Baby Bag

დაავადების გაუარესების კლინიკური ნიშნები კოვიდ-19-ით ინფიცირებულ ადამიანებში - ექიმი ნანა გეგეჭკორი

დაავადების გაუარესების კლინიკური ნიშნები კოვიდ-19-ით ინფიცირებულ ადამიანებში - ექიმი ნანა გეგეჭკორი

ექიმი ნანა გეგეჭკორი სოციალურ ქსელში ვრცელ გზამკვლევს აქვეყნებს, რომელშიც ის ადამიანებს დეტალურად უხსნის ​კოვიდ-19-ის დამძიმების ნიშნებს და გამოკვეთს სხვადასხვა ხარისხის სუნთქვის უკმარისობისთვის დამახასიათებელ სიმპტომატიკას. ნანა გეგეჭკორის პოსტს უცვლელად გთავაზობთ:

​მსუბუქი ფორმით დაავადებულ პაციენტებს ექიმის სპეციალური მეთვალყურეობა არ სჭირდებათ, თუ ისინი არ განეკუთვნებიან რისკ-ჯგუფებს!

რისკ-ჯგუფში მყოფი ყველა პაციენტიც არ საჭიროებს ამგვარ ზედამხედველობას, თუ მათი თანდართული პრობლემები კარგად არის მართული. მაგალითად, ზედმიწევნით კარგად კონტროლირებადი შაქრიანი დიაბეტით დაავადებული პაციენტი მსუბუქი კოვიდ-ინფექციით, შეიძლება დარჩეს სახლში და თავად მართოს პროცესი, ისევე როგორც მოიქცეოდა სეზონური გრიპის შემთხვევაში.

თუმცა, მნიშვნელოვანია დავაკვირდეთ სიმპტომებს დინამიკაში და ექიმთან მიმართვის გადაწყვეტილებას ყოველდღიურ რეჟიმში გადავხედოთ. როგორც წესი, კლინიკურად, პაციენტის დამძიმება დაავადების დაწყებიდან ერთ კვირაში ხდება ხოლმე (თუ ასეთი ალბათობა აქვს პაციენტს) და რისკ-ჯგუფები ამ ეტაპზე განსაკუთრებულ დაკვირვებას ითხოვენ. ასეთ დროს ძალიან დაბალია სრული კლინიკური კვლევის აუცილებლობის ზღურბლი. ზოგიერთ მათგანს შეიძლება ჰოსპიტალიზაციაც დასჭირდეს. დღესდღეობით არ არსებობს არანაირი სპეციფიკური კრიტერიუმი, რის მიხედვითაც გართულებების ან დაავადების დამძიმების პროგნოზირების სრული შესაძლებლობა გვექნებოდა მსუბუქი ფორმებით ინფიცირებულებში. ჰოსპიტალიზირებულ პაციენტებში არსებობს სპეციალური რისკის შკალები, რაც კლინიკური გამოსავლის მეტნაკლებად პროგნოზირების საშულებას იძლევა, თუმცა მათი გამოყენება მკურნალობის სტანდარტს ჯერჯერობით არ წარმოადგენს.

დაავადების გაუარესების კლინიკური ნიშნები:

  • უკიდურესი დაღლილობის შეგრძნება არ გაძლევთ მოძრაობის საშუალებას.
  • გონების ნაწილობრივი ან სრული დაბინდვა, უჩვეულო აგზნება, გამოხატული მოუსვენრობა სხვა სიმპტომებთან ერთად.
  • მაღალი ტემპერატურა არ ემორჩილება მედიკამენტოზურ მკურნალობას.
  • გამოხატული სუნთქვის უკმარისობა.
  • ტკივილი, უჩვეულო სიმძიმის ან მოჭერის შეგრძნება გულმკერდის არეში (ტკივილის ხასიათი არ იცვლება მოძრაობისას სუნთქვის ფაზებთან მიმართებაში. ტკივილის გამოწვევა ან დაყუჩება ან ხასიათის ცვლილება შეუძლებელია შეხებით. ტკივილი გადაეცემა ქვედა ყბას, კისერს, ზემო კიდურებს, ბეჭის მიმდებარე ტერიტორიას ან მუცლის ზედა კვადრანტს).
  • უჩვეულო ტაქიკარდია (აჩქარებული გულისცემა), ნორმალური გულისცემის სიხშირე არ უნდა აღემატებოდეს 100-ს წუთში მცირედი დატვირთვისას.
  • საკმარისი რაოდენობით საკვების და სითხის მიღების შეუძლებლობა კუჭ-ნაწლავის ტრაქტის სიმპტომების გამო.
  • დიარეის და ღებინების ხშირი ეპიზოდები, რამაც შეიძლება სერიოზული დეჰიდრატაცია გამოიწვიოს.
  • ​ქვემო კიდურების ასიმეტრიული შეშუპება (ასეთ შემთხვევაში ქვედა კიდურების ღრმა ვენების თრომბოზი უნდა გამოირიცხოს).
  • სუნთქვის გამოხატული უკმარისობა.
  • სუნთქვის უკმარისობის კლინიკური ნიშნები:

  • ჩვეულებრივი აქტივობები ხდება უჩვეულოდ შეუძლებელი სუნთქვის გაძნელების გამო.
  • სუნთქავთ უფრო ჩქარა და მძიმედ, ვიდრე ჩვეულებრივ (სუნთქვის სიხშირე მოზრდილებში ნორმის მიხედვით არ აღემატება 18-20-ს წუთში).
  • ჩვეულებრივი აქტივობა იწვევს თავბრუსხვევას.
  • ვისაც პულსოქსიმეტრზე მიგიწვდებათ ხელი, ​სატურაცია ნორმალურ მდგომარეობაში უნდა აღემატებოდეს 95%. თუ სატურაცია <92%-ზე, ოთახის ჰაერზე ყოფნისას, პაციენტს ესაჭიროება სასწრაფო ჰოსპიტალიზაცია.
  • პროდუქტიული ხველა, იგულისხმება დიდი რაოდენობით ნახველი რომლის ევაკუაცია (ამოხველება) გართულებულია. ასეთ შემთხვევაში უნდა გამოირიცხოს თანდართული ბაქტერიული პნევმონია. კოვიდს უმეტესად მშრალი ხველა ახასიათებს.
  • ქოშინი მინიმალური დატვირთვისას.
  • სუნთქვის უკმარისობის (დისპნეა) ხარისხები:

    მსუბუქი დისპნეა – სუნთქვის უკმარისობა არ იწვევს ჩვეულებრივი, ყოველდღიური აქტივობების შეზღუდვას და ის გამოხატულია მხოლოდ უჩვეულო დატვირთვისას, მაგალითად, სწრაფი სიარულის, ან ერთი თუ ორი სართულით კიბეზე ასვლისას.

    საშუალო სიმძიმის დისპნეა – სუნთქვის უკმარისობა გიზღუდავთ ჩვეულებრივ აქტივობებს (გამოხატულია სამზარეულოში საკვების მომზადებისას, ვერ ადიხართ კიბეებზე შესვენების გარეშე, ვერ ალაგებთ სახლს).

    მძიმე დისპნეა – ​სუნთქვის უკმარისობა გამოხატულია დასვენების დროსაც; ვერ ახერხებთ მარტივ მოძრაობებს, მაგალითად, ტანსაცმლის ჩაცმას.

    დაავადების დინამიკის შეფასებას მნიშვნელობა აქვს იმისთვის, რომ გავიგოთ შეგვიძლია მკურნალობის სახლში გაგრძელება, თუ დროა მივმართოთ სამედიცინო დაწესებულებას.

