„როგორც დიაგნოზის დასმა მკურნალობის სწორად წარმართვისთვის აუცილებელი პირობაა, ასევე მნიშვნელოვანია კითხვაზე სწორი პასუხის გაცემა. იმისთვის, რომ ზედმეტი კილოგრამები დაიკლოთ და შემდეგ სასურველი წონა შეინარჩუნოთ, აუცილებელია, არა მარტო ჯანსაღი კვება და ვარჯიში, არამედ ამ ყველაფერზე ფსიქოლოგიური მუშაობა,“ - აღნიშნავს ქეთი მესხიშვილი.
სოციალურ პრობლემაში იგულისხმება სოციუმის გავლენა. გარემოს დიდი მნიშვნელობა აქვს. მაგალითად, არის შემთხვევები, სტუმრად მისულს იმდენს დაგაძალებენ ჭამეო, სულაც რომ არ იყო მშიერი, მაინც მოგინდება ჭამა.
რა იგულისხმება ფსიქოლოგიურ დონეზე - ადამიანები ჭამენ გაუცნობიერებელი ემოციების გამო. წონაში მატებას კი დიდი რაოდენობით კალორიების მიღება განაპირობებს. არ ვჭამ და ვიმატებ, მსგავსი რამ არ არსებობს. როცა დიდი ხანი არ ჭამ, აშიმშილებ ორგანიზს, მერე ერთ ჭამაზე ბევრს ჭამ. დიეტაც რომ მთავრდება, რაც არ გიჭამია, ინაზღაურებ და ბევრს ჭამ.
სწორედ ამ სამი მიზეზის გამო ვერ იკლებს ადამიანი წონაში. შეიძლება ვარჯიშობს, დიეტაზეა, მაგრამ სასურველ შედეგს ამ გარემოებების გამო მაინც ვერ აღწევს. კიდევ ერთხელ ხაზგასმით აღვნიშნავ, იმისთვის, რომ ადამიანმა წონაში დაიკლოს და შეინარჩუნოს, აუცილებელია, არა მარტო ჯანსაღი კვება და ვარჯიში, არამედ ამ ყველაფერზე ფსიქოლოგიური მუშაობა.
- რა კავშირშია წონასთან სტრესი?
- სტრესი არსებობს ორი სახის: მწვავე სტრესის დროს ვერ ჭამს ადამიანი და ქრონიკული სტრესის დროს სულ სუსნაობა უნდა, გაუცნობიერებლად ბევრს ჭამს.
ადამიანები წონაში მატებას მაშინ იწყებენ, როცა ფსიქოლოგიური სირთულეების წინაშე დგანან. მაგალითად, ორსულობა ქალის ცხოვრებაში ერთ-ერთი რთული ეტაპია - ძალიან მაგარი შეგრძნებაა, დედა უნდა გახდე, მაგრამ დადებითი ემოციებიც სტრესთან არის დაკავშირებული.
- დიეტაც ხომ ერთგვარი სტრესია?
- დიახ, დიეტა არის ორგანიზმისთვის გარკვეული სახის სირთულე, სტრესი. დიეტის დასრულების შემდეგ მიღებული კალორიები ასე ვთქვათ, ორმაგად ერგება ორგანიზმს და იწყებს წონაში სწრაფად მატებას. დიეტით და შიმშილით წონაში კლება არ არის მართებული მიდგომა, აუცილებელია რეგულარული კვება - 4 საათში ერთხელ და ეს ციკლი არ უნდა დაირღვეს. კუჭს საჭმელი სჭირდება 3-4 საათში ერთხელ, მისი ფუნქციაა საჭმლის გადამუშავება, თუ არ მივაწვდით საჭმელს, მას ამ ფუნქციას დავუკარგავთ.
- რატომ ხდება, რომ ხშირ შემთხვევაში ასაკის მატებასთან ერთად წონაშიც იმატებს ადამიანი?
- ასაკის მატებასთან ერთად ადამიანს მეტი საზრუნავი უჩნდება და ნაკლებად ზრუნავს საკუთარ თავზე, არ აქცევს ყურადღებას კვების რეჟიმს, რაც წონაზე აისახება.
- რომ შევაჯამოთ, რა უნდა გავაკეთოთ და რა არ უნდა გავაკეთოთ იმისთვის, რომ წონაში დავიკლოთ?
- აუცილებელია რეგულარული კვება, ანუ 3-4 საათში ერთხელ ჭამა. კარგი იქნება, კვების დღიურის წარმოება - ყველა პროდუქტის ჩამოწერა, რასაც დღის განმავლობაში მიირთმევს ადამიანი. კვების დღიურის საშუალებით დააფიქსირებთ, თუ რა რაოდენობის კალორიას იღებთ, რომელ პროდუქტებს ჭამთ და სად უშვებთ შეცდომას. ასევე, კარგია, როცა ნელ-ნელა, ნაბიჯ-ნაბიჯ მიდიხართ მიზნამდე. მაგალითად, საწყის ეტაპზე მიზნად დაისახეთ არა 10 კგ-ს, არამედ ჯერ 2 კგ-ს დაკლება და ასე ნელ-ნელა. ასევე უნდა დააკვირდეთ, როდის გინდებათ ტკბილი, ანუ როგორც ფსიქოლოგები ვუწოდებთ, როდის ხდება ემოციური შიმშილი - როდესაც კუჭს არ უნდა და ადამიანი მაინც ჭამს.
