Baby Bag

9 ეფექტური შინაურული მეთოდი ჩვილებში ხველის სამკურნალოდ

9 ეფექტური შინაურული მეთოდი ჩვილებში ხველის სამკურნალოდ

ქრონიკული ხველა ჩვილისთვის დამქანცველია. გარდა ამისა, როდესაც ბავშვს რაღაც აწუხებს, მშობლები განსაკუთრებით ღელავენ და შიშობენ, რომ მის ჯანმრთელობას სერიოზული საფრთხე დაემუქრება. ხველა პატარებს ხშირად აწუხებთ, მაგრამ თუ ის ქრონიკულ სახეს იღებს, მკურნალობისთვის გარკვეულ ზომებს აუცილებლად უნდა მიმართოთ. მსგავს შემთხვევაში შეგიძლიათ, დახმარებისთვის პედიატრს მიაკითხოთ და მისი რეკომენდაციების მიხედვით იმოქმედოთ ან ხველისგან განკურნების შინაურული და უსაფრთხო მეთოდების გამოყენება სცადოთ.

ჩვილებთან სამკურნალო საშუალებების გამოყენებისას განსაკუთრებული სიფრთხილის გამოჩენა გმართებთ. აუცილებლად უნდა იცოდეთ, რომ საშუალება, რომელსაც ბავშვის განკურნებისთვის იყენებთ, მისთვის აბსოლუტურად უსაფრთხოა. ჩვენს სტატიაში იმ შინაურულ მეთოდებს გაგაცნობთ, რომელთა დახმარებით ბავშვს ხველებას წარმატებით შეუჩერებთ და რაც მთავარია, ამას ყოველგვარი გვერდითი ეფექტების გამოვლენის გარეშე შეძლებთ.

9 საუკეთესო შინაურული მეთოდი ჩვილებში ხველის სამკურნალოდ

• დედის რძე

ხშირი ხველა ყელს ძალიან აღიზიანებს. მსგავსი გაღიზიანების თავიდან ასაცილებლად ჩვილის ორგანიზმმა ჰიდრატაციის მაღალი ხარისხის შენარჩუნება უნდა შეძლოს. 6 თვემდე ასაკის ბავშვის გაღიზიანებულ ყელს შეგიძლიათ დედის რძით უმკურნალოთ. დღის განმავლობაში პატარა მაქსიმალურად ხშირად უნდა გამოკვებოთ, რათა მისმა ორგანიზმმა სითხის საჭირო მარაგი შეივსოს. დედის რძე ბავშვისთვის სრულიად უსაფრთხოა. ძუძუთი კვება პატარას განწყობას გამოუკეთებს, ხოლო რძე გაღიზიანებულ ყელს დააცხრობს, რაც ხველით გამოწვეულ დისკომფორტს მნიშვნელოვნად შეამცირებს. დედის რძე სპეციალურ ანტისხეულებს შეიცავს, რომლებიც ვირუსებსა და ბაქტერიებს წარმატებით ებრძვიან. რძეს ჩვილის რესპირატორული დაავადებებისგან დაცვის უნიკალური უნარი აქვს. როდესაც პატარას ხველა აწუხებს, მისი განკურნებისთვის თქვენი პირველი არჩევანი ყოველთვის დედის რძე უნდა იყოს.

• მცირე რაოდენობით წყალი

ბავშვს, რომელიც 6 თვეზე მეტი ასაკისაა, დღის განმავლობაში რამდენჯერმე მიეცით მცირე რაოდენობით სასმელი წყალი. მისი დახამრებით ყელი დაგროვილი ლორწოსგან მარტივად გათავისუფლდება და ტენიანობასაც შეინარჩუნებს. თუ შეამჩნევთ, რომ ბავშვი ხშირად ახველებს, პატარას საკვებ კოვზზე მცირე რაოდენობით წყალი დაასხით და ბავშვს დაალევინეთ.

• თბილი სითხეები

6 თვეზე მეტი ასაკის ბავშვს შეგიძლიათ ხშირად მისცეთ თბილი ბოსტნეულისა და ხორცის ბულიონი, სახლში მომზადებული წვნიანი ან პიურე. არასდროს მიაწოდოთ პატარას ცხელი სითხე. უპირატესობა ნელ-თბილ ან ოთახის ტემპერატურის მქონე საკვებსა და სასმელს მიანიჭეთ. თბილი სითხეები ჩვილს გაღიზიანებულ ყელს დაუმშვიდებს და ხველებასაც მნიშვნელოვნად შეუმცირებს.

• თბილი საკვები

ბავშვი, რომელიც სოლიდურ კვებაზე გყავთ, თბილი და მსუბუქი ტექსტურის მქონე საკვებით ხშირად გაანებივრეთ. კარტოფილის ან ბარდის პიურე, მოხარშული ქათმისა და სტაფილოს კერძი ამ შემთხვევაში საუკეთესო არჩევანია. თბილი საკვები, რომელსაც მსუბუქი ტექსტურა აქვს ყელს სწრაფად დაამშვიდებს, რაც ბავშვს გახშირებული ხველისგან თავის დაღწევაში დაეხმარება. 

