Baby Bag

შეიკავეთ თავი მოწევისგან - კორონავირუსი ძლიერ ორგანიზმს ვერ ერევა

შეიკავეთ თავი მოწევისგან - კორონავირუსი ძლიერ ორგანიზმს ვერ ერევა
კორონავირუსის სწრაფი გავრცელების შემდეგ მსოფლიო ჯანდაცვის ორგანიზაცია განსაკუთრებულ ყურადღებას ვირუსის პრევენციისა და კარანტინის რეჟიმის მოწესრიგების საკითხებს უთმობს. გარდა იმისა, რომ ვირუსის გავრცელების არეალში მყოფი ადამიანებისთვის ხელების ხშირი დაბანა და ხალხმრავალი ადგილებისთვის თავის არიდებაა რეკომენდებული, დაავადების პრევენციისთვის იმუნიტეტის გაძლიერებაზე ზრუნვაც ძალიან მნიშვნელოვანია, რათა კორონავირუსით დაინფიცირების შემთხვევაში მას ძლიერი ორგანიზმით შეხვდეთ.

იმუნური სისტემა ინფექციებსა და დაავადებებს ებრძვის. ის საფრთხეს სხვადასხვა მექანიზმის გამოყენებით ძალიან სწრაფად ამოიცნობს, რისი წყალობითაც ვირუსებს, ბაქტერიებს, სოკოებს, პარაზიტებსა და არაჯანსაღ უჯრედებს (როგორიცაა სიმსივნური უჯრედი), აქტიურად ებრძვის. ვირუსებს საკუთარი პროტეინების გასამრავლებლად სპეციალური მექანიზმის ამუშავება ესაჭიროებათ. ვირუსულ ინფექციაზე ბუნებრივი იმუნური პასუხის საუკეთესო საშუალება ბუნებრივი მკვლელი უჯრედების აქტივაციაა, რომლებიც ვირუსულ ინფექციებს წარმატებით ებრძვიან.

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)


თითოეულ ადამიანს განსხვავებული იმუნური სისტემა აქვს. იმუნური სისტემის მდგრადობა ყოველდღიურად იცვლება. იმუნიტეტის ბრძოლისუნარიანობა ძალიან ბევრ ფაქტორზეა დამოკიდებული. იმისთვის, რომ იმუნური სისტემის დასუსტების თავიდან აცილება შეძლოთ და კორონავირუსს ძლიერი ორგანიზმით შეხვდეთ, რამდენიმე ფაქტორზე უნდა გაამახვილოთ ყურადღება.


სტრესის შემცირება

კორონავირუსის შესახებ გავრცელებული დეზინფორმაციის ზეგავლენით ადამიანები უკიდურესად სტრესულ მდგომარეობაში იმყოფებიან. მათი ნაწილი იმდენად დაპანიკდა, რომ საკვებისა და აუცილებელი პროდუქტების მომარაგება დაიწყო. საგანგებო ვითარებისთვის სათანადო მზაობაში ცუდი არაფერია, თუმცა არ დაგავიწყდეთ, რომ სტრესი იმუნიტეტს მნიშვნელოვნად აქვეითებს, რის გამოც თქვენი ორგანიზმი ინფექციურ დაავადებებს ეფექტურად ვერ უმკლავდება. სტრესის ჰორმონის (კორტიზოლი) მცირე დოზით მატება ორგანიზმისთვის სასარგებლოა, თუმცა თუ კორტიზოლის დონე მეტისმეტად იმატებს, ორგანიზმში ანთებითი კერების წარმოშობის საფრთხე ჩნდება. სტრესი ლიმფოციტების წარმოების პროცესსაც აფერხებს. ლიმფოციტები ინფექციებთან ბრძოლაში გადამწყვეტ როლს ასრულებენ. სისხლში მათი დონის შემცირება თქვენ ვირუსებთან გამკლავებაში ხელს მნიშვნელოვნად გიშლით. ვირუსის აფეთქების პარალელურად, ეცადეთ, სიმშვიდე შეინარჩუნოთ. პანიკა თქვენს მდგომარეობას უფრო დაამძიმებს. სტრესის შესამცირებლად რელაქსაციის სხვადასხვა საშუალებას მიმართეთ. კარგია, თუ მედიტაციით დაკავდებით.

