Baby Bag

​რა იწვევს ბავშვებში სტომატიტს და როგორ ვუმკურნალოთ?

​რა იწვევს ბავშვებში სტომატიტს და როგორ ვუმკურნალოთ?

რა იწვევს ბავშვებში სტომატიტს და როგორ ვუმკურნალოთ? - ამ თემებზე MomsEdu.ge- ს ესაუბრა ბავშვთა და მოზრდილთა ექიმი-თერაპევტი/პირის ღრუს ქირურგი გვანცა ბაიდაშვილი.

რა არის სტომატიტი?

- სტომატიტი პირის ღრუს ლორწოვანი გარსის ანთებითი დაავადებების ზოგადი სახელია და მასში მოიაზრება 500 - ზე მეტი დაავადება, რომელთაც სხვადასხვა ეტიოლოგია (გამომწვევი მიზეზი), მიმდინარეობა და მკურნალობის ტიპი აქვს.

- რა არის გამომწვევი მიზეზი ბავშვებში?

გამომწვევი მიზეზი შეიძლება იყოს სისტემური დაავადება, რომელიც პირის ღრუში გამოვლინდა ერთ-ერთი სიმპტომის სახით ან ლოკალური, როცა მხოლოდ პირის ღრუში იჩენს თავს სხვადასხვა მორფოლოგიური ელემენტით.

- სტომატიტის სახეობებზე რომ ვისაუბროთ.

- როგორც ვახსენე, სტომატიტი 500 - ზე მეტი დაავადების კრებითი სახელია და ყველაზე ვერ ვისაუბრებთ, თუმცა, ბავშვებში ყველაზე ხშირია ტრავმული სტომატიტი, რომელსაც უმეტესად სათამაშოთი ან მყარ საგანზე დაცემის დროს იღებენ და რამდენიმე დღეში ალაგდება. ასევე, დამწვრობით გამოწვეული, თუნდაც ცხელი საკვებით, რომელიც მალევე გადადის, იმ შემთხვევაში თუ რეგულარულად არ იღებს ბავშვი ცხელ საკვებს.

ალერგიული სტომატიტი შესაძლოა რომელიმე პრეპარატით ან კოსმეტიკით გამოვლინდეს და მხოლოდ გამომწვევი მიზეზის დადგენით და მოხსნით იკურნება. ვირუსული სტომატიტიც ხშირია ბავშვებში, რაც სისტემური ვირუსის მიმდინარეობის დროს ვლინდება.

- როგორ მივხვდეთ რომ ბავშვს სტომატიტი აქვს და რა შეიძლება გავაკეთოთ სახლის პირობებში?

- ოჯახის წევრების მიერ სტომატიტზე ეჭვის მიტანა მარტივია. პირის ღრუს ლორწოვანზე ვლინდება მოწითალო ან მოთეთრო ანთებითი ელემენტი, რომელიც შეიძლება იყოს მტკივნეული ან ხელს უშლიდეს კვებასა და საუბარში. სახლის პირობებში მკურნალობა, ექიმის გარეშე, არ შეიძლება, რადგან დიაგნოზის დასმას საჭიროებს, რაც მშობლის პრეროგატივა არაა და შესაძლოა, გართულება გამოიწვიოს.

- როდის უნდა მივმართოთ სპეციალისტს და როგორ მიმდინარეობს მკურნალობა?

- ეჭვის არსებობისას მივმართავთ ექიმს, აღვუწერთ ბავშვის ზოგად მდგომარეობას, რათა დავეხმაროთ მას სწორი მიმართულებით წარიმართოს დიაგნოსტიკა და შესაბამისად, მკურნალობაც. მკურნალობა შეიძლება იყოს პერორალური პრეპარატებით და ადგილობრივად გამოსაყენებელი სავლებებით ან გელებით.

ესაუბრა მარიამ ჩოქური 

შეიძლება დაინტერესდეთ

როგორ მივხვდეთ, როცა ბავშვს წყლის დეფიციტი აქვს?

როგორ მივხვდეთ, როცა ბავშვს წყლის დეფიციტი აქვს?

როგორ მივხვდეთ, როცა ბავშვს/მოზრდილს წყლის დეფიციტი აქვს? - თემაზე ექთანი თამარ დაუსი საუბრობს. 

მისი თქმით, თუ ბავშვი ტირის და მას არ მოსდის ცრემლი, არის ჩავარდნილი ყოფლიბანდი, დიდი ხნის განმავლობაში საფენი არის მშრალი, ასევე კანი არის მშრალი, ხელის შეხების შემდეგ კანი დიდი ხანი რჩება ამოწეული და არ უბრუნდება ჩვეულ მდგომარეობას - ეს იმას ნიშნავს, რომ პატარას აკლია წყალი და სითხის შევსება უნდა დავიწყოთ. 

თამარ დაუსი ასევე მოზრდილ ადამიანებსა და თინეიჯერებზე საუბრობს. როგორც ექთანი აღნიშნავს, ამ შემთხვევაში იწყება არაფერთან დაკავშირებული ცუდად ყოფნის შეგრძნება:

,,წყლის ნაკლებობის შემთხვევაში, ადამიანმა შეიძლება თავი შეუძლოდ იგრძნოს. მაგალითად, დაღლილია ან წამოდგომისას აქვს თავბრუსხვევა, თავისტკივილი, პირღებინების შეგრძნება. ასეთ დროს ძალიან მნიშვნელოვანია წყალი მივიღოთ, მაგრამ დიდი რაოდენობის ერთბაშად მიღება არ არის რეკომენდებული. ბავშვებს თუნდაც 1 ჩაის კოვზი დავალევინოთ 5-წუთიანი ინტერვალებით, შემდეგ კი გავზარდოთ რაოდენობა. მოზრდილებშიც არ უნდა დაველოდოთ წყურვილის გრძნობას და თითო-თითო ყლუპი გავლა-გამოვლაზე დავლიოთ.''

ორგანიზმში წყლის ნაკლებობის მიმანიშნებელია ასევე ხელის და ფეხის კუნთების შეკრთომა. 

წყარო: „პირადი ექიმი - მარი მ​ალაზონია“

წაიკითხეთ სრულად