    თუ დაავადების ჩვეულ მიმდინარეობას ახალი, რთულად ასატანი სიმპტომები დაერთო, ან მდგომარეობა გაუარესდა, აუცილებელია სრული დიაგნოსტიკური კვლევის ჩატარება. ზემოთ ჩამოთვლილ ტესტებთან ერთად სასურველია სეზონურ ვირუსულ ინფექციებზეც ჩატარდეს კვლევა და ასევე, თუ შესაძლებელია ჩატარდეს რადიოლოგიური დიაგნოსტიკა ზემოთ ნახსენები სქემით.

    საშუალო სიმძიმის დაავადების შემთხვევაში ზედმიწევნით ფრთხილად უნდა გამოიყოს პაციენტთა ჯგუფი, რომელიც დროულ ჰოსპიტალიზაციას საჭიროებს; რისკის ფაქტორების ან უარყოფითი დინამიკის ტემპის გათვალისწინებით. დანარჩენების მართვა კი ექიმის ყოველდღიური მეთვალყურეობის ქვეშ შესაძლებელია სახლში გაგრძელდეს.

    საშუალო სიმძიმის დაავადების კრიტერიუმებია:

    ჰიპოქსიის გარეშე მიმდინარე რადიოგრაფიულად დადასტურებული ქვედა სასუნთქი გზების დაავადება (პნევმონია), სატურაცია (სისხლში ჟანგბადის პროცენტული შემცველობა) >94% ოთახის ჰაერზე.

    განსაკუთრებით მნიშვნელოვანია არ გამოგვეპაროს მძიმედ მიმდინარე დაავადება და ყველა შესაძლებლობა გამოვიყენოთ ამგვარი პაციენტის დროული ჰოსპიტალიზაციისთვის.

    მძიმედ მიმდინარე დაავადების კრიტერიუმებია:

    - გამოხატული ტაქიპნოე (სუნთქვის სიხშირე >30 წუთში)

    - ჰიპოქსია (სატურაცია <93%, სისხლში ჟანგბადის პარციალური წნევის შეფარდება ჩასუნთქული ჟანგბადის ფრაქციასთან <300, ეგრეთ წოდებული PF ratio)

    - რადიოლოგიური კვლევით დადასტურებული ინფილტრატები ფილტვებში >50%

    ცხადია, მ​ძიმედ მიმდინარე დაავადება სასწრაფო ჰოსპიტალიზაციას მოითხოვს. ამგვარი მიდგომა დაგჭირდებათ ასევე იმ პაციენტების მიმართაც, ვისაც მნიშვნელოვანი ქრონიკული დაავადებების გამწვავება აღენიშნება და ეს ართულებს კოვიდის შედარებით მსუბუქი ფორმის სახლში მართვას. სწორად შერჩეული პაციენტის დროული ჰოსპიტალიზაცია კრიტიკულად აუცილებელია საიმედო კლინიკური გამოსავლისათვის.

    ჰოსპიტალიზირებულ პაციენტს პირველ ეტაპზე სჭირდება ის ტესტები, რაც ზემოთ არის მითითებული. დამატებით, აუცილებელია ელექტროკარდიოგრამა, რადგან ამგვარ პაციენტებს ხშირად აღენიშნებათ ელექტროლიტური ბალანსის დარღვევები და მკურნალობისას ელექტროკარდიოგრამაზე შესაბამისი ცვლილებების დროულ აღმოჩენას გადამწყვეტი მნიშვნელობა აქვს სიცოცხლისათვის საშიში არითმიების თავიდან ასარიდებლად.“

    შეგახსენებთ, რომ დღემდე საქართველოში კოვიდ-19-ის 123470 შემთხვევაა აღრიცხული. ბოლო 24 საათში კორონავირუსი 4780 ადამიანს დაუდასტურდა.

    ​წყარო

    არ დაგავიწყდეთ !!!