• თაფლი (მხოლოდ ერთ წელს გადაცილებული ასაკის ბავშვისთვის)

ერთ წელს გადაცილებული ასაკის ბავშვს ხველის შემოტევის შემთხვევაში შეგიძლიათ 2-5 მილილიტრი თაფლი მისცეთ. თაფლი ლორწოს რაოდენობას ამცირებს და ხველასაც აცხრობს. ამერიკის პედიატრთა აკადემიის ცნობით თაფლს ხველის ინტენსივობის შემცირება ხველების საწინააღმდეგო სიროფებზე უკეთ შეუძლია. გახსოვდეთ, რომ 1 წლამდე ასაკის ბავშვებისთვის თაფლი უსაფრთხო პროდუქტი არ არის. კლოსტრიდიუმ ბოტულინუმის ანაერობული ბაქტერიის სპორები, რომლებიც თაფლშიც გვხვდება, ჩვილის ორგანიზმში მოხვედრისას შინაგანი ინფექციის განვითარებას იწვევს. ჩვილს ბოტულიზმის განვითარების მაღალი რისკი აქვს, რის გამოც დაუშვებელია, რომ 12 თვემდე ასაკის ბავშვს თაფლი მისცეთ. ერთ წელს გადაცილებული ბავშვის ორგანიზმს აღნიშნული ბაქტერია ვეღარ ერევა, რის გამოც 12 თვეზე მეტი ასაკის ბავშვისთვის ხველის სამკურნალოდ თაფლის მიცება სავსებით დასაშვებია.

• ჰაერის დამატენიანებელი

დატენიანებული ჰაერით სუნთქვა ძალიან სასიამოვნოა, გარდა ამისა, ის გაღიზიანებული ყელის დამშვიდებას და ხველის შემცირებასაც უწყობს ხელს. ნუ შეიძენთ ისეთ დამატენიანებელს, რომელიც ოთახს ადუღებული წყლის ორთქლით ატენიანებს, რათა ჩვილის უცაბედი დამწვრობა თავიდან აიცილოთ. უპირატესობა ტრადიციულ დამატენიანებელს მიანიჭეთ, რომელიც ცივი ტენიანობის პრინციპით მუშაობს.
• ადგილობრივი მოხმარების ხველის ჩამხშობი საშუალებები

ბავშვებში ხველის დასამარცხებლად შეგიძლიათ ადგილობრივი მოხმარების ხველის ჩამხშობი საშუალებები გამოიყენოთ. ისეთი მალამოები, რომლებიც ქაფურს, მენთოლსა და ევკალიპტის ზეთს შეიცავენ ხველის შესამცირებლად აქტიურად გამოიყენება. ბავშვს კისრის გარშემო ნაზად და მსუბუქად შეუზილეთ სპეციალური მალამო კანში. 3 თვემდე ასაკის პატარებში მსგავსი მალამოების გამოყენება ექიმის ნებართვის გარეშე დაუშვებელია. მალამო მხოლოდ გარეგანი მოხმარებისთვის გამოდგება.
• ბავშვის სხეულის ტემპერატურაზე ზრუნვა

ცივი კლიმატი ხველებას ამწვავებს. თუ ოთახში სიცივეა, ბავშვს თბილად ჩააცვით. ბავშვს ყელი აუცილებლად თბილად უნდა ჰქონდეს. თუ პატარას სიცივისგან სათანადოდ დაიცავთ, ხველას მნიშვნელოვნად შეამცირებთ.

• ჰიგიენის წესების დაცვა

მტვერი, ცხოველის ბეწვი ან სუნამოს მკვეთრი არომატი ხველას აძლიერებს. ბავშვს ცხოველებთან ახლოს ნუ მიუშვებთ. არ გამოიყენოთ მკვეთრი არომატის მქონე აეროზოლი. თავი შეიკავეთ დეზოდორანტების გამოყენებისგან, რათა ბავშვის მდგომარეობა არ დაამძიმოთ.

მედიკამენტები, თუნდაც მცენარეული სახის, ბავშვს მხოლოდ ექიმის ნებართვით უნდა მისცეთ. მართალია, ხველა პატარას ასუსტებს და ღლის, მაგრამ სათანადო ზრუნვისა და მოვლის შემთხვევაში, თქვენი შვილი ძალებს მალევე აღიდგენს.

გაფრთხილება: სტატიაში მოცემული ინფორმაცია პროფესიონალი მედიკოსის რჩევას ვერ ჩაანაცვლებს. ჩვილის სამკურნალოდ შინაურული მეთოდების და საშუალებების გამოყენებამდე, აუცილებლად შეამოწმეთ ბავშვის ჯანმრთელობის მდგომარეობა პედიატრთან. ექიმის რეკომენდაციების და რჩევების მიღების შემდეგ ჩვენ მიერ შემოთავაზებული საშუალებების გამოყენება თამამად შეგიძლიათ. 

