Baby Bag

რა ასაკიდან შევიყვანოთ ბავშვი სპორტზე და რა უნდა გავითვალისწინოთ, სანამ ამა თუ იმ სახეობაზე შეყვანას გადავწყვეტთ? - ამ და სხვა საკითხებზე ​MomsEdu.ge-ს ბავშვთა ორთოპედი ამირან შარაბიძე ესაუბრა

რა ასაკიდან შევიყვანოთ ბავშვი სპორტზე და რა უნდა გავითვალისწინოთ, სანამ ამა თუ იმ სახეობაზე შეყვანას გადავწყვეტთ? - ამ და სხვა საკითხებზე ​MomsEdu.ge-ს ბავშვთა ორთოპედი ამირან შარაბიძე ესაუბრა
რა ასაკიდან შევიყვანოთ ბავშვი სპორტზე და რა უნდა გავითვალისწინოთ, სანამ ამა თუ იმ სახეობაზე შეყვანას გადავწყვეტთ? - ამ და სხვა საკითხებზე ​MomsEdu.ge-ს ბავშვთა ორთოპედი ამირან შარაბიძე ესაუბრა. 

- ფიზიკური აქტივობა აუცილებელა ბავშვებისთვის. რა ასაკიდან დავაწყებინოთ სპორტული ცხოვრება?

- ფიზიკური აქტივობა, მით უმეტეს 21-ე საუკუნეში, როდესაც გავრცელდა ცხოვრების პასიური წესი, აუცლებელია ბავშვის ნორმალური ზრდა-განვითარებისთვის. სპორტი არ არის მხოლოდ ფიზიკური აქტივობის საშუალება, ის დიდ როლს თამაშობს პიროვნების მენტალური ჩამოყალიბების პროცესშიც. სპორტთან ერთად ბავშვი ხდება სოციალურად მეტად აქტიური, იძენს მეგობრებს, სწავლობს სირთულეების გადალახვას, სხვების პატივისცემას და ა.შ.

სპორტული აქტივობის დაწყება თეორიულად ნებისმიერი ასაკიდან შეიძლება. ამის ნათელი მაგალითია ცურვა, რომელსაც ბავშვები 1 წლამდე სწავლობენ, თუმცა სპორტის არსის გათავისება მხოლოდ 5-6 წლიდან იწყება, ამ დროისთვის ასევე იხვეწება ნეირო-მოტორული შესაძლებლობები. მანამდე სპორტზე სიარულსაც აქვს აზრი, მაგრამ არა სპორტული, უფრო გარემოსთან შეგუების თვალსაზრისით. ზოგადად, სპორტული ცხორების დაწყების ოპტიმალურ ვადებად მიჩნეულია 4-8 წლები.

- კონკრეტულად, რომელ ასაკში, რომელ სპორტს ურჩევდით მშობლებს, რომლებსაც ვერ გადაუწყვეტიათ, რაზე შეიყვანონ შვილი?

- პირველ რიგში, უნდა გავითვალისწინოთ, რომ ბავშვი უკვე პიროვნებაა, მას აუცილებლად უნდა მივცეთ არჩევანის საშუალება, უნდა დავუსვათ კითხვები, გავიგოთ მისი ინტერესების შესახებ და ამის შემდეგ შევთავაზოთ რამდენიმე ვარიანტი, რათა მისთვის უინტერესო სახეობის გამო საერთოდ არ გაუქრეს სპორტის მიმართ ინტერესი.

ზოგად რჩევებს რაც შეეხება, გასათვალიწინებელია ბავშვის ასაკი, კონსტიტუციური აგებულება, ფსიქო-ემოციური მდგომარეობა. 

მაგალითად, ჰიპერაქტიური ბავშვებისთვის სასურველია რომელიმე საბრძოლო ხელოვნება, სადაც ენერგიას დახარჯავენ, საუკეთესო ვარიანტად ბევრის აზრით მიჩნეულია ძიუდო. 

მათთვის ვისაც ბუნება უყვარს-ცხენოსნობა, კლდეზე ცოცვა. 

ინტროვერტი ბავშვებისთვის სპორტის გუნდური სახეობები, სადაც გაიხსნებიან და სხვებთან ურთიერთობას მიეჩვევიან. 

ცოტა მოუქნელებისთვის კალათბურთი, რომელიც მოტორიკას ანვითარებს. 

