გრიპი, გაციება თუ კოვიდი? როგორ განვასხვავოთ და როგორ ვუმკურნალოთ? - აღნიშნულ თემაზე ექიმი გიორგი ღოღობერიძე საუბრობს.
მისი თქმით, ტესტის გაკეთებას აზრი აქვს ინფიცირებულთან კონტაქტიდან 3-5 დღეში. რაც შეეხება გაციებისა და კოვიდის განსხვავებას, მათი გარჩევა დროის მიხედვით შეიძლება:
,,ტესტის გარეშე ამ ორის ერთმანეთისგან განსხვავება საკმაოდ რთულია, მაგრამ არსებობს ერთი ნიშანი და ეს არის დრო. თუ ეს არის გაიციება, გაციებულ ადამიანთან კონტაქტიდან 1 ან 2 დღეში უკვე დაეწყება ადამიანს ნიშნები, იშვიათად რომ 3-4 დღეში გამოვლინდეს, ხოლო კოვიდის დროს თუ ინფიცირებულთან კონტაქტიდან საშუალოდ 5 დღეა გასული და ნიშნები გამოვლინდა, მაშინ ეს დიდი ალბათობით კოვიდია,'' - აღნიშნავს გიორგი ღოღობერიძე.
რაც შეეხება მკურნალობას (კოვიდის და გაციების დროს), სიცხის სამართავად მხოლოდამხოლოდ ორი მედიკამენტია გამართლებული - იბუპროფენი და პარაცეტამოლი. ორივე მედიკამენეტი მიიღება დღეში 3-4 ჯერ და დოზებს შორის ინტერვალი უნდა იყოს 4-6 საათი.
თუ დარწუმებული ხართ, რომ გრიპი გაქვთ და მძიმე ფორმით გივლინდებათ, პირველ 48 საათში უნდა მიიღოთ ანტივირუსული მედიკამენტი, მერე მათ მიღებას აზრი არა აქვს, რადგან ეფექტურობა ძალიან დაბალია:
,,ძალიან ბევრი გაციებისა და კოვიდის დროს სვამს ლიმონიან ჩაის. მე გირჩევთ, რომ ჩაი ცალკე დალიოთ და ლიმონი წყალში ჩააგდოთ, რადგან C ვიტამინი ცხელ წყალში (სითბომგრძნობიარე ვიტამინია) იშლება. ლიმონიან წყალში შეგიძლიათ, თაფლიც ჩაამატოთ, ეს ხველისთვისაც კარგია.''
კოვიდის შემთხვევაში 10 დღის მერე იზოლაცია აღარ არის საჭირო.
,,შეჯამების სახით რომ ვთქვათ, კოვიდი და გაციება იმართება ერთნაირად - საჭიროა სიცხის დამწევი, სასურველია პაციენტმა მიიღოს ბევრი სითხე, იყოს აქტიური. საპანიკო არაფერია, გაციება მარტივად იმართება, ასევეა კოვიდი თუ განწყობა კარგი გაქვთ და მხნედ ხართ. ყელის ტკივილის დროს გამოიყენეთ პარაცეტამოლი, ასევე შესაძლოა გამოიყენოთ საწუწნი აბები,'' - აღნიშნავს გიორგი ღოღობერიძე.
