Baby Bag

შავი ნადები ბავშვის კბილებზე: რატომ ჩნდება და როგორ ვუმკურნალოთ? - ინგა მამუჩიშვილის რჩევები მშობლებს

შავი ნადები ბავშვის კბილებზე: რატომ ჩნდება და როგორ ვუმკურნალოთ? - ინგა მამუჩიშვილის რჩევები მშობლებს

პედიატრმა ინგა მამუჩიშვილმა ბავშვებში კბილებზე შავი ნადების გავრცელების პრობლემაზე ისაუბრა. მისი თქმით, ბოლო პერიოდში მოიმატა იმ ბავშვების რიცხვმა, რომლებსაც კბილებზე შავი ლაქები აქვთ:

„უკანასკნელ პერიოდში ძალიან ბევრი ბავშვია კბილზე შავი ლაქებით. მშობლებს აქვთ შიში, რომ ბავშვებს დაეწყოთ კარიესი. ​ეს არ არის ხშირ შემთხვევაში კარიესი. როგორც წესი, ეს იმ ბავშვებს უჩნდებათ, რომლებიც დიდი რაოდენობით შოკოლადს მოიხმარენ და ტკბილეულს მიირთმევენ. ეს არის ტკბილეულის, ნახშირწყლების და ბაქტერიების შენაერთი. მე ვლაპარაკობ ამ შემთხვევაში ფიზიოლოგიურ სიშავეზე, იმიტომ, რომ არსებობს პათოლოგიური სიშავეც, რომელიც სხვადასხვა დაავადებებს ახლავს ხოლმე თან.“

ინგა მამუჩიშვილის თქმით, კბილებზე შავი ნადების გაჩენა, შესაძლოა, რკინის პრეპარატის ხანგრძლივი მიღებითაც იყოს გამოწვეული:

„რკინის პრეპარატის ხანგრძლივად მიღებამ იცის შავი ლაქების გაჩენა. ის სიშავე, რომელიც ვახსენეთ და ​რომელიც ბაქტერიებისა და ნახშირწყლების ნაერთია,ძალიან მარტივად მოშორებადია. სახლის პირობებშიც შეუძლიათ მშობლებს ეს მოაშორონ. არსებობს სპეციალური თითზე წამოსაცმელი ჯაგრისები. ძალიან მცირე რაოდენობის სოდის დამატებით შეიძლება ეს ადგილობრივად მოვაცილოთ. თუ მშობლებმა თვითონ ვერ მოაცილეს, ამას არაჩვეულებრივად აკეთებენ სტომატოლოგები ერთ ვიზიტზე.“

„ამ შავ ლაქებს მაინც ნუ დავტოვებთ უყურადღებოდ. შეიძლება ეს რიგ შემთხვევებში კარიესის განვითარების მიზეზი გახდეს. ცოტა მოზრდილი ბავშვები თვითონვე ამჩნევენ ვიზუალურად ამას და კომპლექსი უჩნდებათ ამასთან დაკავშირებით. ​ისინი თვითონვე ითხოვენ, რომ ეს ლაქები არ ჰქონდეთ,“ - აღნიშნულ საკითზე ინგა მამუჩიშვილმა რადიო ფორტუნას ეთერში ისაუბრა.

წყარო:​ რადიო ფორტუნა

არ დაგავიწყდეთ !!!

დაემატეთ ჯგუფში საბავშვო რეცეპტები

„წლამდე ასაკის ბავშვებისთვის კბილის პასტების გამოყენება არ არის აუცილებელი“ - რა სახის მოვ...
რა სახის მოვლა სჭირდება პირველ კბილებს და რა ასაკი უნდა მივიჩნიოთ საგანგაშოდ, თუკი ბავშვს ჯერ კიდევ არ ამოსვლია არცერთი კბილი? - ამ და სხვა საკითხებზე ​MomsEdu.ge-ს ესაუბრა ექიმი ო...

შეიძლება დაინტერესდეთ

„თბილისში კიდევ ერთი საზარელი მკვლელობა მოხდა… სად არის ღირებულებები? სად არის სიყვარული? სად არის კანონი?“ - გია მურღულია 17 წლის მოზარდის მკვლელობაზე

„თბილისში  კიდევ ერთი საზარელი მკვლელობა მოხდა… სად არის ღირებულებები? სად არის სიყვარული? სად არის კანონი?“ - გია მურღულია 17 წლის მოზარდის მკვლელობაზე

ფილოლოგი გია მურღულია სოციალურ ქსელში 17 წლის ბიჭის მკვლელობის შემთხვევას გამოეხმაურა და აღნიშნა, რომ ყველა ვალდებულია პრობლემის მიზეზები მოიძიოს და მომხდარი გააანალიზოს:

„მეხსიერების აუცილებლობა

თბილისში კიდევ ერთი საზარელი მკვლელობა მოხდა - 17 წლის ბიჭს მისმა თანატოლებმა 10 დაუნდობელი ჭრილობა მიაყენეს.

