგია

შეიძლება დაინტერესდეთ

მცოდნე დედები

„ვეხმარები ცოლს“ - მამები ხშირად ამბობენ ამ ფრაზას, როდესაც ბავშვის მოვლას ეხება საქმე - რა უნდა გააკეთოს ქალმა, რომ ქმარმა თავისი შვილის გაზრა/აღზრდაში თავისი წილი პასუხისმგებლობა აიღოს?

„ვეხმარები ცოლს“ - მამები ხშირად ამბობენ ამ ფრაზას, როდესაც ბავშვის მოვლას ეხება საქმე - რა უნდა გააკეთოს ქალმა, რომ ქმარმა თავისი შვილის გაზრა/აღზრდაში თავისი წილი პასუხისმგებლობა აიღოს?

„ვეხმარები ცოლს“ - მამაკაცების მიერ ხშირად თქმული ფრაზა, რომლითაც ვიგებთ, რომ ისინი ვერ იაზრებენ თავიანთ მოვალეობას. რატომ არის დამკვიდრებული ეს სტერეოტიპი და როგორ უნდა გადაიჭრას საკითხი? - ამ და სხვა თემებზე ​MomsEdu.ge-ს ესაუბრა ფსიქოლოგი ირინა ტაბუციძე.

​- „ვეხმარები ცოლს“ - მამები ხშირად ამბობენ ამ ფრაზას, როდესაც ბავშვის მოვლას ეხება საქმე, თუმცა ეს დახმარება კი არა, მათი მოვალეობაა. რატომ არის დამკვიდრებული ეს სტერეოტიპი?
​
- ჩვენს საზოგადოებაში ისეთი დამოკიდებულება ჩამოყალიბდა, რომ ბავშვზე და ოჯახის საქმეებზე ზრუნვას ქალი იღებს თავის თავზე. ხშირ შემთხვევაში ქალის ხელშია, როგორ დაგეგმოს ბავშვების დღის გრაფიკი, როგორ მოამარაგოს ოჯახი, ბავშვების განათლების საკითხები და ა.შ., რა თქმა უნდა, ყველას არ ეხება. ამიტომ, მამაკაცისთვის, ერთი მხრივ, კომფორტულია, როდესაც დამხმარის ფუნქცია აქვს და შესაბამისად, პასუხისმგებლობა ნაკლებია. მეორე მხრივ, ვერ ერთვებიან და ქალებიც არ უშვებენ, ასე ვთქვათ, „სამზარეულოში“.
​
- ხშირ შემთხვევაში ცოლები ეუბნებიან ამ ფრაზას ქმრებს - ,,დამეხმარე’’, თითქოს თავადაც არა აქვთ გაცნობიერებული, რომ ქმრები მათ კი არ ეხმარებიან, არამედ თავიანთ შვილებს ზრდიან, როგორ უნდა გადაიჭრას ეს საკითხი?
​
- დიახ, ხშირად ისინი ამაყობენ, რომ ქმარი მათ ეხმარება. თუ რაღაცას უკეთებს, ითვლება გაკეთებულ სიკეთედ და ე.ი. კარგი მეუღლე ჰყავს. რეალურად მივდივართ პასუხისმგებლობების და პრიორიტეტების განაწილებამდე. თუ წყვილი თანხმდება თავიდანვე, რომ ერთს მთლიანად აღებული აქვს, ვთქვათ, ფინანსური მხარე და მეორეს ოჯახური საქმეები, რა თქმა უნდა, ასეთ შემთხვევაში ურთიერთმოლაპარაკების შედეგად, ერთი მეორეს სფეროში იქნება დამხმარე. სამწუხაროდ, ასე არ ხდება ყოველთვის, ხანდახან ქალის მხრებზე გადადის ფინანსური მხარეც, საოჯახო საქმეც. ამ შემთხვევაშიც დახმარებას ეძახიან ქმრის საქმიანობას და ამაყობენ, რაც არ უნდა უცნაური იყოს. ძალიან რთულია მთელი ეს შეხედულებები და დამოკიდებულება შეცვალო, რაც მშობლებისგან მოჰყვებათ, იმათ კიდევ თავიანთი მშობლებისგან და ასე პატარაობიდან გვასწავლიან, რომ ეს ნორმაა. თუ ქალი და კაცი თანაბრად იქნება დაკავებული მთელი დღე, ბუნებრივია, საღამოს რეალობა მოითხოვს, რომ საქმე გაინაწილონ, ერთი ადამიანი ფიზიკურად ვერ შეძლებს. ალბათ, სიტუაცია თვითონ შეცვლის და გამოასწორებს ამ პრობლემას. როგორც სხვა ქვეყნებმა გაიარეს ეს გზა, ჩვენც გავივლით. მგონი, ვდგავართ უკვე ამ გზაზე და იძულებული გავხდებით, გავინაწილოთ შრომა, გვინდა თუ არ გვინდა.