ზომიერი ფიზიკური აქტივობა

რეგულარული ვარჯიში გულ-სისხლძარღვთა სისტემის მდგომარეობას აუმჯობესებს, ის არტერიულ წნევას არეგულირებს, წონის გაკონტროლებაში გეხმარებათ და დაავადებებთან ბრძოლაშიც გიწყობთ ხელს. ფიზიკური დატვირთვა სისხლის ცირკულაციასაც აუმჯობესებს, რის გამოც იმუნური სისტემა გამართულად და ეფექტურად მუშაობს. რეგულარული ვარჯიში თქვენს ჯანმრთელობაზე დადებითად აისახება, რაც ვირუსულ ინფექციებთან ბრძოლაში გეხმარებათ. ინტენსიური ფიზიკური დატვირთვა ორგანიზმში ანთებითი კერების წარმოქმნას უწყობს ხელს. ვირუსების აფეთქების პერიოდში მეტისმეტად რთული დატვირთვისგან თავი შეიკავეთ.

ბალანსირებული კვების რაციონი

იმუნური სისტემის გამართული მუშაობისთვის ჯანსაღად და სრულფასოვნად კვება აუცილებელია. ღარიბ სახელმწიფოებში, სადაც ადამიანებს საკვების მოპოვება უჭირთ, ვირუსული ინფექციები ყველაზე სწრაფად ვრცელდება. ორგანიზმში გარკვეული მიკრონუტრიენტების დაბალი შემცველობა დაავადებებისადმი იმუნურ რეაქციებს ასუსტებს. დარწმუნდით, რომ ყოველდღიურად სათანადო რაოდენობის თუთიას, რკინას, ფოლიუმის მჟავას, სელენს, სპილენძს, C, A, B6 და E ვიტამინებს იღებთ. თქვენი რაციონი ხილითა და ბოსტნეულით გაამდიდრეთ, რათა ორგანიზმის გაჯანსაღება და გაძლიერება შეძლოთ.

მოწევისგან თავის შეკავება

თამბაქოს მოწევა მნიშვნელოვნად ზრდის პნევმონიითა და სეზონური ვირუსებით დაავადების რისკებს. მწეველი ადამიანის ორგანიზმს ვირუსული ინფექციებისგან გასათავისუფლებლად უფრო დიდი დრო სჭირდება. მოწევა მნიშვნელოვნად ამცირებს სისხლში C ვიტამინის დონეს, რომელიც ორგანიზმისთვის ერთ-ერთი მთავარი დამცავი ანტიოქსიდანტია.

ძილის რეჟიმის მოწესრიგება

კვლევებით დასტურდება, რომ ადამიანები, რომლებსაც მოუწესრიგებელი ძილის რეჟიმი აქვთ, ვირუსული ინფექციებით უფრო მარტივად ავადდებიან. ძილის დროს ორგანიზმში დიდი რაოდენობით ციტოკინი გამომუშავდება. ციტოკინი ცილაა, რომელიც ინფექციებისა და ანთებითი პროცესების წინააღმდეგ ბრძოლისთვის ორგანიზმს აუცილებლად სჭრიდება. როდესაც თქვენ ძალიან ცოტა გძინავთ, ანტისხეულებისა და იმუნური უჯრედების დეფიციტის პრობლემის წინაშე დგებით. ზრდასრულ ადამიანებს დღე-ღამეში 7-8 საათი მაინც უნდა ეძინოთ, ბავშვებსა და თინეიჯერებს კი სულ ცოტა 10 საათი.

ადამიანები იმუნიტეტის გასაძლიერებლად ხშირად მიირთმევენ მცენარეულ პრეპარატებსა და სიროფებს, თუმცა ჯერჯერობით მათი ეფექტურობა მეცნიერულად დამტკიცებული არ არის.

