,,კორონავირუსის წინააღმდეგ შეიძლება, ახალი მედიკამენტი დამკვიდრდეს'' - გიორგი ღოღობერიძე დამაიმედებელი ინფორმაციით

გთავაზობთ მ. იაშვილის სახელობის ბავშვთა ცენტრალური საავადმყოფოს კლინიკური დირექტორის ივანე ჩხაიძის რჩევას თუ როგორ ავუხსნათ პატარებს, რა არის კორონავირუსი და როგორ ვასწავლოთ მათ პირადი ჰიგიენა?

,,დისტანციური სამყარო, რომელიც კორონავირუსმა შექმნა, ბავშვებისთვის, ერთი მხრივ, საზიანოა. პატარები ტელევიზიით ინფორმაციას უწყვეტ რეჟიმში იღებენ და ისინი ნეგატიური ამბების მიმართ საკმაოდ მგრძნობიარეები არიან. რა უნდა მოვიმოქმედოთ ასეთ ვითარებაში?!

პატარებისთვის გრიპი, გაციება და მათი სიმპტომები ნაცნობია, კორონავირუსი კი მათთვის ახალი ხილია და გარკვეულ დაძაბულ ფონს ქმნის. აუხსენით ბავშვებს, რა არის კორონავირუსი და როგორ მოქმედებს ის. ასაკის შესაბამისად დაარწმუნეთ პატარები თავის დაცვის აუცილებლობაში და ხაზი გაუსვით იმას, რომ სასიკვდილო არაფერია.

ბავშვების პასიურობა დაუშვებელია. უმჯობესია, თამაშით ასწავლოთ მათ პირადი ჰიგიენის ნორმების დაცვა და შესთავაზოთ ვირუსის ერთობლივი დამარცხება. მაგალითად, მიეცით პატარებს სადეზინფექციო ხსნარში დამუშავებული ნაჭერი და „ათამაშეთ“ ტელეფონის ეკრანის და ტელევიზორის პულტის გაწმენდა. ეს ქცევა მათ მალე ჩვევაში გადაეზრდებათ.

ბავშვებმა არ იციან არც სოციალური დისტანციის მნიშვნელობა, ამიტომ აუცილებელია, სახლიდან გაყვანისას მათთან ერთად გაზომოთ 2 მეტრი და ასწავლოთ პატარებს, რა მანძილით უნდა ჩამოშორდნენ ქუჩაში მყოფ ადამიანებს.

სახლიდან ბავშვების გაყვანისას რეკომენდებულია სადეზინფექციო ხსნარის თან ტარება და პატარებისთვის ერთი ფლაკონის მიცემა, რათა მათ თავად გამოიმუშავონ თამაშისას პერიოდულად ხელების დამუშავების ჩვევა. ასწავლეთ მათ დახველების ეტიკეტიც. ეს წესები ბავშვებს საფრთხეს აარიდებს თავიდან,'' - აღნიშნავს ივანე ჩხაიძე. 

წყარო: evexhospitals.ge