მომზადებულია ​momjunction.com-ის მიხედვით
თარგმნა ია ნაროუშვილმა 

შეიძლება დაინტერესდეთ

„7-8 წლამდე მნიშვნელოვანია თამაში, ამ ასაკში ბავშვი და მისი ძვალ-სახსროვანი სისტემა ვითარდება თამაშით,“ - ბავშვთა ორთოპედი ნინო ჭოლოკავა

ბავშვთა ორთოპედი ნინო ჭოლოკავა ბავშვებში ძვალ-სახსართა სისტემის პრობლემების გამომწვევ მიზეზებზე საუბრობს და აცხადებს, რომ აღნიშნული სისტემის ნორმალური განვითარებისთვის მოძრაობა უმნიშვნელოვანესი ფაქტორია:

„თუ ვილაპარაკებთ ძვალზე და ძვალ-სახსართა სისტემის ჯანმრთელობაზე, ამას ძალიან ბევრი ფაქტორი განაპირობებს: თვითონ პიროვნება, მისი კვების რეჟიმი, მიდრეკილებები, ცხოვრების სტილი. ეს, მით უმეტეს, მნიშვნელოვანია ბავშვთა ასაკში, იმიტომ, რომ მან ძირითადი დეპოზიტი უნდა შექმნას თავიდანვე მინერალური ცვლის, ვიტამინების, პროტეინების. ამ ყველაფერს ძალიან დიდი მნიშვნელობა აქვს ბავშვის ზრდისთვის. პანდემიის დროს, ალბათ, უნდა ვთქვათ, რომ ძალიან მნიშვნელოვანია მოძრაობა. იმისთვის, რომ სწორად ჩამოყალიბდეს და არ გვქონდეს რაიმე პრობლემები ძვალ-სახსართა სისტემასთან დაკავშირებით, უნდა გავიაზროთ, რომ მოძრაობა არის ერთ-ერთი მნიშვნელოვანი ფაქტორი ამ სისტემის სწორი ჩამოყალიბებისთვის.“

ნინო ჭოლოკავა ბავშვებში ეკრანმიჯაჭვულობის პრობლემაზე საუბრობს და აღნიშნავს, რომ ეკრანთან ხანგრძლივად ყოფნა ბავშვებს სახსრების პრობლემებს უქმნის:

„პრობლემები წარმოიშვა ეკრანმიჯაჭვულობასთან დაკავშირებით. ბოლო მონაცემებით, თუ ბავშვები დღეში 4 საათს ან მეტს ატარებენ ეკრანთან, მათ 65 %-ს აღენიშნება სახსრის ტკივილები, ჩივილები, რომელსაც შემდგომ მკურნალობა სჭირდება. მშობელმა თავიდანვე უნდა გაიაზროს, რომ როდესაც იზოლაციაში ან შეზღუდვის რაიმე ფორმაზე გადავდივართ, ჩვენი ყოველდღიური ცხოვრებიდან ვარდება აქტივობა. ყოველდღიურ ცხოვრებაში ჩვენ გავდივართ სადარბაზოდან, მივდივართ ლიფტთან, გაჩერებაზე, მაღაზიაში. ამ ყველაფერს არ ვაქცევთ ყურადღებას. ეს მცირე მოძრაობები უმნიშვნელო გვგონია. როდესაც სახლში ვიკეტებით, ეს ფუნდამენტალური ხდება. ძალიან მნიშვნელოვანია, რომ მშობლებმა დაგეგმონ სწავლის რეჟიმი. ბავშვს ჰქონდეს ხშირი შესვენებები ეკრანთან ყოფნისას. მშობელმა უნდა დაგეგმოს ბავშვის აქტივობა გარეთ, რამდენადაც პანდემია იძლევა ამის საშუალებას.“

„სეირნობა, ველოსიპედით ან ფეხით გასეირნება ძალიან მნიშვნელოვანია. რა თქმა უნდა, გასათვალისწინებელია ასაკობრივი ჭრილებიც. 7-8 წლამდე მნიშვნელოვანია თამაში. ბავშვს როგორმე მოუწყვეთ სივრცე, სადაც ის ბევრს ითამაშებს. ამ ასაკში ბავშვი და მისი ძვალ-სახსროვანი სისტემა ვითარდება თამაშით. უფრო მოზრდილისთვის ეცადეთ დაგეგმოთ რაიმე სახის სპორტული აქტივობა. სასურველია ამაში მშობელიც ჩაერთოს, რადგან ეს პრობლემა უფროსებისთვისაც მნიშვნელოვანია. მართალია, ბავშვთა ორთოპედი ვარ, მაგრამ ასაკოვან ადამიანებსაც ვურჩევ, დაგეგმონ დრო ისე, რომ დღის განმავლობაში ნაკლებად ხალხმრავალ ადგილას გაისეირნონ. ეს მათი ფიზიკური და ფსიქოლოგიური ჯანმრთელობისთვის ძალიან მნიშვნელოვანია,“ - აცხადებს ნინო ჭოლოკავა.

წყარო: ​პირადი ექიმი - მარი მალაზონია 

წაიკითხეთ სრულად