როგორია D ვიტამინის პროფილაქტიკური დოზა ზრდასრულებსა და ბავშვებში? - აღნიშნულ თემაზე ბავშვთა ენდოკრინოლოგმა ნინო ხელაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.
,,D ვიტამინი არ არის მხოლოდ ვიტამინი, ეს არის მნიშვნელოვანი ჰორმონი, რომელიც ადრე ეგონათ, რომ მხოლოდ ძვლის და კალციუმისთვის იყო აუცილებელი, თუმცა ახლა დამტკიცდა, რომ მას აქვს ძალიან მნიშვნელოვანი როლი იმუნური სისტემის გაძლიერებისთვის, ალერგიების პრევენციისთვის, სიმსუქნის შემთხვევაში, გულსისხლძარღვთა სისტემის და დიაბეტის პრევენციისთვის (პირველი ტიპის დიაბეტის პრევენციისთვისაც კი), ონკოლოგიური დაავადებების საწინააღმდეგოდ და ბევრი სხვა. აღმოჩნდა, რომ D ვიტამინის რეცეპტორები თავის ტვინშიც კი არის. ამიტომ ყველა უჯრედისა და ორგანოთა სისტემისთვის არის ძალიან აუცილებელი.
ჩვენთან არის სახელმწიფო გაიდლაინი, სტანდარტი, რომლის მიხედვითაც ყველა ბავშვმა, არა აქვს მნიშვნელობა ძუძუთი იკვებება, თუ ხელოვნურზეა, ორ წლამდე უნდა მიიღოს D ვიტამინის პროფილაქტიკური დოზა, 2 წლის შემდეგ, მათ შორის მოზრდილების ჩათვლით, მნიშვნელოვანია და უკვე აქტუალური ხდება, რომ D ვიტამინი მივიღოთ სეზონურად, როცა მზე ვერ იქნება ამ ვიტამინის აქტიური წყარო.
არის გარკვეული საკვები, რომელიც შეგვივსებს მის დანაკლისს, თუმცა ეს საკმაოდ რთულია, რადგან ამ საკვების დიდი რაოდენობით მიღებაა საჭირო. მაგალითად, 10-15 კვერცხი უნდა მიიღოს ბავშვმა, რომ შეივსოს იმ დღის ნორმა D ვიტამინი, რაც წარმოუდგენელია. ამიტომ ხდება აქტუალური, რომ დანამატის სახით მიიღოს ბავშვმა ასაკის გათვალისწინებით შერჩეული დოზა. ეს ეხება ყველა ჯანმრთელ ბავშვს სეზონურად,'' - აღნიშნა ნინო ხელაძემ.
8 თვის ბავშვს უნდა შეეძლოს თქვას „დედა,“ „მამა“ - მეტყველების თერაპევტი ნანა ვაშაძე
მეტყველების თერაპევტმა ნანა ვაშაძემ ბავშვებში მეტყველების განვითარების ეტაპებზე ისაუბრა:
„მშობელმა დაბადებიდან უნდა აწარმოოს ბავშვზე დაკვირვება. იწყება ღუღუნი, ტიტინი. 6-8 თვის ასაკიდან ხდება მარცვლების წარმოთქმა. 8 თვის ბავშვს უნდა შეეძლოს თქვას „დედა,“ „მამა.“ წლიდან უკვე იწყება: „მომე“ და თითოეული ფრაზების წარმოქმნა. ორწლინახევრიდან, სამი წლიდან ბავშვი იწყებს წინადადებებით საუბარს.“
ნანა ვაშაძის თქმით, მეტყველების განვითარებაში მემკვიდრეობით ფაქტორს დიდი მნიშვნელობა ენიჭება:
„ორენოვან ოჯახში ბავშვი ყოველთვის დააგვიანებს ლაპარაკის დაწყებას. მიზანშეწონილია ჯერ ვისაუბროთ ერთ ენაზე და შემდეგ გადავიდეთ უცხო ენაზე. როდესაც ორენოვანი ოჯახია, ხდება შეთანხმება მეუღლეებს შორის, რა ენაზე ისაუბრონ. საუბარი ერთ ენაზე უნდა ხდებოდეს. ბავშვი ადრეულ ასაკში მარტივად ითვისებს ენებს, მაგრამ მთავარია, რომ ჯერ მშობლიური ენა ისწავლოს. ბავშვმა ჯერ ერთ ენაზე უნდა იაზროვნოს და მერე ადვილად აითვისებს ხოლმე უცხო ენასაც,“- აღნიშნულ საკითხზე ნანა ვაშაძემ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.