„მზის გულზე ხანგრძლივად, 5-6 საათით ყოფნა გადახურებას და მზის დაკვრას იწვევს, ხშირია გონების დაბინდვა, გულისრევა, კანკალი,“ - გუგა ქაშიბაძე
დამწვრობის ცენტრის დირექტორმა, გუგა ქაშიბაძემ გადაცემაში „დილა ფორმულაზე“ ზაფხულის აქტუალური პრობლემის, კანის დამწვრობის შესახებ ისაუბრა:
„წელს ლეღვის ნახარშით დამწვრობის მხოლოდ ერთი შემთხვევა დაფიქსირდა. 30 წლის ქალბატონმა რუჯის მიღების მიზნით გამოიყენა ნახარში, სამწუხაროდ ასეთი ფაქტები ისევ ხდება. იმედი გვქონდა, რომ წელს მაინც არ იქნებოდა ასეთი შემთხვევა, იმედს ვიტოვებ, რომ აღარ განმეორდება.“
გუგა ქაშიბაძის თქმით, დამწვრობის თავიდან ასაცილებლად გარკვეული წესების დაცვა აუცილებელია:
„მზის გულზე გასეირნება არ არის აუცილებელი, ქიმიურ დამწვრობას მთვარის სინათლეზეც კი მივიღებთ. ამ პერიოდში, როდესაც ჩვენი კანი თეთრი ფერისაა და მზეზე ყოფნას არ არის მიჩვეული, რუჯი ნელ-ნელა უნდა მივიღოთ. მგონი, ყველას ესმის, რომ ერთ დღეში ერთი კვირის რუჯს ვერ მივიღებთ. ადამიანები ცდილობენ, რომ პირველივე დღეს რამდენიმე საათი დაჰყონ მზის გულზე, რაც არასწორია. ბუნებრივია, საჭიროა მზისგან დამცავი კრემების გამოყენება. ამ კრემებსაც მოხმარების გარკვეული წესები აქვს. თუ წყალში ხშირად ჩავდივართ, კრემის წასმა განმეორებით დაგვჭირდება. ბევრი მზისგან დამცავ კრემებს ეჭვის თვალით უყურებს და თვლის, რომ არ მუშაობს. სინამდვილეში კრემი ძალიან ეფექტურია. უმჯობესია, თუ მის გამოყენებამდე დერმატოლოგს ვნახავთ და კანს უკეთ გავიცნობთ. ზოგიერთი კანის დაავადების დროს მზეზე გასვლა საერთოდ არ არის მიზანშეწონილი. თუ გვინდა მზე იყოს ჩვენი მეგობარი და ჩვენს მეგობრად დარჩეს, მისი სასარგებლო თვისებები უნდა გამოვიყენოთ. დასვენების დღეები, რომელიც ბუნებამ გვარგუნა, დამწვრობის მკურნალობაში არ უნდა დავხარჯოთ.“
„სეზონის დაწყებიდან მზით დამწვრობის 15 შემთხვევა დაფიქსირდა, რომელსაც სტაციონარში მკურნალობა დასჭირდა. ყველაზე პატარა პაციენტი 13 წლის გოგონა იყო, ყველაზე დიდი კი 32 წლის ქალბატონი. ყოფილა შემთხვევები, როდესაც მზით დამწვარი პაციენტები რეანიმაციაშიც კი მოხვედრილან. მზის გულზე ხანგრძლივად, 5-6 საათით ყოფნა გადახურებას და მზის დაკვრას იწვევს. ხშირია გონების დაბინდვა ან დაკარგვა, გულისრევის შეგრძნება, ღებინება, თავის ტკივილი, კანკალი. ეს ყველაფერი იმაზე მიგვანიშნებს, რომ ჩვენს ორგანიზმს უჭირს. კარგად დასვენება თითოეული ჩვენი მოქალაქისთვის მნიშვნელოვანია. თუ კარგად ვერ დავისვენებთ, ვერც კარგად ვიმუშავებთ და ვერც კარგად ვისწავლით. მზით დამწვრობა ორი კვირის განმავლობაში რიტმიდან გვაგდებს, ხშირად პიგმენტურ ლაქებსაც ტოვებს. ადამიანებს 3-4 დღე აქვთ შვებულება, ერთხელ დაიწვებიან, მეორე-მესამე დღეს სახლში არ დარჩებიან, კიდევ მოინდომებენ გასვლას და მერე პიგმენტური ლაქები რჩებათ, რომლებიც ძალიან რთული მოსაშორებელია. ხანგრძლივად მზის გულზე ყოფნა ნაადრევ დაბერებას და კანის გამოშრობას იწვევს,“ - აღნიშნა გუგა ქაშიბაძემ.
