Baby Bag

„სიმაღლეში ზრდის ხელშეწყობისთვის სტაფილო ბავშვმა აუცილებლად უნდა მიიღოს ცხიმიან საკვებთან ან რძის პროდუქტებთან ერთად,“- ლაშა უჩავა

„სიმაღლეში ზრდის ხელშეწყობისთვის სტაფილო ბავშვმა აუცილებლად უნდა მიიღოს ცხიმიან საკვებთან ან რძის პროდუქტებთან ერთად,“- ლაშა უჩავა

ენდოკრინოლოგმა ლაშა უჩავამ ბავშვის სიმაღლეში ზრდის ხელშემწყობი ფაქტორების შესახებ ისაუბრა:

„სიმაღლეში ზრდასთან დაკავშირებით ძალიან ბევრი მითი არსებობს. ჭარხალი, სტაფილო, ლიმონი, რძე ნამდვილად შეიცავს იმ ნივთიერებებს, რომლებიც აუცილებელია ჩვენი ძვლოვანი სტრუქტურისა და კუნთოვანი ქსოვილის ზრდისთვის. განსაკუთრებით მნიშვნელოვანია სტაფილო, რომელიც ვიტამინ A-ს შეიცავს. ის უნდა მივიღოთ რძესთან კომბინაციაში. უნდა გვახსოვდეს, რომ სტაფილოს მიღება ცალკე, როგორც პროდუქტის, არ გვეხმარება ზრდის ხელშეწყობაში. ის აუცილებლად უნდა მივიღოთ ცხიმიან საკვებთან ერთად, ან უნდა იყოს მცენარეულ ზეთთან ერთად გახეხილი, ან რძის პროდუქტებთან ერთად მიღებული. რძეს აქვს თავისი ცხიმიანობა, რომელიც უფრო მარტივად აათვისებინებს ორგანიზმს A ვიტამინს. რძის პროდუქტები პირდაპირ კავშირშია ზრდასთან. ჩვენ ვიცით, რომ რძე შეიცავს ცილოვან სტრუქტურას, რომელიც კუნთოვანი მასის ზრდა-განვითარებისთვის მნიშვნელოვანია. რძის პროდუქტები მდიდარია კალციუმით. ის არის საშენი მასალა ჩვენი ძვლისთვის, რომ მან ზრდა-განვითარება შეძლოს.

ძელზე ჩამოკიდება არის ერთ-ერთი დამხმარე საშუალება. ეს რეალობაა. რიგ შემთხვევებში ჰგონიათ, რომ ძელზე ჩამოკიდება 5-8 სანტიმეტრს მოამატებინებთ, მაგრამ არა. ის ზოგადად ხელს უწყობს კუნთოვანი მასის განვითარებას და ძვლოვანი სტრუქტურის განვითარებასაც. ძელზე ჩამოკიდება მნიშვნელოვანია იმ მხრივ, რომ ხერხემლის სვეტი იყოს სწორად განვითარებული, რომ ხერხემლის დეფორმაციამ არ მოგვცეს შემდგომში ზრდის შეფერხება.

მსმენია ფრაზები: „თმა გაქვს გრძელი და როგორ გაიზრდები.“ ეს, რა თქმა უნდა, არის მითი. ეს მითი დაკავშირებულია მცენარეების ზრდასთან. მცენარე მთლიანად ფესვებიდან იღებს გარკვეულ ნივთიერებებს. მას ფოთლების ქვემოთა ნაწილს აჭრიან, რომ სიმაღლეში წავიდეს.

იოგა და გაწელვები, გარდა იმისა, რომ ბავშვთა ასაკში ზრდა-განვითარებას ეხმარება, ზრდასრულ ასაკშიც გარკვეულ ეფექტებს გვაძლევს, როდესაც არის ხერხემლის დეფორმაცია. კუნთოვანი ქსოვილი, რომელიც იჭერს ხერხემალს, არის მოდუნებული და ხერხემალი არის დაბლა დასული. იოგა ყველაფრისთვის კარგია,“- მოცემულ საკითხზე ლაშა უჩავამ ტელეკომპანია „რუსთავი 2“-ის გადაცემაში „სხვა შუადღე“ ისაუბრა.

