Baby Bag

ქალის ყოველდღიური საფენი - შეიძლება თუ არა მისი ყოველდღიურად გამოყენება?

ქალის ყოველდღიური საფენი - შეიძლება თუ არა მისი ყოველდღიურად გამოყენება?
ქალბატონები მსუბუქი მენსტრუალური ან სხვა სახის გამონადენის არსებობის შემთხვევაში ქვედა საცვლების სისუფთავის დაცვის მიზნით ყოველდღიურ საფენებს ხშირად იყენებენ. მათი დიდი ნაწილი კი მეტი კომფორტისა და სიმშვიდისთვის ჰიგიენურ საფენს ყოველდღიურად მოიხმარს. ქალბატონები ნაკლებად ინტერესდებიან, თუ რამდენად უსაფრთხოა საფენების ყოველდღიური გამოყენება. შესაძლოა, იმ ქალბატონებს, რომლებიც ჰიგიენური მიზნებიდან გამომდინარე საფენებს რეგულარულად მოიხმარენ, საკუთარი ორგანიზმისთვის იმაზე მეტი ზიანი მოაქვთ, ვიდრე სარგებელი. შეცდომების დაშვებისგან არავინაა დაზღვეული. სტატიის გაცნობის შემდეგ, თუ ჩათვლით, რომ ჰიგიენურ საფენებს მეტისმეტად ხშირად მოიხმარდით, პანიკაში ნუ ჩავარდებით. ეცადეთ ამ მავნე ჩვევაზე უარი თქვათ და მისგან გათავისუფლდეთ, რათა თქვენი ორგანიზმის სიჯანსაღეზე ზრუნვა შეძლოთ.

ექსპერტების თქმით, ჰიგიენური საფენის ხშირმა მოხმარებამ, შესაძლოა, ქალის გარე სასქესო ორგანოების კანი მეტისმეტად გააღიზიანოს, განსაკუთრებით მაშინ, თუ საფენები სურნელოვანია. როდესაც მსგავსი ტიპის საფენებს იყენებთ, სასქესო ორგანოების კანი ტენიანდება, რის გამოც ის ისეთ გამაღიზიანებლებზე, როგორიცაა გარკვეული ტიპის არომატიზატორი, ნეგატიურად რეაგირებს. კანის ძლიერი ტენიანობის გამო გენიტალიების არეში გამონაყარი ჩნდება, კანი წითლდება, ღიზიანდება, საშოს არეში მტკივნეული შეგრძნებები გაწუხებთ. შესაძლოა, ჭარბმა ტენიანობამ ქავილიც გამოიწვიოს. მიუხედავად იმისა, რომ ზემოთ ჩამოთვლილი სიმპტომები ძალიან უსიამოვნოა, ჰიგიენური საფენების რეგულარულმა მოხმარებამ, შეიძლება, გაცილებით სერიოზული და რთული პრობლემებიც შეგიქმნათ.

• იწვევს თუ არა ჰიგიენური საფენების რეგულარული მოხმარება ინფექციური დაავადებების განვითარებას?

ჰიგიენური საფენების რეგულარულმა მოხმარებამ, შესაძლოა, ვაგინალური სოკოვანი ინფექციის განვითარებას შეუწყოს ხელი. იმ შემთხვევაში, თუ საშოს მიდამოებში ქავილი, გამონაყარი ან წვის შეგრძნება ადრეც გაწუხებდათ, ჰიგიენური საფენების მოხმარებით აღნიშნულ მდგომარეობას კიდევ უფრო გაამძაფრებთ. ექსპერტები გირჩევენ, რომ მენსტრუალური ციკლის დროსაც ჰიგიენური საფენები ხშირად გამოიცვალოთ, რათა სოკოვანი დაავადების განვითარება თავიდან აიცილოთ. უმჯობესია, თუ ჰიგიენურ საფენებს მხოლოდ მენსტრუალური ციკლის დროს მოიხმართ, ხოლო ჩვეულებრივ დღეებში მათ გარეშე ცხოვრებას ისწავლით. ეს ინფექციური დაავადებების პრევენციაში ძალიან დაგეხმარებათ. თუ საშოდან ძლიერი გამონადენი ყოველდღიურად გაწუხებთ და ჰიგიენური საფენების გარეშე ერთ დღესაც ვერ ძლებთ, შესაძლოა, ინფექცია უკვე განგივითარდათ, რის გამოც ექიმთან ვიზიტი აუცილებელია.