თუმცა, თუ უნდა დავასახელოთ ერთი უნივერსალური სახეობა, რომელსაც ყველასთვის მეტ-ნაკლებად შეუძლია სარგებლის მოტანა, ესაა ცურვა, რადგან წყალში გრავიტაციის ძალა 2-ჯერ ნაკლებია, ვიდრე ზედაპირზე, ძვალ- სახსროვანი სისტემა ნაკლებადაა დატვირთული, ხოლო იმის გამო, რომ წყლის სიმკვრივე მეტია ჰაერისაზე, ერთი და იგივე მოძრაობის განხორცილებისთვის კუნთს წყალში უწევს დაახლოებით 4-ჯერ მეტი სამუშაოს შესრულება, ეს ორი მოცემულობა იძლევა საყრდენ-მამოძრავებელი სისტემის განვითარებისთვის ოტიმალურ პირობებს. გარდა ამისა, ცურვის დროს კარგად ვითარდება კარდიო-ვასკულური და რესპირატორული სისტემები, მენტალური თვალსაზრისით კი ბავშვი იძენს თავდაჯერებულობას.

- მშობლებს ხშირად აწუხებთ ბავშვის სიმაღლის საკითხი, ასეთ შემთხვევაში, არის თუ არა რომელიმე სპორტის სახეობა ეფექტური სიმაღლეში ზრდისთვის და რომელს მიანიჭებდით უპირატესობას?

- საყოველთაოდ გარცელებული შეხედულების თანახმად, კალათბურთი ხელს უწყობს სიმაღლეში ზრდას, ხოლო ათლეტიზმი და ჭიდაობა პირიქით, ხელს უშლის. დღესდღეობით, არ არსებობს არც ერთი სარწმუნო მეცნიერული კვლევა, რომელიც ამ მოსაზრებას ცალსახად დაადასტურებდა, თუმცა დადგენილია, რომ კვირაში დაახლოებით 18 საათით ინტენსიური ვარჯიშის პირობებში ხდება ზოგიერთი ჰორმონის სეკრეციის სტიმულირება, მათ შორის საინტერესოა Insulin-like growth factor 1 (IGF-1), რომელიც მნიშვნელოვან როლს თამაშობს ორგანიზმის ზრდის პროცესში, მაგრამ აქ გასათვალისწინებელია მეორე ფაქტორი, სპორტული აქტივობით ბავშვის დატვირთვის ხანგრძლივობა ძლიერაა დამოკიდებული მის ასაკზე, ზედმეტი ვარჯიში ზრდის ტრავმის მიღების ალბათობას, ხოლო 18 საათი პუბერტამდელი (პუბერტული ანუ მომწიფების პერიოდი) ასაკისთვის ძალიან ბევრია.

ადამიანის ზრდის პროცესს არეგულირებს ენდოკრინული სისტემა, ამიტომ თუ მშობელს საფუძვლიანი კითხვები გააჩნია ამ მიმართულებით, უმჯობესია მიმართოს ენდოკრინოლოგს, რათა შეფასდეს ბავშვის ჰორმონალური ბალანსი და საჭიროების შემთხვევაში განხორციელდეს ადეკვატური ჩარევა.

- თუ ბავშვი სუსტი აღნაგობისაა ან პირიქით, სიმსუქნისკენ არის მიდრეკილი, რომელი სპორტია უკეთესი, ორივე შემთხვევაში?

- ჭარბი წონა ნიშნავს ძვალ-სახსროვანი სისტემის ჭარბ დატვირთვას, ამიტომ არაა სასურველი სპორტის სახეობები, რომლებიც დაკავშირებულია სხეულის ვერტიკალურ დატვირთვასთან, სირბილთან, ფეხზე დიდხანს დგომასთან. 
ზოგადად, ჭარბწონიანობა არაა მდგომარეობა, რომელიც „მარტო მოდის“, ძვალ-სახსროვანის გარდა მას ახასიათებს კარდიო-ვასკულარული, ედოკრინული, რესპირატორული, დიგესტიური სისტემის დაზიანებები, ამიტომ თუ ბავშვის სხეულის მასის ინდექსი სცილდება, ან მიახლოებულია მაქსიმალურ, ან მინიმალურ მაჩვენებლებთან, გირჩევდით მიგემართათ სპეციალისტისთვის. დროულად დაწყებული მკურნალობა შედეგის მისაღწევად უმნიშვნელოვანესი ფაქტორია.

- რა დროს არ შეიძლება ბავშვის სპორტით დაკავება და აუცილებელია თუ არა სანამ გადავწყვეტთ ამა თუ იმ სახეობაზე შეყვანას, მივმართოთ სპეციალისტს?

- თუ ბავშვს არ აქვს ისეთი ქრონიკული ან მწვავე დაავადება, რომელიც ფიზიკური აქტივობის შესაძლებლობას გამორიცხავს, სწორად შერჩეული სპორტის სახეობისგან თავის შეკავება საჭირო არაა.