მავანი გულგრილი თუ ფილოსოფიური სახით იტყვის: სამწუხაროა, მაგრამ ასეთი რამ ხანდახან ყველგან ხდებაო.

არ შეიძლება ასე ფიქრი! - შემგუებლობა პირდაპირ ბადებს მარცხს.

ჩვენი საზოგადოება და სახელმწიფო არ უნდა იყოს ფაქტისა თუ მოვლენის უბრალო ფიქსატორი - ვალდებულნი ვართ, ყველაფერი გავაანალიზოთ, შევაფასოთ, მიზეზები მოვიძიოთ და პრინციპული გადაწყვეტილებები მივიღოთ.

მეხსიერების სიტკიცე და მდგრადობაა საჭირო!

განა რა გვჭირს ასეთი, რომ ყველაზე ამაზრზენი დანაშაული თუ პრობლემა ერთ კვირაზე მეტ ხანს თავსა და ცნობიერებაში არ გვიჩერდება?!

რატომ არ გვაღელვებს ის, რაც ჩვენს ქვეყანას შიგნიდან ღრღნის და ბუნებას უმსხვრევს?

სად არის ღირებულებები?

სად არის გონიერება?

სად არის გულწრფელი ემოცია?

სად არის სიყვარული?

სად არის კანონი?

ხორავას ქუჩაზე დატრიალებული საშინელი უბედურების განხილვა/შეფასებისას (ერთ-ერთი ტელევიზიის ეთერით რომ გადაიცა) ვთქვი, რომ რამდენიმე დღე ვიგლოვებდით, ვივიშვიშებდით და მერე ყველას ყველაფერი დაავიწყდებოდა... მომდევნო მკვლელობამდე. მინდა ვცდებოდე, მაგრამ ამის ძალიან მკაფიო განცდა მაქვს და ზუსტადაც ვიცი-მეთქი.

რა გავაკეთეთ და შევცვალეთ, რომ შემდეგი რისკები მინიმუმამდე დაგვეყვანა და ცნება "ვაჟკაცობის" დეგრადირებული ახსნა თუ განცდა შეგვეზღუდა მაინც?

რა ბადებს მოზარდი მკვლელის ცნობიერებასა და განწყობას?

სად ვუშვებთ შეცდომებს?

სად არის საოჯახო, სახელმწიფოებრივი, საზოგადოებრივი ან სასკოლო აღზრდის სისტემა?

ზოგიერთი (ყველას ყველაფერს რომ ასწავლიან, მათი წრიდან) მეტყვის, ამ ერთი ამბის გამო სისტემური ტრაგედიის ხსენება მართებული არ არისო.

ტყუილია ეს! - სისტემა კონკრეტულ შემთხვევებში ჩანს.

ბოლოს და ბოლოს, ამ თემაზე (როგორ ვაყალიბებთ ახალი თაობის ღირებულებათა სისტემას) დიდი საზოგადოებრივი დისკუსია უნდა მოვაწყოთ.

განათლების სფეროს ნამდვილი რეფორმა (ახლა ამ სიტყვით ყველაფერ სხვას მოიხსენიებენ), პირველ რიგში, აღზრდის სისტემის გააზრებასა და ჩამოყალიბებას გულისხმობს.

რატომ?

იმიტომ, რომ სწორედ ის ქმნის გარემოს, რომელიც კანონზე უწინარეს იცავს ამ საზოგადოებას ბოროტების, სიშლეგისა და უპასუხისმგებლობის ჭაობისგან.

რაც ამ დღეებში მოხდა, არ არის მხოლოდ ერთი კონკრეტული ოჯახის ან ახალგაზრდა კაცის ტრაგედია - ეს ჩვენი საერთო ტრაგედიაა.

და ბოლოს:

მხოლოდ აღზრდის სისტემის შეცვლა (თუნდაც კარგი და სწრაფი) ასეთი პრობლემების მოგვარების არ და ვერ უშველის.

აუცილებელია, რომ კანონმა იკანონოს - ყველასთვის თანაბრად!

ის უკიდურესად პრინციპული უნდა იყოს მკვლელის მიმართ, რათა დანარჩენმა ადამიანებმა მშვიდად აშენონ კეთილი და სამართლიანი მომავალი.

მუდმივი ქართული „თავის დაძვრენა“ და „ჩვენიანის ხსნა დამსახურებული სასჯელისგან“ უნდა დავივიწყოთ - ეს „ჰუმანურობა“ და „სიყვარული“ კი არა, ნაძირლობაა.

როდესაც ცნობიერება ავად არის, მას განკურნება სჭირდება,“ - აღნიშნა გია მურღულიამ.

წაიკითხეთ სრულად