Baby Bag

„რაც უფრო ადრე შეაჩვევს დედა გინეკოლოგიურ გასინჯვას გოგონას, მით უფრო იშვიათია ზრდასრულობაში უშვილობა და სიმსივნეები,“- რეპროდუქტოლოგი არჩილ ხომასურიძე

„რაც უფრო ადრე შეაჩვევს დედა გინეკოლოგიურ გასინჯვას გოგონას, მით უფრო იშვიათია ზრდასრულობაში უშვილობა და სიმსივნეები,“- რეპროდუქტოლოგი არჩილ ხომასურიძე

რეპროდუქტოლოგმა არჩილ ხომასურიძემ გოგონებისთვის ადრეული ასაკიდან გინეკოლოგიური გასინჯვის აუცილებლობაზე ისაუბრა: 

„დადგენილია მეცნიერული კვლევების შედეგად, რომ რაც უფრო ადრე შეაჩვევს დედა გინეკოლოგიურ გასინჯვას გოგონას (9 წლის ასაკის შემდეგ წელიწადში ერთხელ მაინც), როდესაც ისინი გაიზრდებიან სიმსივნეები, უშვილობა გაცილებით იშვიათია. ჩვენთან არსებობს დამოკიდებულება, რომ როგორ შეიძლება ხელის ხლება, სანამ არ იმშობიარებს. ეს არის სრული აბსურდი.

იდეალურია 9 წლის ასაკიდან კონსულტაციაზე მიყვანა. თვიური რომ დაეწყება გოგონას, მაშინ ხომ ეს აბსოლუტურად აუცილებელია. ბუნებამ ასე შექმნა, რომ ქალის რეპროდუქციული ასაკი არის უფრო ხანმოკლე, ვიდრე მამაკაცის. ეს იმიტომ არის, რომ ქალის რეპროდუქციული ფუნქცია არის გაცილებით რთული, ვიდრე მამაკაცის. ქალი არის უნიკალური. ქალის ორგანიზმის ციკლურ მუშაობაზე ყველაფერია ჩამოკიდებული, გულიც, ღვიძლიც, ყველაფერიც. მშობიარობაც დიდი დატვირთვაა. ეს ქმნის იმის პირობებს, რომ ქალის რეპროდუქციული ასაკი ადრე მთავრდება. საშუალოდ ის მთავრდება 49 წლის ასაკში, თუმცა, ალბათ, შეცვლიან ამ ოფიციალურ მოსაზრებას, რადგან ეს ასაკი გადავადდა,“- მოცემულ საკითხზე არჩილ ხომასურიძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო:​ „პირადი ექიმი - მარი მალაზონია“

შეიძლება დაინტერესდეთ

რატომ ვითარდება ლორდოზი, რა სიმპტომებით ხასიათდება და როგორ ხდება დიაგნოზის დასმა?

რატომ ვითარდება ლორდოზი, რა სიმპტომებით ხასიათდება და როგორ ხდება დიაგნოზის დასმა?

რატომ ვითარდება ლორდოზი, რა სიმპტომებით ხასიათდება და როგორ ხდება დიაგნოზის დასმა? - ამ და სხვა საკითხებზე ​MomsEdu.ge-ს ბავშვთა ორთოპედი ამირან შარაბიძე ესაუბრა.

- რატომ ვითარედება ლორდოზი?

- დავიწყოთ განმარტებით - ლორდოზი, ესაა ხერხემლის სვეტის ფიზიოლოგიური მრუდი, რომელიც შედრეკილია სხეულისკენ. ფიზიოლოგიურად არსებობს ორი, წელის და კისრის ლორდოზი. როდესაც ეს ნადრეკი ზომაზე მეტია, უწოდებენ ჰიპერლორდოზს, როდესაც მცირე - ჰიპოლორდოზს. ყველაზე მეტად გავრცელებულია წელის, ანუ ლუმბალური ჰიპერლოდოზი. ის შეიძლება იყოს კონსტიტუციური, თანდაყოლილი, როგორც ანატომიური თავისებურება ან შეძენილი, რომელიც გარკვეული პათოლოგიის ან ხელშემწყობი ფაქტორის გამო ვითარდება.