მართალია, ჩვენ მიერ მოწოდებული ინფორმაცია საყურადღებოა, მაგრამ ეს იმას სულაც არ ნიშნავს, რომ თქვენი ჰიგიენური საფენები უნდა გადაყაროთ და მათი არსებობა სამუდამოდ დაივიწყოთ. გახსოვდეთ, რომ ქალის ჰიგიენური საფენები ჯანმრთელობისთვის პოტენციურ საფრთხეს მხოლოდ მაშინ წარმოადგენს, როდესაც მათ ჭარბად მოიხმარენ. თუ საფენების ზომიერ მოხმარებას ისწავლით, ინფექციური დაავადებების განვითარების საფრთხე ნაკლებად დაგემუქრებათ. ექსპერტები გირჩევენ, რომ როგორც კი გარე სასქესო ორგანოების კანის დატენიანებას იგრძნობთ, საფენი დაუყოვნებლივ გამოიცვალოთ. არავითარ შემთხვევაში არ ატაროთ ერთი და იგივე ჰიგიენური საფენი ერთ დღეზე მეტ ხანს. დაძინებამდე საფენის გამოცვლა აუცილებელია.

• რა ტიპის ჰიგიენური საფენების გამოყენებას გირჩევენ ექსპერტები?

ქალბატონებს, რომლებსაც ჰიგიენურ საფენებთან გამოთხოვებაც არ სურთ და არც საკუთარი ჯანმრთელობისთვის ზიანის მიყენება უნდათ, ექსპერტები ურჩევენ ორგანული ბამბისგან დამზადებული საფენები შეიძინონ. მსგავსი ტიპის ჰიგიენური საფენი ნაკლებად საზიანოა. ის კანს არ აღიზიანებს და ინფექციების განვითარებისთვის კომფორტულ გარემოს არ ქმნის. ისეთი ჰიგიენური საფენები, რომლებიც ტოქსიკურ და ქიმიურ ნივთიერებებს არ შეიცავს, თქვენს ჯანმრთელობას საფრთხეს ნაკლებად უქმნის. გარდა ამისა, ზოგიერთი მათგანი მრავალჯერადი გამოყენებისაა. მთავარია, მსგავსი ტიპის საფენი ყოველი მოხმარების შემდეგ კარგად გარეცხოთ. უპირატესობა მიანიჭეთ ჰიპოალერგიულ, სწრაფი შეწოვის მქონე საფენებს. მეტი კომფორტისთვის, ეცადეთ მსუბუქი საფენები გამოიყენოთ. კანის გაღიზიანების თავიდან ასაცილებლად სურნელოვანი საფენების გამოყენებისგან თავი შეიკავეთ.

მომზადებულია ​womansworld.com-ის მიხედვით
თარგმნა ია ნაროუშვილმა 

შეიძლება დაინტერესდეთ

ჯანმრთელი და წარმატებული შვილების აღსაზრდელად საუკეთესო სტრატეგია მშობლების ბედნიერებაა

ჯანმრთელი და წარმატებული შვილების აღსაზრდელად საუკეთესო სტრატეგია მშობლების ბედნიერებაა

მშობლები გამუდმებით შვილების ბედნიერებასა და კეთილდღეობაზე ზრუნავენ. ბავშვების წარმატებისა და ჯანმრთელობისთვის ისინი არნახულ სტრესს უძლებენ. სამწუხაროდ, მშობლების სტრესი შვილებისთვის სარგებლის მომტანი ნამდვილად არ არის. გარდა ამისა, ის უფროსების ფიზიკურ და მენტალურ ჯანმრთელობასაც უდიდეს საფრთხეს უქმნის.

ჯანმრთელი და წარმატებული შვილების აღსაზრდელად საუკეთესო სტრატეგია მშობლების ბედნიერებაა. განტვირთვა და საკუთარ თავზე ფიქრი უფროსებს ბავშვებზე ზრუნვაში ძალიან ეხმარება. მშობლები შვილებისთვის იდეალურ როლურ მოდელად უნდა იქცნენ, რომლებიც სამსახურსა და განტვირთვას ერთმანეთს მარტივად უთავსებენ, ამასთან ბედნიერებიც არიან. უახლესი საერთაშორისო კვლევებით დგინდება, რომ ოჯახური ატმოსფერო, სადაც ბავშვი იზრდება, მის ჯანმრთელობაზე უდიდეს ზეგავლენას ახდენს. პატარებს არასახარბიელო ჯანმრთელობა აქვთ, როდესაც:

  • მშობლები ერთმანეთთან გამუდმებით ჩხუბობენ.
  • მშობლები პრობლემების ერთობლივად მოგვარებას არ ცდილობენ.
  • ბავშვებს მშობლების სითბო აკლიათ.
  • მშობლები შვილებს ზედმეტად აკონტროლებენ და მათ არარეალური მიზნების მიღწევას ავალდებულებენ.
  • მშობლებს მოთმინების უნარი არ აქვთ და ემოციური სტაბილურობა აკლიათ.


