როგორია D ვიტამინის პროფილაქტიკური დოზა ზრდასრულებსა და ბავშვებში? - აღნიშნულ თემაზე ბავშვთა ენდოკრინოლოგმა ნინო ხელაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.
,,D ვიტამინი არ არის მხოლოდ ვიტამინი, ეს არის მნიშვნელოვანი ჰორმონი, რომელიც ადრე ეგონათ, რომ მხოლოდ ძვლის და კალციუმისთვის იყო აუცილებელი, თუმცა ახლა დამტკიცდა, რომ მას აქვს ძალიან მნიშვნელოვანი როლი იმუნური სისტემის გაძლიერებისთვის, ალერგიების პრევენციისთვის, სიმსუქნის შემთხვევაში, გულსისხლძარღვთა სისტემის და დიაბეტის პრევენციისთვის (პირველი ტიპის დიაბეტის პრევენციისთვისაც კი), ონკოლოგიური დაავადებების საწინააღმდეგოდ და ბევრი სხვა. აღმოჩნდა, რომ D ვიტამინის რეცეპტორები თავის ტვინშიც კი არის. ამიტომ ყველა უჯრედისა და ორგანოთა სისტემისთვის არის ძალიან აუცილებელი.
ჩვენთან არის სახელმწიფო გაიდლაინი, სტანდარტი, რომლის მიხედვითაც ყველა ბავშვმა, არა აქვს მნიშვნელობა ძუძუთი იკვებება, თუ ხელოვნურზეა, ორ წლამდე უნდა მიიღოს D ვიტამინის პროფილაქტიკური დოზა, 2 წლის შემდეგ, მათ შორის მოზრდილების ჩათვლით, მნიშვნელოვანია და უკვე აქტუალური ხდება, რომ D ვიტამინი მივიღოთ სეზონურად, როცა მზე ვერ იქნება ამ ვიტამინის აქტიური წყარო.
არის გარკვეული საკვები, რომელიც შეგვივსებს მის დანაკლისს, თუმცა ეს საკმაოდ რთულია, რადგან ამ საკვების დიდი რაოდენობით მიღებაა საჭირო. მაგალითად, 10-15 კვერცხი უნდა მიიღოს ბავშვმა, რომ შეივსოს იმ დღის ნორმა D ვიტამინი, რაც წარმოუდგენელია. ამიტომ ხდება აქტუალური, რომ დანამატის სახით მიიღოს ბავშვმა ასაკის გათვალისწინებით შერჩეული დოზა. ეს ეხება ყველა ჯანმრთელ ბავშვს სეზონურად,'' - აღნიშნა ნინო ხელაძემ.
„კორონავირუსის მუტაციის უფრო მძიმე ვარიანტს ანაცვლებს ახალი, უფრო მსუბუქი ვარიანტი, ეს კარგია ამ თვალსაზრისით,“ - ივანე ჩხაიძე
იმუნიზაციის ტექნიკურ მრჩეველთა ეროვნული ჯგუფის ხელმძღვანელმა ივანე ჩხაიძემ ომიკრონის შტამის საქართველოში შემოსვლის შემთხვევაში მოვლენების შესაძლო განვითარების შესახებ ისაუბრა:
„თუ ომიკრონი გახდა დომინანტური, რისკი იმისა, რომ შემთხვევები კიდევ უფრო მაღალი იყოს, არის ძალიან რეალური. ეს არ ნიშნავს, რომ ჩვენ შესაბამისად მივიღებთ მძიმე შემთხვევების მატებას. რისკი იმისა, რომ ჯანდაცვის სექტორი ვერ გაუმკლავდეს პაციენტების მოზღვავებას, არის მინიმალური. არცერთი ქვეყანა არ აფიქსირებს, რომ ინფიცირების გარდა გამოიწვია ამან ჰოსპიტალიზაციის მატება.“
ივანე ჩხაიძის თქმით, ომიკრონი არსებულ მუტაციებს შორის ყველაზე უფრო გადამდებია“
„ომიკრონი დღემდე არსებულ მუტაციებს შორის ყველაზე სწრაფად გადამდები და იოლად გავრცელებადია. არცერთი დღეისათვის არსებული ვაქცინა არ გვიცავს ინფიცირებისგან. ეს შეფასება დადასტურდა სამხრეთ აფრიკული კვლევითაც. შეიძლება იყოს მეექვსე ტალღა, ოღონდ ეს იქნება იმ შემთხვევების ტალღა, რომლებიც სახლში გადაიტანენ, ამბულატორიულად გადაიტანენ, არ დასჭირდებათ ჰოსპიტალიზაცია, მაგრამ ინფიცირების მაჩვენებელი იქნება მაღალი.“
„მუტაციის უფრო მძიმე ვარიანტს ანაცვლებს ახალი, უფრო მსუბუქი ვარიანტი, ეს კარგია ამ თვალსაზრისით. თუ სამხრეთ აფრიკის გარდა ეს სხვა ქვეყნებმაც დაადასტურეს, შეგვიძლია ჩავთვალოთ, რომ ეს ძალიან კარგი მუტაციაა. მუტაცია გარკვეულ ეტაპზე თავის სიმძიმეს ამოწურავს და წავა მსუბუქი მუტაციის გზითაც,“ - აღნიშნულ საკითხზე ივანე ჩხაიძემ მედიაჰოლდინგ „კვირაში“ ისაუბრა.