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

შეიძლება დაინტერესდეთ

„დაშაქრული ხახვის, ალოეს წვენის, გაცხელებული სპირტისა და მარილის გამოყენება არავითარ შემთხვევაში არ შეიძლება“ - ინტერვიუ ოტო–რინო–ლარინგოლოგ ბერდია ბერიძესთან

„დაშაქრული ხახვის, ალოეს წვენის, გაცხელებული სპირტისა და მარილის გამოყენება არავითარ შემთხვევაში არ შეიძლება“ - ინტერვიუ ოტო–რინო–ლარინგოლოგ ბერდია ბერიძესთან

გახშირებული ყელის ტკივილი და მისგან გამომდინარე სიცხე, ყურის ანთება, გლანდების ოპერაცია - ამ და სხვა საინტერესო და აქტუალურ თემებზე ​MomsEdu​.ge-ს „ნიუ ჰოსპიტალსის“ ოტო–რინო–ლარინგოლოგიის განყოფილების ხელმძღვანელი ბერდია ბერიძე ესაუბრა. 

- ვირუსების სეზონია და გამომდინარე აქედან აქტუალური საკითხია ბავშვებში გახშირებული ყელის ტკივილი და მისგან გამომდინარე სიცხე, ყურის ანთება... რა რჩევებს მისცემთ მშობლებს პრევენციისთვის?

- ნამდვილად საყურადღებო პერიოდია. პრევენციისთვის ყველაზე კარგია ხელების ხშირი დაბანა, ხალხმრავალი ადგილებისთვის თავის არიდება და რაც ყველაზე მნიშვნელოვანი და ერთ-ერთი საუკეთესო საშულებაა - აცრების ჩატარება.(ახლა უკვე დაგვიანებულია. მაგრამ მომავალი სეზონისთვის აუცილებლად უნდა გაითვალისწინოს მოსახლეობამ) 

- სიმპტომებზე რომ გადავიდეთ. როგორ მივხვდებით, რომ პატარას ყელი, ყური სტკივა...

არ დაგავიწყდეთ !!!

Moms.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

- თუ ბავშვი არ არის იმ ასაკში, რომ შეძლოს მშობელს ვერბალურად აუხსნას საკუთარი პრობლემა, ასეთ დროს ყველაზე ხშირი სიმპტომი არის საკვებზე უარის თქმა, ჭირვეულობა და ხანდახან ტემპერატურის მატებაც. ყურის ტკივილს რაც შეეხება, პატარები არ ჭამენ, ხშირად ხელს იკიდებენ ყურზე, მოვლითი ხასიათის პერიოდული ტკივილის გამო მოულოდნელად წამოიტირებენ ხოლმე. ამ შემთხვევაში აუცილებელია ბავშვის სპეციალისტთან მიყვანა, რათა თავიდან ავირიდოთ გართულებები. 

- რადგან ყურის ტკივილზე ვსაუბრობთ. მისი მოვლის წესებიც რომ გვითხრათ. რა სიხშირით უნდა გავუწმინდოთ ბავშვებს ყურები და რა უნდა გავითვალისწინოთ ამ დროს?

- ყურის ჩხირის დანიშნულება არის მხოლოდ და მხოლოდ ყურის ნიჟარის გასუფთავება. ჩხირი არ უნდა მოხვდეს გარე სასმენ მილში, რადგან ის აზიანებს იმ ბუსუსებს, რომლის საშუალებითაც ხდება გოგირდის ბუნებრივად გარეთ გამოტანა. შესაბამისად, გოგირდი გარეთ ვერ გამოვა და წარმოიშობა საცობი. ხშირად ამბობენ, რომ თუ ადამიანს ერთხელ დასჭირდა გოგირდის საცობის გამო ყურის გამორეცხვა, მერე მთელი ცხოვრება დასჭირდებაო. რაღაც დოზით მართალია, რადგან ზიანდება ბუსუსები და ყური გოგირდის საცობს ადვილად იკეთებს. ბავშვებს ყურები, პირის დაბანვის მსგავსად, ყოველ დილით უნდა გავუსუფთავოთ. 

- როგორ მივხვდეთ, ყურის გაწმენდისას პატარას აპკი დავუზიანეთ თუ არა?

- ყურის აპკის დაზიანების პირველი სიმპტომი არის ძლიერი ტკივილი და სისხლიანი გამონადენი. დანარჩენს კი უკვე დეტალურად სპეციალისტი ადგენს.

- ყელის ტკივილზეც რომ ვისაუბროთ. რომელ ბუნებრივ საშუალებებს გვირჩევდით ყელის ტკივილის სამკურნალოდ (დაშაქრული ხახვი), ყურის ტკივილის სამკურნალოდ (ალოეს წვენი, სპირტი)?