    დაემატეთ ჯგუფში საბავშვო რეცეპტები

    „მინდა, რომ ადამიანებმა ეს შეცდომა არ დაუშვან,“ - იმუნოლოგი ბიძინა კულუმბეგოვი
    ​​იმუნოლოგი ბიძინა კულუმბეგოვი იმ მითების შესახებ საუბრობს, რომლებიც კორონავირუსული ინფექციის შესახებ საზოგადოებაში აქტიურად ვრცელდება. მისი თქმით, გავრცელებული ინფორმაცია ლევოფლოქსაცინის ეფ...

    შეიძლება დაინტერესდეთ

    სამყაროს ახლა ყველაზე ნაკლებად წითელას ეპიდემიის აფეთქება სჭირდება - უნდა ჩაუტარდეთ თუ არა გეგმიური აცრები ბავშვებს კორონავირუსის პანდემიის დროს?

    სამყაროს ახლა ყველაზე ნაკლებად წითელას ეპიდემიის აფეთქება სჭირდება - უნდა ჩაუტარდეთ თუ არა გეგმიური აცრები ბავშვებს კორონავირუსის პანდემიის დროს?
    მშობლების დიდ ნაწილს პანდემიის ფონზე გეგმიურ აცრებთან დაკავშირებით გადაწყვეტილების მიღება უჭირს. მათ არ იციან, უნდა ჩაუტარდეთ თუ არა ბავშვებს ვაქცინაცია შექმნილი რთული ვითარების გამო. ჯანდაცვის სფეროს წარმომადგენლების თქმით, პატარებისთვის გეგმიური აცრების ჩატარება აუცილებელია, რაც სიფრთხილის შესაბამისი ზომების დაცვით უნდა მოხდეს.

    ამერიკის პედიატრთა აკადემიის ცნობით, სამყაროს ახლა ყველაზე ნაკლებად წითელას ეპიდემიის აფეთქება სჭირდება. Covid-19-ის მასშტაბური გავრცელების ფონზე ვაქცინაცია კიდევ უფრო დიდ მნიშვნელობას იძენს, რის გამოც გეგმიური აცრების ჩატარება აუცილებელია.

    „თუ ვაქცინაციის რიცხვი მოიკლებს, ჩვენ კიდევ ერთ პანდემიას მივიღებთ. წითელას ეპიდემია იფეთქებს, რაც ყველაზე ნაკლებად გვინდა მაშინ, როდესაც პანდემია მძვინვარებს. ბავშვებს გეგმიური აცრები 10 მძიმე დაავადების პრევენციის მიზნით უტარდებათ. ზოგიერთი ვაქცინა რამდენჯერმე კეთდება, რათა ორგანიზმმა იმუნური პასუხი გამოიმუშავოს. თუ გეგმიურ აცრებზე უარს ვიტყვით, პატარების სიცოცხლეს საფრთხის წინაშე დავაყენებთ, რადგან ის დაავადებები, რომლებისგანაც ბავშვებს ვაქცინაცია იცავს, საკმაოდ მძიმე დაავადებებია. ზოგიერთი მათგანი სიცოცხლისთვის განსაკუთრებით საშიშია.“ - აღნიშნულია ამერიკის პედიატრთა აკადემიის ოფიციალური წარმომადგენლის განცხადებაში.

    ამერიკის ჯანდაცვის სახელმწიფო დეპარტამენტის ოფიციალურ განცხადებაში ნათქვამია, რომ ექიმებმა, რომლებიც პანდემიის ფონზე სრული დატვირთვით ვერ მუშაობენ, გარკვეული მექანიზმით უნდა იხელმძღვანელონ. თუ ისინი ყველა პაციენტის მიღებას ვერ ახერხებენ, უპირატესობა ახალშობილებს და 2 წლამდე ასაკის ბავშვებს უნდა მიანიჭონ. აუცილებელია, რომ ამ ასაკის ბავშვებს ყველა გეგმიური აცრა დროულად ჩაუტარდეთ.