მომზადებულია ​zmescience.com-ის მიხედვით
თარგმნა ია ნაროუშვილმა 

შეიძლება დაინტერესდეთ

„ვინ დაგვიცავს ჩვენ, იტალიაში არალეგალურად მცხოვრებ და დასაქმებულ ათიათასობით საქართველოს მოქალაქეს“ - ქართველი ემიგრანტის ღია წერილი პრემიერ-მინისტრს

„ვინ დაგვიცავს ჩვენ, იტალიაში არალეგალურად მცხოვრებ და დასაქმებულ ათიათასობით საქართველოს მოქალაქეს“ - ქართველი ემიგრანტის ღია წერილი პრემიერ-მინისტრს

ემიგრაციაში მყოფი ქართველი ჟურნალისტი ლელა თოლორდავა საქართველოს პრემიერ-მინისტრს გიორგი გახარიას ღია წერილით მიმართავს:

ბატონო გიორგი, ამ წერილს იტალიაში, ტოსკანაში, პიზასთან ახლოს, ერთ პატარა სოფელ ფორკოლში ჩელაიების ოჯახის ბადანტე (მომვლელი), პროფესიით ჟურნალისტი ლელა თოლორდავა გწერთ.

წერილის დაწერამდე კაი ბევრი გზა გავიარე, ცხოვრებაში განვლილ გზას კი არ ვგულისხმობ. სახლში დავდივარ, ბოლთას ვცემ!!!

მაგიდის გარშემო სიარული არ შეიძლება, ვიღაც გახდებაო ავადო- ჩვენში იციან თქმა. აქ ორნი ვართ, მე და ბებია ფრანჩესკა. მისი ქალიშვილი ძალიან შიშობს ავადმყოფ დედას კორონა ვირუსი არ შეხვდეს, თორემ ვერ გადაიტანს.

ამიტომ, იმ დღიდან რაც იტალიის საზღვარი გადმოკვეთა ,,ჩინურმა ჭირმა" ირიბად მაფრთხილებს, რომ სახლიდან გასვლას ყველა უნდა მოვერიდოთ.

დღემდე სიტყვას ბანზე ვუგდებდი. იმ ორ საათს (2- დან 4-მდე), როცა ბებოს სძინავს და ჩემი დასვენების დროდ არის გამოყოფილი, სოფელში ვსეირნობდი, ან ჩემიანებთან ერთად ბარში ყავას გეახლებოდით და ერთმანეთს უფერულ დღეებს ვულამაზებდით.

მაგრამ, დღეს დილით მითხრა , რომ საფრთხე ძალიან ახლოსაა, სულ რაღაც 10 კილომეტრში დაფიქსირდა კორონა ვირუსით დაინფიცირების შემთხვევა.

გუშინ, საღამოს ტელევიზიით იტალიის პრემიერმინისტრმა განცხადება გააკეთა, მთავრობის გადაწყვეტილებით, 15 მარტამდე სწავლა მთელი ქვეყნის მასშტაბით შეწყდა, ერთი თვით შეაჩერეს ყველა სახის ღონისძიებები. მოუწოდებენ მოერიდონ თავშეყრის ადგილებს, ხანდაზმულებს სთხოვენ სახლში დარჩენას.

უმჯობესია, ყველანი დავრჩეთ სახლში, ასე მეტად დაცული ვიქნებითო- გამომიცხადა ბებოს ქალიშვილმა.

ბატონო გიორგი, იცით რა ნერვების ფასად მიჯდება 24 საათიანი სამუშაო?! მით უფრო, მთელი ცხოვრება ისეთი სამსახურები მქონდა, უმეტეს წილად ქუჩაში ყოფნა მიწევდა. ახლა სახლში რომ ვუზივარ ბებოს, პატიმარი მგონია თავი. იმის გათავისება , რომ მხოლოდ 2 საათი შემიძლია სახლიდან გასვლა, დღემდე მიჭირდა. ახლა, ის ორი საათიც სანატრელი მიხდება.

გავჯინიანდე და გავიდე, ვაი თუ ხიფათი შემომეყაროს გზაზე და ჩემი დაუდევრობით სიცოცხლე მოვუსწრაფო ჩემს მოხუცს. სტატისტიკით დამტკიცებულია, რომ 80 წელს გადაცილებულ მოხუცებს, ვისაც ესა თუ ის დაავადება აწუხებს, კორონა ვირუსის მსხვერპლნი ხდებიან.