წყარო: ​„სხვა შუადღე“

შეიძლება დაინტერესდეთ

„ყველას გირჩევთ, რომ ტკიპის კბენიდან 2-3 კვირის მანძილზე მიმართოთ ექიმს, ჩაიტაროთ კვლევა,“- ინფექციონისტი ლია გოლიაძე

„ყველას გირჩევთ, რომ ტკიპის კბენიდან 2-3 კვირის მანძილზე  მიმართოთ ექიმს, ჩაიტაროთ კვლევა,“- ინფექციონისტი ლია გოლიაძე

ინფექციონისტმა ლია გოლიაძემ ტკიპის ნაკბენით გამოწვეულ დაავადებებსა და მათი პრევენციის გზებზე ისაუბრა:

„ტკიპის ნაკბენი არის ძალიან საყურადღებო რამ. საბედნიეროდ, ყველა ტკიპის ნაკბენით არ გადადის დაავადება, მაგრამ საკმაოდ ხშირად გადადის. ევროპაში ყველა ტკიპის ნაკბენს უტარებენ პროფილატიკურ მკურნალობას დიაგნოზის დასმამდეც კი. მის მიერ განვითარებული დაავადებები საკმაოდ ხშირია და რთულია, რის გამოც ადამიანები თვლიან, რომ სჯობს, მიიღონ ანტიბიოტიკები, ვიდრე ავად გახდნენ. ეს გასაგებიცაა. ჩეხეთში, ავსტრიასა და გერმანიაში ჩატარდა კვლევები და ყველა ტკიპა, რომელიც გამოიკვლიეს, იყო ინფიცირებული. საბედნიეროდ, ჩვენთან ჯერ არ არის ასეთი მდგომარეობა.

ჩვენთან საბედნიეროდ არ ხდება ტკიპისმიერი ენცეფალიტი. ეს უხშირესად არის რუსეთში, შორეულ აღმოსავლეთში. ჩვენთანაც არ არის გამორიცხული, რომ ტურისტების მხრიდან მოხდეს ამ დაავადების შემოტანა. ჩვენთან ხშირად გვხვდება ლაიმ-ბორელიოზი და ყირიმ-კონგოს ცხელება. ყველაზე საყურადღებო დაავადებები არის ეს, რომელიც შეიძლება ტკიპისგან იყოს გადატანილი. ლაიმ-ბორელიოზი როდესაც რთულდება, კიდურების დაბუჟება ეწყებათ ადამიანებს. აუცილებლად უნდა მიექცეს ამას ყურადღება. ძალიან ხშირად არის ლაიმ-ბორელიოზის გართულება აღმავალი დამბლები.

თბილისში ყველაზე მეტად მომართვიანობა არის ადამიანებისგან, რომლებიც სეირნობენ ლისის მიდამოებში. დღე არ გავა, რომ ადამიანმა აქედან არ მოგვაკითხოს ჩივილით, რომ რაღაცამ მიკბინა. ქალაქგარეთ აგარაკებზე ვინც გადის, ბალახთან კონტაქტის შედეგად შეიძლება ისე აგაცოცდეს ტკიპა, რომ ვერც გაიგო. ტკიპას უყვარს თბილი და ნესტიანი ადგილები და ბალახი. მიწიდან ერთ მეტრზეც შეიძლება აცოცდეს ტკიპა. ტკიპას აქვს ძალიან კარგი ყნოსვა. 8-დან 20 მეტრამდე გრძნობს ადამიანის სუნს. ტკიპები ძალიან ჭკვიანი არსებები არიან. ისინი ბილიკების გასწვრივ არიან დადარაჯებული და ელოდებიან ადამიანებსა და ცხოველებს. ტკიპას ხელით არ უნდა შევეხოთ არავითარ შემთხვევაში. ტკიპა თვითონ არ უნდა მოიგლიჯოთ. თუ სპეციალისტს ვერ მიაკითხავთ, პინცეტით ნაზად უნდა ამოიყვანოთ ტკიპა. არ უნდა მოუჭიროთ ტკიპას. როდესაც უჭერთ, ის კბენს ადამიანს. წყლით ჩამობანა და ზეთში დახრჩობა არ არის სწორი. მაშინ გკბენთ სწორედ ტკიპა. აუცილებლად მივიდეთ სპეციალისტთან. ტკიპის ნაკბენმა იცის გაწითლება. კბენის ადგილას არის პატარა წერტილი და გარშემო თეთრი. დაავადება შეიძლება უსიმპტომოდ მიდიოდეს. კბენიდან 2-3 კვირის მანძილზე ყველას გირჩევთ, რომ მიმართოთ ექიმს, ჩაიტაროთ კვლევა, ნახოთ ხომ არ მიდის დაავადების მსუბუქი ფორმა, რომელმაც შეიძლება მერე მძიმე ფორმებამდე მიგვიყვანოს,“- მოცემულ საკითხზე ლია გოლიაძემ ტელეკომპანია „იმედის“ გადაცემაში „იმედის დილა“ ისაუბრა.

წყარო: ​„იმედის დილა“ 

წაიკითხეთ სრულად