- ზოგადად, არსებობს მცენარეული საშუალებები, საკმაოდ მაღალი ხარისხის, რომელიც ინიშნება როგორც მწვავე, ასევე ქრონიკულად მიმდინარე პროცესების დროს და საკმაოდ კარგ შედეგს იძლევა. დაშაქრული ხახვის, ალოეს წვენის, გაცხელებული სპირტისა და მარილის გამოყენება არავითარ შემთხვევაში არ შეიძლება, მით უმეტეს, თუ ყურის ანთებასთან გვაქვს საქმე. ბავშვებში ისედაც ძალიან სწრაფად ვრცელდება ინფექცია და ეს ყველაფერი კიდევ უფრო ართულებს საქმეს. სჯობს, აპრობირებული წვეთები გამოვიყენოთ, რომლებიც ტკივილს მარტივად აყუჩებს და კარგ შედეგსაც იძლევა.

- როდესაც ბავშვს ყელი სტკივა, ხშირად თბილ რძეს ასმევენ. რამდენად მართებულია ეს ხერხი და კიდევ თუ გვეტყვით ისეთ პროდუქტებს, რომელთა მიღებაც ყელის ტკივილისას არ არის სასურველი.

- რძე უკუჩვენებას არ წარმომადგენს. გამომდინარე იქედან, რომ თბილი სითხე უამებს ყელს, შეგიძლიათ მისცეთ თბილი რძე, ჩაი, კომპოტი, წვენი თუ წყალი. არ არის სასურველი სოდიანი სავლების გამოყენება, რადგან სოდა აშრობს ლორწოვანს და შეიძლება უფრო გაამძაფროს სიმპტომები. არ შეიძლება, ასევე, წყალბადის ზეჟანგი და ლიმონი, რომელიც ხალხში საკმაოდ გავრცელებული მეთოდია. 

- ხშირ შემთხვევაში სიცხეები გლანდებთან არის კავშირში. რა ასაკში შეიძლება გლანდების ოპერაციის გაკეთება?

- ყველა ქირურგიულ ჩარევას აქვს კონკრეტული ჩვენება. გარდატეხის ასაკამდე თუ ჩატარდება, რა თქმა უნდა, უკეთესია. ქვედაზღვარი მაინც სამი წელია, რადგან უფრო დაბალ ასაკში არ არის რეკომენდებული, ვინაიდან პატარები ვერ საუბრობენ გამართულად და სისხლდენის არსებობის შემთხვევაში შეიძლება, ვერ გაგვაგებინონ და მშობლებსაც გამოეპაროთ.

- ცხვირის წმენდის პროცედურაზეც რომ გვესაუბროთ, რა უნდა გავითვალისწინოთ ამ დროს?

- გარემო პირობებიდან და ეკოლოგიიდან გამომდინარე, როგორც კბილების ხეხვაა თავის მოვლის პროცედურა, ასევე კარგი და მნიშვნელოვანია, თუ მშობლები საკუთარ შვილებს პატარაობიდანვე მიაჩვევენ ცხვირის გამორეცხვას, რადგან ამ პროცედურით ვირუსებს, ბაქტერიულ ინფექციებს, ქრონიკულ პროცესებსა და ალერგიულ რინიტს მეტ-ნაკლებად თავიდან ავიცილებთ. ცხვირის გამორეცხვით ცხვირის ლორწოვანიდან მექანიკურად გამოიდევნება დღის განმავლობაში დაგროვებული მტვერი, ბაქტერია და ვირუსები.

- მუდმივი სურდო რასთან შეიძლება იყოს კავშირში?

- მუდმივი სურდო შეიძლება რამდენიმე ფაქტორმა გამოიწვიოს. ზოგადად, სურდო 245 სახეობის შეიძლება იყოს. თუმცა, ჩვენს ქვეყანაში ყველაზე გავრცელებული არის ხანგრძლივად ცხვირის გამხსნელი საშუალებების გამოყენებით გამოწვეული. ასევე არსებობს ალერგიული და ბაქტერიული სურდო. ამ ყველაფერს სჭირდება დიაგნოსტირება და კონკრეტული მკურნალობა, რათა მყარი და მდგრადი შედეგი მივიღოთ.

- და ბოლოს, მაცივრიდან გამოღებული მაწონი, ხაჭო, ხილი ... რეკომენდებულია თუ არა, რომ მაშინვე მივცეთ პატარას?

- მაცივრიდან გამოტანილი პროდუქტი 10-15 წუთით უნდა დავაყოვნოთ. ეს დრო საკმარისია, რომ მაცივრიდან გამოღებული საკვების ტემპერატურა თითქმის გაუთანაბრდეს ოთახის ტემპერატურას. განსაკუთრებით ზამთარში, სასურველია, რომ სანამ ბავშვს მაცივრიდან გამოტანილ საკვებს მივცემთ, დავაყოვნოთ და მხოლოდ ამის შემდეგ მივცეთ.

ესაუბრა თამუნა კიკალიშვილი 
წაიკითხეთ სრულად