როგორია D ვიტამინის პროფილაქტიკური დოზა ზრდასრულებსა და ბავშვებში? - აღნიშნულ თემაზე ბავშვთა ენდოკრინოლოგმა ნინო ხელაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.
,,D ვიტამინი არ არის მხოლოდ ვიტამინი, ეს არის მნიშვნელოვანი ჰორმონი, რომელიც ადრე ეგონათ, რომ მხოლოდ ძვლის და კალციუმისთვის იყო აუცილებელი, თუმცა ახლა დამტკიცდა, რომ მას აქვს ძალიან მნიშვნელოვანი როლი იმუნური სისტემის გაძლიერებისთვის, ალერგიების პრევენციისთვის, სიმსუქნის შემთხვევაში, გულსისხლძარღვთა სისტემის და დიაბეტის პრევენციისთვის (პირველი ტიპის დიაბეტის პრევენციისთვისაც კი), ონკოლოგიური დაავადებების საწინააღმდეგოდ და ბევრი სხვა. აღმოჩნდა, რომ D ვიტამინის რეცეპტორები თავის ტვინშიც კი არის. ამიტომ ყველა უჯრედისა და ორგანოთა სისტემისთვის არის ძალიან აუცილებელი.
ჩვენთან არის სახელმწიფო გაიდლაინი, სტანდარტი, რომლის მიხედვითაც ყველა ბავშვმა, არა აქვს მნიშვნელობა ძუძუთი იკვებება, თუ ხელოვნურზეა, ორ წლამდე უნდა მიიღოს D ვიტამინის პროფილაქტიკური დოზა, 2 წლის შემდეგ, მათ შორის მოზრდილების ჩათვლით, მნიშვნელოვანია და უკვე აქტუალური ხდება, რომ D ვიტამინი მივიღოთ სეზონურად, როცა მზე ვერ იქნება ამ ვიტამინის აქტიური წყარო.
არის გარკვეული საკვები, რომელიც შეგვივსებს მის დანაკლისს, თუმცა ეს საკმაოდ რთულია, რადგან ამ საკვების დიდი რაოდენობით მიღებაა საჭირო. მაგალითად, 10-15 კვერცხი უნდა მიიღოს ბავშვმა, რომ შეივსოს იმ დღის ნორმა D ვიტამინი, რაც წარმოუდგენელია. ამიტომ ხდება აქტუალური, რომ დანამატის სახით მიიღოს ბავშვმა ასაკის გათვალისწინებით შერჩეული დოზა. ეს ეხება ყველა ჯანმრთელ ბავშვს სეზონურად,'' - აღნიშნა ნინო ხელაძემ.
„ბავშვის მოვლა ხომ ძალიან დიდი სიკეთეა, მაგრამ მოხუცის მოვლა, შეიძლება, აღემატება კიდეც მას,“- ფსიქოლოგი მარინა კაჭარავა
ფსიქოლოგმა მარინა კაჭარავამ მოხუცებზე ზრუნვის მნიშვნელობაზე ისაუბრა და აღნიშნა, რომ ეს ადამიანის მომავალში ჩადებული კონტრიბუციაა:
„ცნობილი იგავია, როდესაც მოხუცი ბაბუის გადაგდება მოინდომა შვილმა. გოდორში ჩასვა, ტყეში წაიყვანა და პატარა შვილი მიჰყვებოდა. სად მიგყავსო, ბავშვმა ჰკითხა. ტყეშიო, იქ დავტოვებო. შვილიშვილმა არ გააპროტესტა ეს. როდესაც დატოვეს და მოდიოდნენ, ბავშვმა უთხრა, გოდორი წამოგეღოო. რაღად მინდაო, მამამ იკითხა. რატომ? შენც ხომ წამოგიყვან, როდესაც დაბერდებიო, უთხრა ბავშვმა. მაშინ მოიკიდა მოხუცი ზურგზე მამამ და უკან წამოიყვანა. ყველამ უნდა გავიაზროთ, რომ სამყაროში არსებობს ბუმერანგის პრინციპი.“
„არაფერი არ იკარგება, არც სიკეთე, არც ბოროტება. არცერთი კეთილი ფიქრი, არცერთი კეთილი საქმე. მოხუცის მოვლა არის კონტრიბუცია საკუთარ მომავალში. არავინ არ ჩათვალოს, რომ თუ სხვას უვლის, სხვის საქმეს აკეთებს. თავის საქმეს აკეთებს. ბავშვის მოვლა ხომ ძალიან დიდი სიკეთეა, მაგრამ მოხუცის მოვლა, შეიძლება, აღემატება კიდეც მას. ეს არის ყველაზე უსუსური და დაუცველი მდგომარეობა ადამიანის ცხოვრებაში,“ - აღნიშნა მარინა კაჭარავამ.