შეძენილი ლუმბალური ჰიპერლორდოზის გამომწვევი ბევრი მიზეზი არსებობს: კუნთების ჰიპოტონია, ხერხემლის კომპენსაციურიგამრუდება, ბავშვის ჩონჩხის სწრაფი ზრდა, მენჯ-ბარძაყის სახსრების დისპლაზია ან მალფორმაცია, სხეულის ხანგრძლივად არასწორ პოზიციაში ყოფნა, მალთაშუა თიაქარი, სიმსივნური წარმონაქმნები, ინფექციური ან ნევროლოგიური დაავადებები, რაქიტი და სხვა ოსტეოარტიკულარული დაავადებები.

შეძენილი ლუმბალური ჰიპერლორდოზის გამომწვევი მიზეზი ასევე შეიძლება გახდეს ორსულობა, ჭარბი წონა ან სიმსუქნე, ზურგის ტრავმები, მაღალქუსლიანი ფეხსაცმლის ხშირი და ხანგრძლივი გამოყენება, კუნთების სისუსტე, ოსტეოპოროზი.

- რა სიმპტომებით ხასიათდება?

- ზომიერად გამოხატული ჰიპერლორდოზი უხშირესად უსიმპტომოდ მიმდინარეობს და ის შეიძლება შეუმჩნეველიც კი დარჩეს. თუმცა, მკვეთრად გამოხატული ფორმის არსებობისას, წელის მალების კომპრესია დროთა განმავლობაში იწვევს ლოკალურ, განმეორებად ანთებებს, დაბუჟების და ტკივილის შეგრძნებას ზურგის, ზედა და ქვედა კიდურების არეში.

- როგორ ხდება დიაგნოზის დასმა?

- დიაგნოზის დასმა ხდება კლინიკური გასინჯვის საფუძველზე, რაც პირველ რიგში, გულისხმობს ორთოპედის მიერ ტანდეგობის გულდასმით შეფასებას, დეფორმაციის ზონების და ხარისხის ზუსტ განსაზღვრას, ამის შემდეგ დიაგნოზი უნდა დადასტურდეს ხერხემლის სვეტის რენტგენოლოგიური კვლევით. თუმცა, მეორადი პირელორდოზი გამოხატული კლინიკური ნიშნით, მოითხოვს უფრო ღრმა კვლევას, რათა დადგინდეს მისი გამომწვევი ზუსტი მიზეზი და განისაზღვროს მკურნალობის შემდგომი ტაქტიკა.

- როგორ მკურნალობენ მას?

- მკურნალობის მეთოდი ინდივიდუალურად ირჩევა და ის დიდწილად დამოკიდებულია დაავადების გამომწვევ მიზეზზე, თუმცა, ზოგადად ის მიმართულია სიმპტომების შემცირებისკენ. ესენია: ანალგეზიური, მიორელაქსაციური და ანთების საწინააღმდეგო პრეპარატები. ჭარბწონიანობის შემთხვევაში წონის კორექცია, კინეზოთერაპია, კუნთების ელასტიურობის და ძალის შენარჩუნების მიზნით. ზოგიერთ შემთხვევაში შესაძლებელოა საჭირო გახდეს სპეციალური კორსეტის გამოყენება, რათა თავიდან იქნეს აცილებული დაავადების შემდგომი გამწვავება. იშვიათად საჭირო ხდება ქირურგიული ჩარევა, რათა მოხდეს გამომწვევი მიზეზის მოშორება.

თუმცა, მკურნალობაზე მარტივი გზაა დაავადების პრევენცია, რაც გულისხმობს: სხეულის არასწორ პოზიციაში ხანგრძლივად ყოფნის თავიდან არიდებას, წონის კონტროლს, რეგულარულ ვარჯიშს კუნთოვანი ტონუსის შენარჩუნების მიზნით, მაღალქუსლიანი ფეხსაცმელის ხანგრძლივად და ხშირად გამოყენებისგან თავის შეკავებას.

ესაუბრა მარიამ ჩოქური 

წაიკითხეთ სრულად