სხვა გზა არ მაქვს, უნდა დავემორჩილო და უარი ვთქვა სახლიდან გასვლაზე, იმ დრომდე, ვიდრე ეს საშინელი ვირისი ცოცხალია.

თითქოს ის განსაცდელი არ გვეყოფოდა, რაც გვადგა, სამშობლოდან, ოჯახებიდან შორს ყოფნა, შვილების მონატრებაში თეთრად გათენებული ღამეები. ახლა კორონა ვირუსიც დაემატა.

ხმას არ ამოვიღებდი, მარტო მე რომ ვიდგე ამ პრობლემის წინაშე, მაგრამ ჩემს დღეშია ათიათასობით საქართველოს მოქალაქე.

არ დავიწყებ იმაზე საუბარს, რა მდგომარეობამ მოგვიყვანა აქამდე. ახლა სხვა საკითხის განმარტებას მივითხოვ თქვენგან.

დიახ, მოვითხოვ, რადგან თქვენ ხართ იმ მთავრობის მეთაური, ვისაც საქართველოს მართვის სადავეები უპყრია ხელთ.

შორიდან, როგორც ვახერხებ, თვალს ვადევნებ საქართველიში მიმდინარე პროცესებს, კონკრეტულ შემთხვევაში, კორონა ვირუსის წინააღმდეგ მიმართულ ქმედებებს.

ჩემი დაკვირვებით, ქართული საზოგადოება კორონა ვირუსის გავრცელების თვალსაზრისით, იტალიას ერთადერთ საფრთხედ მიიჩნევს. რამეთუ, აქ ბევრი ქართველი ემიგრანტია, ასევე იაფი ფრენების დამსახურებით, მაღალია ტურისტების რიცხვი.

და სამართლიანადაც , მით უფრო სტატისტიკაც საგანგაშოა.

4 მარტის მონაცემებით იტალიაში

ინფიცირებულია - 2706 ადამიანი!!!

აქედან:

1065 - ადამიანი იმყოფება მსუბუქი სიმპტომებით და მკურნალობას აგრძელებენ სახლში, საჭიროების შემთხვევაში მიმართავენ საავადმყოფოს;

1346 - ადამიანი მკურნალობას აგრძელებს საავადმყოფოში;

295 - ადამიანი იმყოფება ინტენსიურ განყოფილებაში;

276 - გამოჯანმრთელებულია;

107 - გარდაცვლილი...

მონაცემები წუთი-წუთზე იზრდება და, შესაბამისად, პანიკაც.

იტალიის ხელისუფლება სრულ მზადყოფნას აცხადებს საკუთარი მოქალაქეების დასაცავად. საქართველოს ხელისუფლებაც მზადაა დაიცვას მოსახლეობა.

მაგრამ ვინ დაგვიცავს ჩვენ, იტალიაში არალეგალურად მცხოვრებ და დასაქმებულ ათიათასობით საქართველოს მოქალაქეს?!

მით უფრო, როცა იტალიის ხელისუფლებამ ჩვენი არსებობაც კი არ იცის, ოფიციალურად.

საქართველოს ხელისუფლებისთვის ჩვენ სავიზო რეჟიმის დამრღვევ მოქალაქეებად მოვიაზრებით და შინ დაბრუნების შემთხვევაში, ჯარიმითაც გვემუქრება.

ბატონო გიორგი, კორონა ვირუსმა ჩვენამდე რომ მოაღწიოს, ვის უნდა მივმართოთ?!

გთხოვთ, განგვიმარტოთ, იღებს ვინმე ჩვენზე პასუხისმგებლობას, თუ მარტო ღმერთის იმედზე ვიყოთ?!

P.S. მეგობრებო, ჩვენ ბევრნი ვართ და ერთად უნდა მოვითხოვოთ, ამ კითხვაზე პასუხი!!!

ეს წერილი პრემიერამდე უნდა მივიდეს!!!“ - წერს ლელა თოლორდავა სოციალურ ქსელში.

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

წაიკითხეთ სრულად