    ბავშვის ვაქცინაციაზე მიყვანის დროს მშობლებმა სიფრთხილის განსაკუთრებული წესები უნდა დაიცვან. ვიდრე ექიმთან მათი ვიზიტის დრო მოვა, უმჯობესია, რიგს მანქანაში დაელოდონ, რათა ვირუსით დაინფიცირების რისკები მნიშვნელოვნად შეამცირონ. ამერიკის შეერთებულ შტატებში ექიმები ჩვილებსა და მცირეწლოვან ბავშვებს დღის პირველ ნახევარში იღებენ, ჯანმრთელობის სხვადასხვა პრობლემის მქონე პაციენტებს კი - საღამოობით. ღამის განმავლობაში კლინიკებს სრულფასოვანი დეზინფექცია უტარდება, რაც ვირუსის გავრცელების რისკებს ამცირებს.

    არ დაგავიწყდეთ !!!

    Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

    ადამიანებს შინაური ცხოველების ბედიც აღელვებთ. ყველას აინტერესებს, როგორ უნდა დაიცვან საყვარელი ცხოველების უსაფრთხოება და ჯანმრთელობა პანდემიის პირობებში. ამერიკის ვეტერინართა სამედიცინო ასოციაციის ცნობით ჰონგ-კონგში 2 ძაღლს, ხოლო ბელგიაში 1 კატას კორონავირუსი დაუდგინდათ, თუმცა აღნიშნული მონაცემები საბოლოო დასკვნების გაკეთების საფუძველს არ იძლევა. არ არსებობს მტკიცებულება, რომ ცხოველებს სხვა ცხოველების ან ადამიანების Covid-19-ით დაინფიცირების უნარი აქვთ.

    ვერავინ იტყვის, რომ ძაღლები, რომლებსაც კლინიკური სიმპტომები უვითარდებათ, ადამიანებმა დააინფიცირეს. მიუხედავად ამისა, ცხოველებთან ურთიერთობის დროსაც სიფრთხილის გამოჩენა გმართებთ. არსებობს საფრთხე, რომ დაინფიცირებულ ცხოველთან ურთიერთობისას ვირუსი თქვენც გადმოგედოთ. როდესაც ცხოველის საკვებს, კანს, ბეწვს ან ფეკალიებს ეხებით, ხელი გულმოდგინედ უნდა დაიბანოთ. ადამიანებმა ცხოველებთანაც ისეთივე სოციალური დისტანცია უნდა დაიცვან, როგორც ამას სხვა ადამიანებთან აკეთებენ. ამერიკის შეერთებულ შტატებში ვეტერინარები მხოლოდ ავადმყოფ და სხეულის დაზიანებების მქონე ცხოველებს სინჯავენ, რათა კლინიკებში მისული ადამიანების რიცხვი მაქსიმალურად შეამცირონ, რაც ვირუსის გავრცელების რისკებს შეამცირებს.

    მსოფლიოს მასშტაბით ადამიანების უმრავლესობას ჰიგიენური და თავდაცვის საშუალებების დეფიციტის პრობლემა აწუხებს. ამერიკელები სოციალურ ქსელებში განაწყენებულ პოსტებს ხშირად აქვეყნებენ და აცხადებენ, რომ განვითარებულ ქვეყნებში ჰიგიენური საშუალებების დეფიციტი არ უნდა იყოს. ჰიგიენური საშუალებების გამოყენება ვირუსის წინააღმდეგ ბრძოლაში ნამდვილად ეფექტურია.

    ამერიკის შეერთებულ შტატებში ხელისუფლების წარმომადგენლები ბიზნეს სექტორს ჰიგიენური პროდუქტების წარმოების გაძლიერებისკენ მოუწოდებენ, რათა ქვეყნის მასშტაბით არსებული მწვავე დეფიციტის აღმოფხვრა შეძლონ. თავდაცვის საშუალებებით პირველ რიგში რისკ ჯგუფები უნდა აღიჭურვონ.

    მომზადებულია ​komonews.com-ის მიხედვით
    თარგმნა ია ნაროუშვილმა 
    წაიკითხეთ სრულად