​ბავშვი მშობლების მეთვალყურეობის ქვეშ იზრდება. ის მათ გარემოცვაში თავს უსაფრთხოდ და დაცულად გრძნობს. ბავშვის ნერვული და ფსიქოლოგიური სისტემის ჯანსაღად ფუნქციონირება იმაზეა დამოკიდებული, რამდენად პირნათლად ასრულებენ მშობლები დაკისრებულ მოვალეობას. ბავშვი, რომელსაც მზრუნველი და თბილი მშობლები ზრდიან, სოციალიზაციის პროცესში ემოციურ ტრავმებს ნაკლებად მიიღებს. თუ ბავშვი ისეთ ოჯახში იზრდება, სადაც მას ადამიანებთან ურთიერთობის შესახებ არაფერს ასწავლიან და ტოლერანტობის შესახებ არაფერი იცის, ის სოციალიზაციის პროცესში ძალიან ბევრ ტრავმას მიიღებს.

მშობლები, განსაკუთრებით დედები, წარმატებული და ჯანმრთელი შვილების აღზრდას მაშინ ახერხებენ, როდესაც საკუთარი როლი აბედნიერებთ. გარდა ამისა, ძალიან დიდ როლს ასრულებს სოციალური მხარდაჭერაც. აუცილებელი არ არის, რომ ადამიანი მსგავს მხარდაჭერას მხოლოდ მეუღლისგან იღებდეს, ამას მეგობრები, კოლეგები, მეზობლები და ახლობლებიც არაჩვეულებრივად ახერხებენ.

მშობლების მხარდაჭერა ბავშვებსაც შეუძლიათ. როდესაც დედას ან მამას დახმარება სჭირდება, შვილი კი ყურადღებას იჩენს, ეს მშობლების განწყობას მნიშვნელოვნად ამაღლებს, რაც საბოლოოდ ბავშვზე ძალიან დადებითად აისახება. მშობლის მხრიდან გამუდმებული თავგანწირვა, სამსახურისა და თავისუფალი დროის დისბალანსი, ემოციური გადაწვა ოჯახში არაჯანსაღ ატმოსფეროს ქმნის, რაც ბავშვზე ნეგატიურად ზემოქმედებს. ჯანმრთელი და წარმატებული ბავშვის აღზრდა თუ გსურთ, მნიშვნელოვანია, რომ შემდეგ საკითხებზე გაამახვილოთ ყურადღება:

  • ბავშვის განვითარების შესახებ ინფორმაცია მოიძიეთ

მშობელი, რომელიც საკუთარ როლში გათვითცნობიერებულია, ნებისმიერ რთულ ვითარებას და კრიზისს მომზადებული ხვდება. თუ ბავშვის განვითარების თავისებურებების შესახებ ინფორმაციის მოპოვებას შეძლებთ, 2 წლის ბავშვის უძილობა და 12 წლის ბავშვის სახლში ტატუთი გამოცხადება საკუთარ თავზე კონტროლს აღარ დაგაკარგინებთ.

  • მიიღეთ რჩევები სხვა მშობლებისგან

ნათესავებს, მეგობრებს, ინტერნეტ ფორუმზე დარეგისტრირებულ მშობლებს ან სრულიად უცხო ადამიანებს, რომლებსაც ბავშვების სათამაშო მოედანზე ხვდებით, თქვენი პრობლემები გაუზიარეთ, მიიღეთ მათგან რჩევები, რომლებიც, შესაძლოა, ძალიან გამოგადგეთ.

  • გახსოვდეთ, რატომ გახდით მშობელი

მშობლობა ადამიანის გაცნობიერებული არჩევანია. როდესაც კარგად გესმით, თუ რატომ გადაწყვიტეთ, შვილი გყოლოდათ, სტრესთან გამკლავება აღარ გიჭირთ.

  • სამსახური და თავისუფალი დრო დააბალანსეთ

არ არსებობს იდეალური ბალანსი, რომლის დაცვაც ყველა მშობელს მოეთხოვება. ბავშვის ასაკის მატებასთან ერთად, თქვენი თავისუფალი დროის ხანგრძლივობაც შეიცვლება. აუცილებლად იზრუნეთ საკუთარ თავზე. თქვენი დრო ისე გადაანაწილეთ, რომ სამსახურში წასვლამდე ყავის დალევა შეძლოთ, დღის განმავლობაში ვარჯიშისთვისაც გამონახოთ დრო და მაქსიმალურად განიტვირთოთ. ვალდებული არ ხართ, რომ მთელი თქვენი დრო სამსახურსა და ბავშვებს მოახმაროთ.

მშობლებმა ნებისმიერი სტრატეგია უნდა გამოიყენონ, რათა ოჯახში ბედნიერი ატმოსფერო შექმნან. ამ გზით ისინი საკუთარი შვილების ჯანმრთელობასა და კეთილდღეობას შეუწყობენ ხელს.

მოზმადებულია​ psychologytoday.com- ის მიხედვით

თარგმნა ია ნაროუშვილმა

წაიკითხეთ სრულად