​
- რა უნდა გააკეთოს ქალმა, რომ ქმარმა თავისი შვილის გაზრა/აღზრდაში თავისი წილი პასუხისმგებლობა აიღოს?
​
- ძალიან ხშირად შევსწრებივარ სიტუაციას, როდესაც ქმარი წყვეტს, ბავშვი სად წაიყვანოს, გამოუცვალოს და ა.შ, ხოლო დედები მივარდებიან ხოლმე, „ხელი არ მოკიდო, მე ვიზამ“ და მსგავსი ფრაზებით, თითქოს არ ენდობიან ან ისე ვერ მოუვლის, როგორც დედა. ადრეული ასაკიდან ვაჩვევთ ხოლმე ქმრებს, რომ ეს მათი საქმე არ არის, რაც ხშირად ჩვენდაუნებურად ხდება, ყოველთვის არ არის გააზრებული, რადგან სხვადასხვა სტერეოტიპის ქვეშ ვართ. მესმის, რომ ასეთი ქალბატონებისთვის შეიძლება დისკომფორტი იყოს, მაგრამ, როგორც კი მამა ინიციატივას იჩენს, ამისი წახალისება უნდა მოხდეს დიდი დოზით, შექება, რომ კარგად გამოსდის ბავშვის დაბანა, გასეირნება... რაც უფრო ადრეული ასაკიდან არის მამა ჩართული და ამაგი მეტი აქვს, რა თქმა უნდა, შემდეგ სხვა ურთიერთობებში გადადის და ბუნებრივად ნაწილდება მოვალეობები, ყველა მოგებული რჩება.
​
- ხშირად ამ საკითხში ბებიებიც ერთვებიან - თუ ქალი ქმარს ბავშვთან დახმარებას სთხოვს, ბებიები გარბიან მათთან და ქმარს ასე ვთქვათ, ასვენებენ. რამდენად ნორმალურია ეს მიდგომა?
​
- იდეალურ ვარიანტში ცოლ-ქმარი უნდა ცხოვრობდეს მარტო, ამ დროს მეტია ალბათობა, რომ საქმე გადანაწილდეს და ყველაზე მოგებული ბავშვი დარჩეს ამ სიტუაციაში. ბებიებს და ბაბუებს თავისი ფუნქცია აქვთ. ისინი რომ სიყვარულს, სითბოს გამოხატავენ, ასეთი ზრუნვის გამოხატვას ახალგაზრდა მშობლები ხშირად ვერ ახერხებენ, რადგან უბრალოდ არ სცალიათ ამისთვის. თუ მათ არ ჰყავთ ჩანაცვლებული ბავშვის დედ-მამა და უბრალოდ ბებია-ბაბუის როლი აქვთ, ამ დროს არ ზიანდება არაფერი, ვინაიდან ბავშვი იზრდება დედის და მამის მითითებებით. კარგ ვარიანტში, ბებია, რომელიც მონაწილეობს ბავშვის აღზრდაში, უნდა უთანხმებდეს დედას, რა არის ნებადართული მისი შვილისთვის, რა არ არის, რაზე შეიძლება საყვედური უთხრა და ა.შ. თუმცა, თუ დიდ ოჯახში ერთად ცხოვრობენ, ხშირად ბებია-ბაბუას ჰგონიათ, რომ შვილს უჩაგრავენ და თვითონ უვლიან ბავშვს, რადგან მათმა შვილმა, სამსახურიდან მოსულმა, დაისვენოს. საბოლოო ჯამში, გასაგებია, რომ ეს ძალიან დათვური სამსახურია და სიკეთე არ მოაქვს. ცალკე საკითხია, თუ რას ხედავდა მამა თავის ოჯახში, როგორ ექცეოდა მამამისი. მესმის, რომ ეს მთელი ჯაჭვია, მაგრამ სადღაც ამის შეცვლაც შესაძლებელია. მგონია, რომ ამასთან ხელოვნურად ბრძოლას აზრი არ აქვს, დროს თავისი მოაქვს, მაქსიმუმ ერთი თაობა და ყველაფერი შეიცვლება.
​
ესაუბრა მარიამ ჩოქური

წაიკითხეთ სრულად
გასათიშად დააჭირეთ ESC.